V2025

செய்திகள்

எந்தவொரு கட்சிக்கும் 40 வீதமான வாக்குகள் கிடைக்காது – ஜனாதிபதி!

(VIDEO)
எந்தவொரு கட்சிக்கும் 40 வீதமான வாக்குகள் கிடைக்காது என ஜனாதிபதி மைத்திரிபால சிறிசேன தெரிவித்துள்ளார்.
இதுவரையில் முன்னெடுக்கப்பட்டுள்ள அனைத்து கருத்துக் கணிப்புக்கள், ஆய்வுகளின் மூலம் ஜனாதிபதி தேர்தலில் போட்டியிடுவதாக அறிவிக்கப்பட்டுள்ள மற்றும் போட்டியிடுவதாக உத்தேசிக்கப்பட்டுள்ள எந்தவொரு வேட்பாளரினாலும், 40 வீத வாக்குகளைப் பெற்றுக்கொள்ள முடியாது என அவர் குறிப்பிட்டுள்ளார்.
எனவே, நிச்சயமாக ஸ்ரீலங்கா சுதந்திரக் கட்சியின் உதவியுடனேயே ஜனாதிபதி தேர்தலில் வெற்றியீட்ட முடியும் எனவும் அவர் சுட்டிக்காட்டியுள்ளார்.
ஸ்ரீலங்கா பொதுஜன முன்னணியுடன் பல்வேறு சுற்று பேச்சுவார்த்தைகள் முன்னெடுக்கப்பட்டுள்ளதாகத் தெரிவிக்கப்படுகிறது.
ரத்தினபுரியில் நேற்று (15) நடைபெற்ற செய்தியாளர் சந்திப்பில் பங்கேற்ற போது அவர் இந்த விடயத்தை சுட்டிக்காட்டியுள்ளார்.
ஐக்கிய தேசியக் கட்சியும், ஸ்ரீலங்கா பொதுஜன முன்னணியும் பேச்சுவார்த்தை நடத்த அழைப்பு விடுத்துள்ளதாகத் தெரிவித்துள்ளார்.
எனினும் இதுவரையில் ஐக்கிய தேசியக் கட்சியுடன் எவ்வித பேச்சுவார்த்தைகளையும் நடாத்தியது கிடையாது என அவர் சுட்டிக்காட்டியுள்ளார்.
பொதுஜன முன்னணியுடன் நாட்டை முன்னிலைப்படுத்தி சில சுற்றுப் பேச்சுவார்த்தைகள் நடத்தப்பட்டுள்ளதாகவும் தொடர்ந்தும், இந்தப் பேச்சுவார்த்தைகள் நடத்தப்படும் எனவும் அவர் சுட்டிக்காட்டியுள்ளார்.
ஸ்ரீலங்கா சுதந்திரக் கட்சியை எவரும் மலினப்படுத்துவதற்கோ பலவீனப்படுத்துவதற்கு இடமளிக்கப்பட முடியாது என அவர் சுட்டிக்காட்டியுள்ளார்.
கட்சிக்கும் கட்சியின் அங்கத்தவர்களுக்கும் நலன்களை வழங்கக்கூடிய திட்டங்கள் முன்னெடுக்கப்பட வேண்டியது அவசியமானது எனவும் அவர் மேலும் குறிப்பிட்டுள்ளார்.

Comment (0) Hits: 31

2017 / 2018 இல் விநியோகிக்கப்பட்ட மதுபானசாலை அனுமதிப் பத்திரங்கள் குறித்து விசாரணை - மங்கள!

2017 மற்றும் 2018 ஆம் ஆண்டுகளில் மதுவரித் திணைக்களத்தினால் மதுபானசாலைகளுக்கான அனுமதிப்பத்திரங்கள், தனது அனுமதியின்றி எவ்வாறு வழங்கப்பட்டுள்ளன என்பது குறித்து, உடனடியாக விசாரணைகளை மேற்கொண்டு, இரண்டு வாரங்களுக்குள் அறிக்கையொன்றை சமர்ப்பிக்குமாறு நிதியமைச்சர் மங்கள சமரவீரவினால், மதுவரித் திணைக்களத்தின் ஆணையாளர் நாயகம் திரு.எச்.ஜி.சுமனசிங்கவுக்கு பணிப்புரை விடுக்கப்பட்டுள்ளது.

இந்த விடயம் தொடர்பில் நிதி அமைச்சு வெளியிட்டுள்ள ஊடக அறிக்கையில் கூறியிருப்பதாவது,

மதுவரித் திணைக்களத்தினால் இதுவரை பின்பற்றப்பட்ட நடைமுறைகளுக்கிணங்க, மதுவரி அனுமதிப்பத்திரம் விநியோகிக்கப்படும் ஒவ்வொரு சந்தர்ப்பத்திலும், விடயத்துக்குப் ​​பொறுப்பான அமைச்சரின் அனுமதியை பெற்றுக்கொண்டதன் பின்னர் அல்லது அமைச்சருக்கு அறிவித்ததன் பிற்பாடே அனுமதிப்பத்திரம் விநியோகிக்கப்படும்.

மதுவரித் திணைக்களத்தினால் 2017 இல் 10 புதிய மதுவரி அனுமதிப்பத்திரங்களும் 2018 இல் 74 அனுமதிப்பத்திரங்களும் வழங்கப்பட்டுள்ளன. இந்த அனுமதிப்பத்திரங்களுக்காக, மதுவரி ஒழுங்கு சட்டத்தில் குறிப்பிடப்பட்டுள்ள விதிகளின் படி, நிதி அமைச்சரின் அனுமதியை பெற்றுக்கொள்ளுதல் அல்லது அமைச்சருக்கு அறிவித்தல் போன்ற எந்தவொரு செயற்பாடுகளும் இடம்பெறவில்லை என்று தெரிவிக்கப்பட்டுள்ளது.

மதுவரி ஒழுங்குச் சட்டத்தின் கீழ், விடயத்துக்கு பொறுப்பான அமைச்சரினால், அவசியம் என்று கருதப்படும் சந்தர்ப்பத்தில் காரணத்தை அறிவிக்காமல் மதுவரி அனுமதிப்பத்தரம் ஒன்றை வழங்கவோ, புதுப்பிக்கவோ அல்லது இரத்துச் செய்யவோ அமைச்சருக்கு அதிகாரம் வழங்கப்பட்டுள்ளது.

2017 மற்றும் 2018 ஆம் ஆண்டுகளில் அமைச்சரின் அனுமதியின்றி இவ்வாறு வழங்கப்பட்ட மதுவரி அனுமதிப்பத்திரங்கள் குறித்து, நிதி அமைச்சர் மங்கள சமரவீரவின் உத்தரவின் பேரில் ஏற்கனவே விசாரணைகள் ஆரம்பிக்கப்பட்டுள்ளதாக மதுவரித் ஆணையாளர் நாயகம் திரு. எச்.ஜி.சுமனசிங்க தெரிவித்துள்ளார்.

புதிய மதுபான உற்பத்திச்சாலை அனுமதிப்பத்திரங்கள் எதுவும் வழங்கப்படவில்லை - மதுவரி ஆணையாளர் நாயகம்

மதுவரித் திணைக்களத்தினால் நான்கு புதிய மதுபான உற்பத்திச்சாலைக்கான அனுமதிப்பத்திரங்களை விநியோகிப்பதற்கு நடவடிக்கைகள் மேற்கொண்டுள்ளதாக சில இலத்திரனியல் மற்றும் அச்சு ஊடகங்களில் வெளியிடப்பட்ட அறிக்கை முற்றிலும் பொய்யானது. இந்த வருடத்தில் மதுவரித் திணைக்களத்தினால், மதுபான உற்பத்திச்சாலைக்கான அனுமதிப்பத்திரங்கள் எதுவும் விநியோகிக்கப்படவில்லை என மதுவரி ஆணையாளர் நாயகம் திரு.எச்.ஜி.சுமனசிங்க வலியுறுத்தியுள்ளார்.

Comment (0) Hits: 26

'அஷ்ரஃபின் ஆளுமைகளுக்குள் முஸ்லிம்களின் அபிலாஷைகள்' - சுஐப்.எம்.காசிம்!

முஸ்லிம்களின் தனித்துவ அரசியலுக்கு வழிகாட்டிய ஸ்தாபகத் தலைமையின் இழப்பிலிருந்து இன்றைய நாளில் (16) சில நினைவுகள் உயிர்ப்படைகின்றன.ஶ்ரீலங்கா முஸ்லிம் காங்கிரஸின் உதயம் இற்றைக்கு நான்கு தசாப்தங்களைத் தொட்டு நிற்கின்றது. நிறைவேற்று அதிகாரமுள்ள ஜனாதிபதிக்கான இரண்டாவது தேர்தலை இந்நாடு சந்திக்க நேர்ந்ததும்,இதற்கு ஓரிரு மாதங்களுக்கு முன்னர் 1988 ஆம் ஆண்டில் இணைந்த வட,கிழக்கு மாகாண சபையில் ஶ்ரீலங்கா முஸ்லிம் காங்கிரஸ் போட்டி யிட்டதும்,அஷ்ரஃபுக்கு அரசியலில் அதிஷ்டத்தை அள்ளிக்கொடுத்தது. இந்த அதிஷ்டம் முஸ்லிம் சமூகத்தின் அரசியல் அடையாளத்தை தேசியளவில், அங்கீகரிப்பதற்கான ஆணையையும் கொடுத்தி ருந்தது.எட்டாக்கனியாகவும், நிறைவேறாக் கனவாகவுமிருந்த பாராளுமன்றப் பதவிகளை, பாமரன் முதல் படித்தவர் வரை பகிர்ந்தளிப்பதற்கு,ஏற்ற சந்தர்ப்பமாக 1988 ஆம் ஆண்டின் இரண்டாவது ஜனாதிபதித் தேர்தலைப் பயன்படுத்திய ஆளுமையும் மர்ஹூம் அஷ்ரஃப்தான்.பாராளுமன்றத் தேர்வு க்கான 12 சத வீத வெட்டுப்புள்ளியை 05 சத வீதமாகக் குறைக்கும் யோசனைக்கு, அமரர் பிரேமதாசாவை இணங்க வைத்த மர்ஹூம் அஷ்ரஃப், சிறுபான்மை சமூகத்தின் வாக்குப்பலத்தை,தேசிய அரசியலில் பயன்படுத்திக் காட்டிய பெருமைக்குரியவர்.அற்ப ஆதாயங்களுக்காக,இனத்தின் பெயரையும்,சமூக அடையாளத்தையும் பெரும் தேசியக் கட்சிகளில் அடகு வைப்பதால் எதையும் சாதிக்க முடியாது என்பதையும், தனித்துவ அரசியலூடாக நிரூபித்த ஆளுமையும் அஷ்ரஃப்தான்.

சகோதர சமூகத்தின் நியாயமான போராட்டங்களைத் திசை திருப்பிக் கொச்சைப்படுத்தும், பிரித்தாளும் தந்திரங்களூடாக மற்றுமொரு சிறுபான்மையைத் தூண்டி, வாக்குகளைப் பெறும் பேரின அரசியலுக்குள் சிக்காமலும் முஸ்லிம்களை விழிப்பூட்டிய அஷ்ரஃபின் பார்வைகளை, இன்றைய தலைமைகள் பட்டை தீட்டிப்பார்க்க வேண்டும். அஞ்சியும் வாழாது, கெஞ்சியும் போகாதிருக்க மர்ஹும் அஷ்ரஃப் தேசிய அரசியல் களங்களை நாடிபிடித்துப் பார்ப்பதில் தோற்றதில்லை.1989,1994 ஆம் ஆண்டுகளில் நடந்த ஜனாபதித் தேர்தல்களில், அஷ்ரஃப் வகுத்த வியூகங்கள்,சிறுபான்மைக்குள் சிறுபான்மையினரான முஸ்லிம்களின் பேரம் பேசும் பலத்தை பாதுகாத்திருந்தது. வடக்கு,கிழக்கு மாகாணங்களில் இடம்பெற்ற போரியல் சூழல்கள் தமிழர்களின் அரசியற்பங்களிப்பைக் குறைத்திருந்ததால், முஸ்லிம் காங்கிரஸுக்கு இந்தப் பலம் கிடைத்ததென்பதையும் மர்ஹூம் அஷ்ரஃப் அறிந் தேயிருந்தார்.இதற்காகப் பேரம் பேசும் அரசியலில்
இருந்து சகோதர தமிழ் சமூகம் ஒதுங்கியிருப்பதை யும் அஷ்ரஃப் விரும்பில்லை.

தமிழர்களையும் சேர்த்து சிறுபான்மைச் சமூகங்களின் ஒட்டு மொத்த வாக்குகளின் திரட்சியையும் தக்க வைத்து, ஒரணியில் சேர்த்து, பெரும்பான்மையிடம் பேரம் பேசும் வியூகமும் அவரிடமிருந்தது.இந்தப் பணியையே அவரது தேசிய ஐக்கிய முன்னணி (நு ஆ) செய்யவிருந்தது.சந்திரிக்கா அரசின் பங்காளிக் கட்சியாக இருந்ததால் இந்தக் காலத்தில் முன்னெடுக்கப்பட்ட இராணுவ நடவடிக்கைகளுக்குத் துணைபோய் சிறுபான்மை அழிப்புக்கு வித்திட்ட ஒரு தவறான பார்வையும் மர்ஹூம் அஷ்ரஃபுக்கிருந்தது. சில அரசியல்வாதிகளின் ஓரக் கண்பார்வைகளும், ஶ்ரீலங்கா முஸ்லிம் காங்கிரஸின் வளர்ச்சியைப் பொறுக்க முடியாத மனவளர்ச்சி குன்றியோருமே இந்தப் பார்வையில் இருந்தனர்.

அமரர்களான சிவசிதம்பரம் நீலன் திருச்செல்வம், சம்பந்தன், உள்ளிட்ட மர்ஹூம் அஷ்ரஃப் ஏற்படுத்திக் கொண்ட உறவுகள்,வடக்கு,கிழக்கு சமூகங்களின் அரசியல் பிரச்சினைகளுக்கு பேரினவாதத்திலான திணித்தல் தீர்வும்,பயங்கரவாதத்தின் அச்சுறுத்தல் தீர்வும் அவசியமில்லை என்பதைக் காட்டியிருந்தன. மர்ஹும் அஷ்ரஃபின் தௌிவான நோக்குகள் மிதவாதப் போக்குள்ள தமிழ்,சிங்களத் தலைவர்களின் உறவுகளைப் பாதித்திருக்கவில்லை. மர்ஹூம் அஷ்ரஃபின்,அரசியல் வியூகங்கள் இன்றைய,என்றைய அரசியல் சூழ்நிலைகளுக்கும் இணங்கிச் செல்லுமா? என்ற கேள்விகளுக்கு இடம் வைத்ததுமில்லை.காலத்திற்கேற்ற வகையிலும் தென்னிலங்கை அரசியல் கள நிலவரங்களை நாடி பிடிப்பதிலும் மர்ஹும் அஷ்ரஃப் தோற்றிருந்தால் இந்தக் கேள்விகளுக்கு இடமிருந்திருக்கும்.

ஆனால், இன்று முஸ்லிம் தலைமைகளின் நிலைமைகள், சமூகத்துக்குப் பின்னாலும் அவர்களின் உணர்ச்சிகளுக்குக் கட்டுப்பட்டும் செல்ல வேண்டிய,பதற்றத் தையே ஏற்படுத்தியுள்ளது.சமூக வலைத்தளங்கள், நவீன தொடர்பாடல்களும் இவ்வாறான அரசியல் பதற்றங்கள் உருவாகக் காரணமாகின்றன. மர்ஹூம் அஷ்ரஃபின் காலத்தில் இவ்வாறான தொடர்பாடல்கள்,விழிப்புணர்வுகள் இருக்கவில்லை. இதனால் உணர்ச்சிவசப்படுவதிலிருந்து எமது சமூகம் தூரப்பட்டிருந்ததாகக் கருத முடியுமா? என்ற சிந்தனைகளும் உயிர்ப்படைகின்றன.இந்த உயிர்ப்படைதல்களிலிருந்து இன்றைய முஸ்லிம் தலைமைகள் விழிப்படைய வேண்டும். தென்னிலங்கை அரசியலை நாடி பிடிப்பது இன்று ஏற்பட்டுள்ள சூழலில் கடினமானதுதான்.இந்தக் கடினத்தில்தான் கவனம் தேவைப்படுகிறது.இது வரை அடையப்படாத முஸ்லிம் சமூகத்தின் உரிமைகளை,அபிலாஷைகளை வெல்லச் சாத்தியமான தென்னிலங்கை தலைமையை அடையாளம் காணல்,பெரும்பான்மைவாதம்,கடும்போக்கு, தாராண்மைவாதமாக நடித்துக் கொண்டு சிறுபான்மையை ஏப்பமிடும் முதலாளித்துவவாதம் உள்ளிட்ட சகலவற்றையும் அடையாளம் காண்பற்கான பணிகளை,அஷ்ரஃபின் பார்வைகள், பாசறைகளிலிருந்து கற்றுக்கொண்ட அனுபவங்களின் அடிப்படைகளில் வியூகங்கள் வகுக்கப்பட வேண்டும்.

Comment (0) Hits: 20

சு.கவின் சஜிதை நோக்கிய நகர்த்தலேன்..?

சு.கவானது மிக நீண்ட காலமாக இலங்கை அரசியலை தன் கைக்குள் சுருட்டி வைத்திருந்தது. அந்த கட்சியின் தற்போதைய நிலை யாவரும் அறிந்ததே! ஜனாதிபதியென்ற மிகப் பெரும் பதவியை தன்னகத்தே கொண்டிருந்தும் கவனிப்பாரற்று விடப்பட்டிருந்தது. இந் நிலையில் அதனுடைய வளர்ச்சிக்கு ஒரு வித்தியாசமான காய் நகர்த்தல் அவசியமாகும். சு.கவானது சஜிதை குறி வைத்தது இன்று நேற்றல்ல. கடந்த 52 நாள் ஆட்சி மாற்ற குழப்பத்தின் போது சஜிதை பிரதமராக்கும் நோக்கில் செயற்பட்டிருந்தமை குறிப்பிடத்தக்கது.
சு.கவுக்கும், ரணில் தலைமையிலான ஐ.தே.கவுக்குமிடையிலான உறவை ஒரு போதும் எதிர்பார்க்க முடியாது (சில வேளை சஜித் ஜனாதிபதி வேட்பாளராக களமிறங்கினால் ஒரு சிறிய உறவு ஏற்பட வாய்ப்புள்ளது.). சுதந்திர கட்சி தனித்து களமிறங்கி சவால் விடுக்குமளவு பலமிக்கதாகவும் இல்லை. சு.க விரும்பினாலும் சரி, விரும்பாவிட்டாலும் சரி, சு.கவுக்குள்ள தெரிவாக பொதுஜன பெரமுனவே இருக்கும். 
சு.கவுக்கும், பொதுஜன பெரமுனவுக்குமிடையில் சின்ன (மொட்டு, கை) வேறுபாடுகளின்று வேறு வேறுபாடுகளில்லை எனலாம். இவ்வாறான நிலையில் சு.கவானது மொட்டுவுடன் கை கோர்க்குமாக இருந்தால், அது சு.க ஆதரவாளர்களை மொட்டுவுடன் இணைப்பதற்கு வழிகோலும். அது மட்டுமின்றி பொதுஜன பெரமுன வெற்றி பெற்றால், அதுவே சு.கவின் அழிவுக்கு காரணமாக அமையும். இப்போதே சு.கவைச் சேர்ந்தவர்கள் ஒவ்வொன்றாக களன்று, மொட்டுவின் பக்கம் சென்று கொண்டிருக்கின்றனர். மொட்டு ஆட்சியும் அமைத்தால் சொல்லவா வேண்டும்? அது மாத்திரமல்ல... அவர்கள் ஓணான் விட்டு வெற்றிலை ஆயத் தேவையில்லையே? சு.கவினூடாக மொட்டுவதை ஆதரிப்பதை விட நேரடியாக ஆதரிக்கவே விரும்புவர். அதுவே இலாபமான வருமானத்தை பெற்றுக்கொடுக்கும். ஐ.தே.க வெற்றி பெறுவதானது சு.கவுக்கு எதிர்கால சவாலைத் தான் ஏற்படுத்தும் என்பது குறிப்பிடத்தக்கது. 
சு.க சஜிதை வேட்பாளராக்கிய கூட்டை அமைத்தால், அதன் பிரதான பாத்திரம் சு.கவிடம் காணப்படும். வழமை போன்று சு.க தேர்தல் களத்தில் வரிந்து கட்டிக்கொண்டு நிற்கும். இது தவிர்ந்து வேறு எந்த தீர்மானத்துக்கு சென்றாலும், சு.க இழிவான தோல்வியை சந்திக்க நேரிடும் அல்லது துணை பாத்திரம் ஏற்க வேண்டியிருக்கும். இதன் காரணமாக சு.கவில் தொடர்ந்து பயணிப்பதை பலரும் பரிசீலிக்க நேரிடலாம். தேசிய அரசியலில் துணை பாத்திரம் ஏந்தும் கட்சியின் பின்னால் செல்ல யாரும் விரும்பமாட்டார்கள். இத் தேர்தலை தொடர்ந்து பாராளுமன்ற தேர்தலும் வரும். இத் தேர்தலில் சு.க பிரதான பாத்திரமேற்காது போனால், இதிலுள்ளவர்களது அரசியல் வாழ்வு கேள்விக்குறியாகிவிடும்.
தற்போதைய ஜனாதிபதியை சு.கவின் சார்பில் ஜனாதிபதி வேட்பாளராக களமிறக்கினால் தோல்வி உறுதி செய்யப்பட்டது போன்றாகிவிடும். தற்போது சு.கவில் உள்ளவர்களில் நாடு பூராண செல்வாக்குள்ளவர்கள், பேசு பொருளானவர்கள் யாருமில்லை எனலாம். இந் நிலையில் மக்களிடையே பேசு பொருளாகவுள்ள சஜிதை களமிறக்கினால், சு.கவானது தனது நிலையை ஓரளவு உறுதி செய்து கொள்ளும். தங்களது பரம்பரை எதிரியான ஐ.தே.கவையும் பல கூறுகளாக சிதறச் செய்துவிடலாம். தன்னை நடு வீதியில் விட்டுச் சென்ற ரணில் தலைமையிலான ஐ.தே.கவையும் ஜனாதிபதி மைத்திரி பழி வாங்கிவிடுவார்.
சு.கவானது பலமிழந்துவிட்டதென்பதை மக்கள் உணராமல் தடுத்தல், சு.கவை அழிவிலிருந்து பாதுகாத்தல், ரணில் தலைமையிலான ஐ.தே.கவை சுக்கு நூறாக்கல் போன்ற பல்வேறு சிந்தனைகளின் விளைவே சஜிதை நோக்கிய திட்டமிடலாகும். சு.கவானது எதிர்வரும் ஜனாதிபதி தேர்தலில் தனித்து களமிறங்கினாலோ அல்லது அது கூட்டு சேர்ந்து களமிறங்கினாலோ, அது மொட்டுவின் வாக்கு வங்கியில் சிறிய தாக்கத்தை எற்படுத்தும். ஏனெனில், சு.க ஆதரவாளர்கள் மொட்டுவின் பக்கம் சாயும் இயல்புகொண்டவர்கள். 
துறையூர் ஏ.கே மிஸ்பாஹுல் ஹக்.
Comment (0) Hits: 38

'சிங்கள பௌத்த இராச்சியம்' - கோட்டாவுக்கு ஞானசார தேரரின் சயிட் சப்போர்ட்!

(VIDEO)

70 வீதமான சிங்களவர்களாகிய எம்மால் ஏன் ஜனாதிபதி ஒருவரை நியமித்துக்கொள்ள முடியாது? என பொதுபல சேனா அமைப்பின் பொதுச் செயலாளர் கலகொட அத்தே ஞானசார தேரர் கேள்வி எழுப்பியுள்ளதுடன் இது குறித்து அனைவரும் கவனம் செலுத்த வேண்டுமெனவும் கோரிக்கை விடுத்துள்ளார்.

பொதுபல சேனா இயக்கத்தின் இளைஞர் மாநாடு, நுகோகொடை ஆனந்த சமரக்கோன் திறந்தவெளி அரங்களில் நேற்று (14) இடம்பெற்றது. அந்த கூட்டத்தில் உரையாற்றிய போதே அவர் இதனைத் தெரிவித்துள்ளார்.

அங்கு தொடர்ந்து உரையாற்றிய அவர் கூறியதாவது,

"சிங்களவனை நாயாக நடத்தி, பெயரளவில் சிங்களவன் ஒருவன் அரியாசனம் ஏறுவதில் எவ்வித பலனும் கிடையாது. பௌத்த பிக்குகள், கட்சிகளின் சார்பில் தலைவர்களை தேடுவதனை விடுத்து, நாட்டை கட்டியெழுப்பக்கூடிய தேசிய தலைவர் ஒருவரை உருவாக்க வேண்டும்" என்றார்.

ஸ்ரீலங்கா பொதுஜன முன்னணியின் ஜனாதிபதி வேட்பாளர் கோத்தாபய ராஜபக்ஷவை "தேசிய வேட்பாளர்" என அறிவிக்கப்பட்டுள்ள நிலையில், ஞானசார தேரர் தேசிய தலைவர் பற்றி பேசியுள்ளது கவனிக்கப்பட வேண்டியதாகும்.

"கோத்தாபய ராஜபக்ஷ, இம்முறை தேர்தலில் தேசிய வேட்பாளராகவே போட்டியிடுகின்றார்" என அவரது பேச்சாளர் டலஸ் அழகப்பெரும, மாத்தறையில் நடைபெற்ற ஸ்ரீலங்கா பொதுஜன முன்னணியின் வர்த்தகர் சந்திப்பில் கூறியிருந்தார் என, கோத்தாபயவின் சிரேஸ்ட ஆலோசகர் திலித் ஜயவீர "அத தெரண" ஊடகத்தில் பதிவிட்டிருந்தார்.

எவ்வாறெனினும், பொதுபல சேனா இயக்கத்தின் பொதுச் செயலாளர் கீழ்வருமாறும் கருத்து வெளியிட்டிருந்தார்.

"எமது நாடும் இனமும் பௌத்த மதமும் பாரதூரமான அபாயங்கள் பலவற்றை எதிர்நோக்கி வரும் நிலையில், நுகேகொடை திறந்தவெளி அரங்கில் குழுமியிருக்கும் உங்களைப் பார்க்கும் போது, எனக்கு மிகுந்த பெருமிதமாக உள்ளது. அதேபோன்று உங்கள் முகங்களைப் பார்க்கும் போது சந்தோசமும் மெல்லிய கவலையும் இழையோடிச் செல்கின்றது. எமது தாய் நாட்டை பாதுகாத்துக்கொண்ட தலைமுறையினர் இன்னமும் உயிரோடிருக்கின்றார்கள் என்பது மகிழ்ச்சியளிக்கின்றது.

அன்று முதல் இன்று வரையில், இந்த நாடு எதிர்நோக்கியே பல்வேறு எதிரிகளின் சவால்களை உங்களைப் போன்றோரே வெற்றிகரமாக முறியடித்தனர். எமது இனத்தையும் நாட்டையும் பாதுகாத்த அந்த தலைமுறையை நினைத்துப் பார்க்கும் போதே பெருமிதமாக இருக்கின்றது.

இந்த உயிர்ப்புடைய எண்ணங்களைக்கொண்ட உங்களின் வதனங்களைப் பார்க்கும் போது, மெல்லிதாய் ஓர் சோகம் எனக்குள் படர்கின்றது. இந்த பலத்திற்கு வழிகாட்டக் கூடிய, எமது வயது வந்த தலைமுறையினர், எமது தேசிய தலைமைகள், கட்சி மற்றும் நிற அடிப்படையில் பிரிந்துள்ளனர். அரசியல் ரீதியாக குழுக்களாக பிரிந்து போட்டிப் போட்டுக்கொண்டு, அரசியல் முகாம்களின் அடிமைகளாகவே செயற்பட்டு வருகின்றனர் என்பதனை நினைக்கும் போது  ஒர் சோகம் எனக்குள் படர்வதனை தவிர்க்க முடியவில்லை.

ஒருபுறத்தில் உயிர்த்த ஞாயிறு தற்கொலைத் தாக்குதல் மூலம், பித்துப் பிடித்த இஸ்லாமிய அடிப்படைவாத நிழல் எமது சமூகத்தை ஆட்கொண்டுள்ளமை தெளிவாகின்றது. மறுபுறத்தில் எமது நாட்டில் மூன்று தசாப்தங்களாக நீடித்து வந்த இனவாத பிரிவிணைவாதம் மீண்டும் தலைதூக்கத் தொடங்கியுள்ளது.

மேலும், சீனா, அமெரிக்கா, இந்திய போன்ற உலகின் பலம்பொருந்திய நாடுகள் பல்வேறு பொறிகளில் எம்மை சிக்க வைத்து, எமது வளங்களை சூறையாடுவதற்கு சந்தர்ப்பம் பார்த்து காத்திருக்கின்றன.

இந்த அனைத்து ஆபத்துக்களுக்கு மத்தியிலும் தேசிய தலைவர் ஒருவரை உருவாக்குவதற்கு முனைப்பு காட்டாது, சேறு பூசல் அரசியலில் ஈடுபட்டுள்ளனர்.

போய்ப் பாருங்கள். உங்கள் கிராம் பிளவடைந்துள்ளது, விஹாரைகள் பிளவடைந்துள்ளன, உங்கள் நண்பர்கள் பிளவடைந்துள்ளனர். ஒரே அரசியல் கட்சிக்குள் நபர்களின் அடிப்படையில் பிளவடைந்துள்ளனர். எவ்வளவு பிரிய முடியுமோ அந்தளவில் பிளவடைந்துள்ளனர்.

இவ்வாறான ஓர் பின்னணியில், எமது இனம் பலவீனமடைவதும் ஏனைய எதிரி சக்திகள் வலுவடைவதும் ஆச்சரியப்படுவதற்கான ஏதுக்கள் கிடையாது.

எமது இனம், மதம், சமூகம் பாரிய சவால்களை எதிர்நோக்கி நிற்கும் இந்த தருணத்தில், இத்தணை பிளவுகள் பிரிவிணைகள் என்னை வேதனையடையச் செய்கின்றது.

சிங்கள இனத்தைப் பாதுகாத்துக் கொள்ளும் நோக்கில்,  இம்முறை பொதுபல சேனாவாகிய நாம், போட்டியில் களமிறங்க உள்ளோம்"  எனத் தெரிவித்துள்ளார்.

மேலும், தேசிய வேட்பாளர் ஒருவரை கட்டியெழுப்புவதற்கு கட்சி, சின்ன அரசியலுக்குள் வரையறை செய்துகொள்ளாது, அனைத்தையும் கைவிட்டு, அனைவரும் ஒன்றிணைந்துகொள்ள வேண்டுமென ஞானசார தேரர் பல தடவைகள் வலியுறுத்தியுள்ளார்.

“சிங்கள அரசாங்கத்தை பிளவடைந்திருந்துகொண்டு உருவாக்கிவிட முடியாது. இந்த தடவை நாம் எந்தவொரு தலைவரின் பின்னாலும் செல்லப்போவதில்லை. பணத்திற்காக செல்வதுமில்லை. நாம் ஏன் இப்படி கூறுகின்றோம் என்றால், எமது சின்னம் இன்றி போராட முடியாது என்று ஒரு கும்பல் கூறுகின்றது. அவர்களை விளக்கமாறினால் அடிக்க வேண்டும். 

நாம் ஒன்றை புரிந்துகொள்ள வேண்டும். இவர்களுக்கு முக்கியம் நாடா அல்லது சின்னமா? இவர்களுக்கு முக்கியம் கட்சியா? நாடா? இந்த நாட்களில் அது தெளிவாகத் தெரிகின்றது” என சுட்டிக்காட்டியுள்ளார்.

"கோத்தாபயவின் மலர்மொட்டு சின்னத்தினை ஏற்றுக்கொள்ள முடியாது" என சுதந்திரக் கட்சி கூறியிருக்கும் பின்புலத்தில், ஞானசார தேரர் இதனைத் தெரிவித்துள்ளார் என்பது குறிப்பிடத்தக்கது.

இவ்வாறு பல்வேறு சந்தர்ப்பங்களில் கோத்தாபய ராஜபக்ஷவை மறைமுகமாக ஆதரிக்கும் வகையில், பொதுபல சேனா இளைஞர் மாநாட்டில் ஞானசார தேரர் உரையாற்றியுள்ளமை குறிப்பிடத்தக்கது.

 

Comment (0) Hits: 45

"என்டர்பிரைஸ் ஸ்ரீலங்கா" நடமாடும் சேவை களுத்துறையில்!

"என்டர்பிரைஸ் ஸ்ரீலங்கா" வேலைத் திட்டத்தின் 5 வது நடமாடும் சேவை களுத்துறை மாவட்ட பொது விளையாட்டரங்கில் நேற்று (14) ஆரம்பமானது.

இந்த நடமாடும் சேவைக்காக நிதி அமைச்சின் கீழ் செயற்படும் நிறுவனங்கள் மற்றும் அரச வங்கிகள் தமது சேவைகளை வழங்குகின்றன.

வேலைத் திட்டம் தொடர்பிலான தெளிவை பெறவும், சேவைகளை பெற்றுக் கொள்வதற்காகவும் பெருந்திரளான மக்கள் வருகை தந்திருந்தனர்.

இந்த வேலைத் திட்டம் களுத்துறை மாவட்ட பாராளுமன்ற உறுப்பினர் லக்ஷ்மன் விஜயமான்னவினால் ஆரம்பித்து வைக்கப்பட்டது.

இந்த வேலைத் திட்டம் இன்றும் (15) இடம்பெறும்.

Comment (0) Hits: 18

தமிழ்த் தேசியக் கூட்டமைப்பை சந்திக்கும் சஜித்!

தமிழ் தேசிய கூட்டமைப்பிற்கும், அமைச்சர் சஜித் பிரேமதாஸவிற்கும் இடையில் முக்கிய கலந்துரையாடல் ஒன்று இடம்பெறவுள்ளது.
இன்றைய தினம் (15) இடம்பெற்றவுள்ள குறித்த கலந்துரையாடலில் ஜனாதிபதி வேட்பாளர் குறித்து பேசப்படும் என எதிர்பார்க்கப்படுகின்றது.
தமிழ் முற்போக்குக் கூட்டணியின் தலைவர் மனோ கணேசன் இது பற்றிய தகவலை வெளியிட்டுள்ளார்.
இதேவேளை, தமிழ் தேசிய கூட்டமைப்பிற்கும், பிரதமர் ரணில் விக்கிரமசிங்கவிற்கும் இடையில் முக்கிய கலந்துரையாடல் ஒன்று நடைபெறவுள்ளது.
எதிர்வரும் செவ்வாய்கிழமை மாலை 03.00 மணியளவில் அலரிமாளிகையில், இந்த கலந்துரையாடல் இடம்பெறவுள்ளதாக தகவல்கள் வெளியாகியுள்ளன.
ஜனாதிபதி தேர்தலில் ஐக்கிய தேசிய கட்சியின் சார்பில், ஜனாதிபதி வேட்பாளராக யாரை ஆதரிப்பது? என்பது குறித்து இதன்போது பேசப்படும் என எதிர்பார்க்கப்படுகின்றது.
 
Comment (0) Hits: 23

தாமரை கோபுர அங்குரார்ப்பண நிகழ்வு - முக்கிய புள்ளிகள் பங்கேற்பு!

தாமரை கோபுரத்தின் அங்குரார்ப்பண நிகழ்வில் ஜனாதிபதி மைத்திரிபால சிறிசேன, பிரதமர் ரணில் விக்ரமசிங்க மற்றும் எதிர்க்கட்சித் தலைவர் மஹிந்த ராஜபக்ஷ ஆகியோர் பங்கேற்கவுள்ளனர்.
நாளைய தினம் (16) தாமரைக் கோபுரத்தின் அங்குரார்ப்பண நிகழ்வு நடைபெறவுள்ளமை குறிப்பிடத்தக்கது.
350 மீற்றர் உயரமான தாமரைக் கோபுரத்தின் நிர்மாணப் பணிகள், முன்னாள் ஜனாதிபதி மஹிந்த ராஜபக்ஷ ஆட்சிக் காலத்தில் ஆரம்பிக்கப்பட்டன.
இந்த அபிவிருத்தித் திட்டத்திற்காக 100 மில்லியன் அமெரிக்க டொலர் செலவிடப்பட்டுள்ளது. சீனாவின் உதவியுடன் இந்த திட்டம் முன்னெடுக்கப்பட்டிருந்தது.
தொடர்பாடல் நடவடிக்கைகளை முன்னிலைப்படுத்தி, இந்த கோபுரம் அமைக்கப்பட்டுள்ளமை குறிப்பிடத்தக்கது.
 
Comment (0) Hits: 48

சு.க உறுப்பினர்கள் ஐவரின் கட்சி உறுப்புரிமை நீக்கம்!

பாராளுமன்ற உறுப்பினர்களான எஸ்.பி.திஸாநாயக்க, டிலான் பெரேரா, விஜித் விஜயமுனி சொய்சா, ஏ.எச்.எம்.பௌசி மற்றும் லக்ஷ்மன் யாபா அபேவர்தன ஆகியோரது கட்சி உறுப்புரிமை நீக்கப்பட்டுள்ளது.
சுதந்திர கட்சியின் மூலம் தேசிய பட்டியலினூடாக பாராளுமன்றத்திற்கு தெரிவு செய்யப்பட்ட ஐந்து நாடாளுமன்ற உறுப்பினர்களின் கட்சி உறுப்புரிமை இவ்வாறு இரத்து செய்யப்பட்டுள்ளது. 

இவர்களில் டிலான் பெரேரா, மற்றும் எஸ்.பி.திஸாநாயக்க ஆகியோர் அண்மையில் பொதுஜன பெரமுனவின் அங்கத்துவத்தைப் பெற்றிருந்தனர்.

அதனைத் தொடர்ந்து, சுதந்திர கட்சியின் பொதுச் செயலாளர் தயாசிறி ஜயசேகரவினால், மேற்குறிப்பிட்ட ஐந்து பேருக்கும் எதிராக ஒழுக்காற்று நடவடிக்கை தொடர்பில், கடிதம் அனுப்பி வைக்கப்பட்டிருந்தது.

ஸ்ரீலங்கா சுதந்திரக் கட்சியின் உறுப்புரிமை இரத்து செய்யப்பட்டமை குறித்து, நாடாளுமன்ற உறுப்பினர் எஸ்.பி.திஸாநாயக்க உள்ளிட்டவர்களுக்கு, எதிர்வரும் ஓரிரு தினங்களில் அதிகாரபூர்வமாக அறிவிக்கப்பட உள்ளதாக அவர்  தெரிவித்துள்ளார்.

 
 
Comment (0) Hits: 19

"ஐ.தே.மு தலைவர்களுடன் நடைபெற்ற பேச்சுவார்த்தை வெற்றி" - சஜித்!

ஐக்கிய தேசிய முன்னணியின் தலைவர்களுடன் நடைபெற்ற பேச்சுவார்த்தை மிகச் சிறந்த முறையில் வெற்றியளித்துள்ளது என ஐக்கிய தேசியக் கட்சியின் பிரதித் தலைவர் சஜித் பிரேமதாச தெரிவித்துள்ளார்.
 
அமைச்சர் மங்கள சமரவீரவின் இல்லத்தில் நேற்றைய தினம் (14) நடைபெற்ற சந்திப்பின் பின்னர் , ஊடகங்களிடம் அவர் இதனைக் குறிப்பிட்டுள்ளார்.
 
சம்பிக்க ரணவக்க, ரவூப் ஹக்கீம், ரிஷாட் பதியூதீன், மனோ கணேசன் மற்றும் பழனி திகாம்பரம் உள்ளிட்டவர்கள் நேற்றைய தினம் நடைபெற்ற சந்திப்பில் பங்கேற்றிருந்தனர்.
 
ஐக்கிய தேசியக் கட்சியின் ஜனாதிபதி வேட்பாளர் தொடர்பில், இந்தப் பேச்சுவார்த்தையில் விசேட கவனம் செலுத்தப்பட்டுள்ளது.
 
இந்த பேச்சுவார்த்தை பூரணமான வெற்றியை அளித்துள்ளதாக சஜித் பிரேமதாச ஊடகவியலாளர்களிடம் தெரிவித்துள்ளார்.
 
இதேவேளை, எதிர்வரும் செவ்வாய்க்கிழமை ஐக்கிய தேசிய முன்னணியின் ஜனாதிபதி வேட்பாளர் யார்? என்பதனை பிரதமர் ரணில் விக்ரமசிங்க அதிகாரபூர்வமாக அறிவிப்பார் என ஐக்கிய தேசிய முன்னணியின் தலைவர் ஒருவர் தெரிவித்துள்ளார்.
 
Comment (0) Hits: 42

"எவருக்கும் வாக்களிக்க விரும்பவில்லை" என்ற விடயத்தை வாக்குச் சீட்டில் உள்ளடக்குமாறு கோரிக்கை!

தேர்தலுக்கான வாக்குச் சீட்டுக்களில் எவருக்கும் வாக்களிக்க விரும்பவில்லை என்ற ஓர் விடயத்தை உள்ளடக்குமாறு கோரிக்கை விடுக்கப்பட்டுள்ளது.
வேட்பாளர்களின் பெயர்கள், சின்னங்களுடன் மேற்குறிப்பிட்ட எந்தவொரு கட்சிக்கோ சுயாதீனக் குழுவிற்கோ அல்லது வேட்பாளருக்கோ வாக்களிக்க விரும்பவில்லை என்பதனை குறிக்கும் ஓர் அம்சமமும் உள்ளடக்கப்பட வேண்டுமென கோரி மேன்முறையீட்டு நீதிமன்றில் வழக்குத் தாக்கல் செய்யப்பட்டுள்ளது.
ரஸ்யா, வடகொரியா, ஸ்பெய்ன், உக்ரேய்ன், பங்களாதேஷ், கொலம்பியான போன்ற நாடுகளில் இந்த நடைமுறை தற்பொழுது அமுலில் உள்ளது.
எந்தவொரு கட்சியையும் தெரிவு செய்ய விரும்பாதவர்களின் எண்ணிக்கை விபரங்கள் வெளியிடப்பட்டாலே அது பற்றிய ஓர் விழிப்புணர்வு ஏற்படும் என சுட்டிக்காட்டப்பட்டுள்ளது.
Comment (0) Hits: 19

ரணில் வீடு செல்கின்றார் -சஜித்துடன் போட்டியிடவில்லை!

நெருக்கடியான நிலைகளில் கட்சியை வழிநடத்திய தலைவர் என்ற ரீதியில் எதிர்வரும் ஜனாதிபதி தேர்தலில் வெற்றியீட்ட முடிந்தால் தேர்தலில் போட்டியிடுவதாகவும் இல்லாவிட்டால் அரசியலிலிருந்து ஓய்வு பெற்றுக் கொள்வதாகவும் பிரதமர் ரணில் விக்ரமசிங்க தெரிவித்துள்ளார்.
 
பியகம மற்றும் களனி ஆகிய தேர்தல் தொகுதிகளைச் சேர்ந்த கட்சியின் பழைய உறுப்பினர்களை சந்தித்த போது அவர் இதனைக் குறிப்பிட்டுள்ளார்.
 
70 வயது வரையில் அரசியலில் பல்வேறு பதவிகளை வகித்த தமக்கு ஓய்வு பெற்றுக்கொள்வது சிரமமான காரியமல்ல என அவர் சுட்டிக்காட்டியுள்ளார்.
 
இம்முறை ஜனாதிபதி வேட்பாளராக போட்டியிட சந்தர்ப்பம் கிடைக்காவிட்டால் அரசியலிலிருந்து ரணில் ஓய்வு பெற்றுக் கொள்வார் என வார இறுதி பத்திரிகையொன்று செய்தி வெளியிட்டுள்ளமை குறிப்பிடத்தக்கது.
 
ஐக்கிய தேசியக் கட்சியின் ஜனாதிபதி வேட்பாளர் தொடர்பில் செயற்குழு உறுப்பினர்கள் மற்றும் நாடாளுமன்ற உறுப்பினர்கள் கூடி வாக்கெடுப்பு நடத்தினால் கட்சி  இரண்டாக பிளவடையக் கூடிய சாத்தியங்கள் காணப்படுகின்றன.
 
இதனால் அவ்வாறான ஓர் வாக்கெடுப்பிற்கு இடமளிக்கப் படாது என ரணில் விக்ரமசிங்க தெரிவித்துள்ளார்.
 
இவ்வாறான நெருக்கடி நிலைமைகளின் போது இரகசிய வாக்கெடுப்பு நடத்தப்பட வேண்டும் எனவும் அதில் நாடாளுமன்ற உறுப்பினர்களுக்கு சந்தர்ப்பம் வழங்கக்கூடாது எனவும் ரணில் ஆதரவாளர்கள் கருத்து வெளியிட்டுள்ளதாக தெரிய வருகின்றது.
 
நாடாளுமன்றை பிரதிநிதித்துவம் செய்யும் ஐக்கிய தேசியக் கட்சியின் உறுப்பினர்களில் மூன்றில் இரண்டு பேர் சஜித்திற்கு ஆதரவாக செயற்பட்டு வருகின்றனர் என்பது குறிப்பிடத்தக்கது.
 
எவ்வாறெனினும் யார் தேர்தலில் போட்டியிட்டாலும் போட்டியிடாவிட்டாலும் தாம் ஜனாதிபதி தேர்தலில் போட்டியிடுவது உறுதி என சஜித் பிரேமதாச தெரிவித்துள்ளார்.
Comment (0) Hits: 51

சுஜீவ, அஜித் பெரேராவை கட்சியிலிருந்து இடைநிறுத்த தீர்மானம்!

அமைச்சரவை சாரா அமைச்சர்களான சுஜீவ சேனசிங்க மற்றும் அஜித் பீ பெரேரா ஆகியோர் ஐக்கிய தேசியக் கட்சியின் உறுப்புரிமையிலிருந்து இடைநிறுத்தப்பட உள்ளதாகத் தெரியவந்துள்ளது.
இந்த இரண்டு கட்சியின் உறுப்பினர்களையும் கட்சியிலிருந்து நீக்குவதற்கு கட்சியின் ஒழுக்காற்று குழு தீர்மானித்துள்ளது.
கட்சியின் தலைவரை மோசமாக விமர்சனம் செய்தமை, ஒழுக்க விதிகளை மீறியமை உள்ளிட்ட குற்றச்சாட்டுக்கள் இருவர் மீது சுமத்தப்பட்டுள்ளது.
மேலும், ஒழுக்காற்று விசாரணைகளில் பங்கேற்குமாறு விடுக்கப்பட்ட அறிவித்தலையும் இருவரும் இரண்டு தடவைகள் நிராகரித்துள்ளனர் என தெரிவிக்கப்படுகிறது.
Comment (0) Hits: 39

அமைச்சர் கபீரின் இணைப்புச் செயலரை கொலை செய்ய முயன்ற விவகாரம்: அடையாளம் காணப்பட்ட சஹ்ரான் குழுவின் ஆயுதப் பிரிவு தலைவன்

அமைச்சர் கபீர் ஹாஸிமின்  இணைப்புச் செயலர்களில் ஒருவரான மொஹம்மட் ராபிக் மொஹம்மட் தஸ்லீம் என்பவரை, மாவனெல்லை - தனாகம பகுதியில் உள்ள அவரது வீட்டில் வைத்து சுட்டுக் கொலை செய்ய முயன்ற விவகாரத்தில், பிரதான சந்தேக நபராக சி.ஐ.டி. விசாரணைகளில் வெளிப்படுத்தப்பட்ட , பயங்கரவாதி சஹ்ரான் குழுவின் ஆயுதப் பிரிவு பிரதனியாக கருதப்படும் மொஹம்மட் மில்ஹான் சாட்சியாளர்களால் அடையாளம் காணப்பட்டுள்ளார். 

மொஹம்மட் தஸ்லீம் மீது  கடந்த மார்ச் 9 ஆம் திகதி அதிகாலை உறக்கத்தில் இருந்த போது வீடு புகுந்து நடத்தப்பட்ட துப்பாக்கிச் சூட்டில் அவர் படுகாயமடைந்தார். 

இந் நிலையில்  அது குறித்து சி.ஐ.டி. விஷேட விசாரணைகளை ஆரம்பித்த நிலையில், 21/4 தாககுதலின் பின்னர் அக்கொலை முயற்சியின் மர்மங்கள் துலக்கப்பட்டன.

அதன்படி இந்த கொலை முயற்சி தொடர்பில், பிரதான சந்தேக நபர்களாக மூவரை அடையாளம் கண்ட சி.ஐ.டி., அந்த மூவரையும் நேற்று மாவனெல்லை நீதிவான் நீதிமன்றில் ஆஜர்ச் செய்து அடையாள அணிவகுப்புக்கு உட்படுத்தியது. 

இதன்போது இந்த கொலை முயற்சி சம்பவத்துக்கு தலைமை வகித்ததாக அடையாளம் காணப்பட்டுள்ள பயங்கரவாதி சஹ்ரான் குழுவின் ஆயுதப் பிரிவு பிரதனியாக கருதப்படும் மொஹம்மட் மில்ஹான், சஹ்ரானின் சாரதியான கபூர் மாமா எனப்படும் மொஹம்மட் சரீப் ஆதம் லெப்பை ஆகிய இருவரை சாட்சியாளர்கள் அடையாள அணிவகுப்பில் அடையாளம் காட்டியுள்ளனர்.  

இந் நிலையில் அடையாள அணிவகுப்புக்கு உட்படுத்தப்பட்ட குறித்த சம்பவம் தொடர்பிலான மூவரையும் மீளவும் மேலதிக விசாரணைகளுக்காக சி.ஐ.டி. தலைமையகமான நான்காம் மாடிக்கு அழைத்து வந்ததாக பொலிஸ் பேச்சாளர் பொலிஸ் அத்தியட்சர் ருவன் குணசேகர உறுதி செய்தார்.

முன்னதாக தொடர் தற்கொலை தாக்குதல்கள் தொடர்பில்  குற்றப்புலனாய்வுப் பிரிவினர் முன்னெடுத்த விஷேட விசாரணைகளின் போதே, அதுவரை தீர்க்கப்படாது இருந்த முக்கிய இரு குற்றங்களின் ஆதி அந்தம் கண்டறியப்பட்டது.  

தற்கொலை தககுதல்களின் சூத்திரதாரியாக கருதப்படும் மொஹம்மட் சஹ்ரானின் வாகன சாரதியாக  கடமையாற்றிய கபூர் மாமாவைக் கைது செய்து முன்னெடுத்த விசாரணைகளிலேயே இவை வெளிப்படுத்தப்பட்டிருந்தமையும் குறிப்பிடத்தக்கது.

Comment (0) Hits: 28

படையினரிடம் உள்ள காணிகள் - வடமாகாண ஆளுநர் அலுவலக அறிக்கை!

படைத்தரப்பு மற்றும் பொலிஸாரால் பயன்படுத்தப்படும் வடமாகாணத்தில் உள்ள தனியார் காணிகளை அடையாளம் கண்டு அவற்றை துரிதகதியில் மீள கையளிப்பதற்கான நடவடிக்கைகள் மேற்கொள்ளப்பட்டு வருவதாக வடமாகாண ஆளுநர் அலுவலகம் தெரிவித்துள்ளது.

இதுதொடர்பாக ஆளுநர் அலுவலகம் விடுத்துள்ள ஊடக அறிக்கை பின்வருமாறு :

ஊடக அறிக்கை

ஜனாதிபதி மைத்திரிபால சிறிசேனவின் துரிதப்படுத்தப்பட்ட திட்டத்தின் கீழ் வட மாகாண ஆளுநர் கலாநிதி சுரேன் ராகவனினால் படைத்தரப்பு மற்றும் பொலிஸாரால் பயன்படுத்தப்படும் வடமாகாணத்தில் உள்ள தனியார் காணிகளை அடையாளம் கண்டு அவற்றை துரிதகதியில் மீள கையளிப்பதற்கான நடவடிக்கைகள் மேற்கொள்ளப்பட்டு வருகின்றன.

ஏற்கனவே, ஆளுநரினால் யாழ். மாவட்டத்தில் உள்ள தனியார் காணிகளை அடையாளம் கண்டு அவற்றை துரிதகதியில் மீள கையளிப்பதற்கான நடவடிக்கைகள் மேற்கொள்ளப்பட்டு மீள் உரிமைகோரல் விண்ணப்பப்படிவங்கள் பொதுமக்களிடம் இருந்து சேகரிக்கப்படுக் கொண்டிருக்கின்றன.

இந்த திட்டத்தின் அடிப்படையில் அடுத்த கட்டமாக ஏனைய மாவட்டங்களிலும் முப்படையினர் மற்றும் பொலிஸார் நிலைகொண்டுள்ள தனியார் காணிகள் தொடர்பான விபரங்களை காணிகளின் உரித்தாளர்கள் அறியத்தருவதன் மூலம் அவர்கள் புலம்பெயர்ந்து வெளிநாடுகளில் வசிப்பவர்களாயின் அவர்களும் தமது காணிகளை அடையாளப்படுத்துமாறு கேட்டுக்கொள்கின்றோம்.

இதற்காக தயாரிக்கப்பட்ட விசேட விண்ணப்பப்படிவத்தை பூர்த்தி செய்து உரிமைகோரலுக்கான தகுந்த ஆதாரத்துடன் அல்லது தகுந்த விளக்கத்துடன் மீளப்பெற்றுக்கொள்வதற்கான நடவடிக்கையினை மேற்கொள்ளுமாறு காணி உரிமையாளர்களை கேட்டுக்கொள்கின்றோம்.

குறித்த விண்ணப்பப் படிவத்தினை ஆளுநர் செயலகம், மாவட்ட செயலகம் , பிரதேச செயலகம் மற்றும் வடமாகாண சபையின் np.gov.lk இணையத்தளத்திலும் பெற்றுக்கொள்ள முடியும்.

காணி உறுதியின் பிரதியுடன் பூர்த்தி செய்யப்பட்ட விண்ணப்பபடிவங்களை இணைத்து எதிர்வரும் செப்டம்பர் 20 ஆம் திகதிக்கு முன்னர் ´காணி கோரல் ´ வட மாகாண ஆளுநர் செயலகம், பழைய பூங்கா, சுண்டுக்குளி , யாழ்ப்பாணம் என்னும் முகவரிக்கு அனுப்பிவைக்குமாறு கேட்டுக்கொள்கின்றோம் என குறித்த ஊடக அறிக்கையில் தெரிவிக்கப்பட்டுள்ளது.

Comment (0) Hits: 17

புர்கா, நிகாப் தடையை நீக்க, இந்திய ம.ம.க. வலியுறுத்து!

அவசர கால சட்டம் நீக்கப்பட்டது போல முஸ்லிம் பெண்கள் அணியும் முகத்திரையான நிகாப் மற்றும் புர்காவுக்கான தடையும் நீக்க வேண்டுமென்று பிரதமர் ரணில் விக்கிரமசிங்கவிடம் மனிதநேய மக்கள் கட்சி தலைவர் பேராசிரியர் எம்.எச். ஜவாஹிருல்லா நேரில் வலியுறுத்தினார்.  

ஸ்ரீலங்கா முஸ்லிம் காங்கிரஸ் தலைவர் ரவூப் ஹக்கீமின் அழைப்பை ஏற்று இந்தியாவில் இருந்து வந்த தமிழகத்தைச் சேர்ந்த தமுமுக மற்றும் மனித நேய கட்சி தலைவர் பேராசிரியர் எம்.எச். ஜவாஹிருல்லா,  இந்திய யூனியன் முஸ்லிம் லீக்கின் தேசிய தலைவர் பேராசிரியர் கே.எம். காதர் மொகீதின், தி.மு.க. நாடாளுமன்ற குழுத் தலைவர் கனிமொழி, பாராளுமன்ற உறுப்பினர்கள் இ.டி. பஷீர், கே. நவாஸ்கானி, கடையநல்லூர் சட்டமன்ற உறுப்பினர் கே.ஏ.எம். முஹம்மது அபூபக்கர், முன்னாள் பாராளுமன்ற உறுப்பினர் எம். அப்துல் ரஹ்மான் உள்ளிட்ட 24பேர் நேற்று அலரி மாளிகையில் பிரதமர் ரணில் விக்கிரமசிங்கவைச் சந்தித்துப் பல்வேறு பிரச்சினை குறித்து பேசினார்கள்.  

இலங்கையில் முஸ்லிம்கள் ஒவ்வொருமுறை காயப்படுத்தும் பொழுதும் அவர்களின் காயங்களுக்கு மருந்து போடும் பணியையும் செய்து வந்துள்ளீர்கள். எதிர்வரும் ஜனாதிபதி தேர்தலில் இலங்கையின் முஸ்லிம் மக்களில் பெரும்பான்மையானவர்கள் ஐக்கிய தேசியக் கட்சிக்கே ஆதரவளிப்பார்கள் என்கிற நம்பிக்கை எங்களுக்கு உண்டு.கடந்த ஏப்ரல் மாதம் 21அன்று ஈஸ்டர் தினதன்று ஐ.எஸ் பயங்கரவாதிகளாகல் நடத்தப்பட்ட தற்கொலை தாக்குதலில் 250இற்கும் மேற்பட்ட அப்பாவி மக்கள் உயிரிழந்தனர். இந்தத் தாக்குதலைத் தொடர்ந்து இலங்கையில் முஸ்லிம் சமூகத்தையே சந்தேகக் கண் கொண்டு நோக்கும் நிலைமை உருவானதுடன், முஸ்லிம்களால் வெறுக்கப்படும் ஐ.எஸ் பயங்கரவாதிகள் தாக்குதல்களை மேற்கொண்டாலும் முஸ்லிம் சமூகத்தின் மீதே பழி சுமத்தப்பட்டது. இதனால் முஸ்லிம் சமூகம் முற்றாக மனம் உடைந்து பேரதிர்ச்சியில் அவர்கள் உறைந்து போயுள்ளனர்.

அவசர கால சட்டம் ஆகஸ்ட் 23 ஆம் தேதியுடன் நீக்கப்பட்டது போல முஸ்லிம் பெண்கள் அணியும் முகத்திரையான நிகாப் மற்றும் புர்காவுக்கான தடையும் நீக்க வேண்டும் என்று கேட்டுக் கொள்கிறேன்.

திருச்சி எம்.கே. ஷாகுல் ஹமீது

Comment (0) Hits: 13

சகலருக்கும் சமத்துவம், சுதந்திரம் வழங்குவதே உண்மை ஜனநாயகம்

உலக ஜனநாயக தினம் நாளை

ஜனநாயகத்தினை ஊக்குவிக்கும் முகமாகவும், மனித உரிமைகள் மற்றும் அடிப்படைச் சுதந்திரம் போன்றவற்றுக்குரிய கௌரவத்தை கொடுக்கும் முகமாகவும் ஐ.நா இந்நடவடிக்கையை மேற்கொண்டது.

இப்பொதுத் தீர்மானத்தை 192 உறுப்பு நாடுகள் அனுமதித்தன.மேலும், உலகளாவிய ரீதியில் எந்தவொரு தனிமனிதனும் தனது சொந்த அரசியல்,பொருளாதாரம், சமூக மற்றும் கலாசார நடவடிக்கைகளை தனது வாழ்நாளில் அனுபவிக்கும் உரிமை கொண்டவன் ஆகுமென்று பொதுச்சபைக் கூட்டத்தில் தெரிவிக்கப்பட்டுள்ளது.

சகல நாடுகளினதும் பிரதிநிதிகள், ஐ.நாவின் சகல அமைப்புகள், அரச அமைப்புகள், அரச சார்பற்ற நிறுவனங்கள் மற்றும் தனியார் அமைப்புகள் அனைத்தும் இத்தினத்தைக் கொண்டாட வேண்டுமென ஐ.நா கேட்டுள்ளது.

உலகில் காணப்படும் அரசியல் முறைக் கோட்பாடுகளுள் ஜனநாயகக் கோட்பாடும் ஒன்றாகும். பொதுவாக ஜனநாயகம் என்பது மக்களாட்சியைக் குறிக்கும்."மக்களாட்சி என்பது பலருடைய அரசாங்கம்" என்று கிரேக்க அறிஞர் பிளேட்டோ வரைவிலக்கணப்படுத்தினார். அரிஸ்​ேடாட்டில் "மக்களாட்சி ஏழ்மை நிலையிலுள்ளோர் தங்களுக்காக நடத்தும் ஆட்சி" என்று கூறினார்.

பொதுவாக ஒரு நாட்டின் மக்கள், தங்களின் கருத்துகளைத் தேர்தலின் மூலம் பதிவு செய்து, தங்கள் பிரதிநிதிளைத் தேர்ந்தெடுப்பர். தேர்ந்தெடுக்கப்பட்ட பிரதிநிதிகள் தனிக்கட்சியாகவோ அல்லது

ஏனைய கட்சிகளுடன் கூட்டணியாகவோ ஆட்சி செய்வர். எனவே மக்களால் தேர்ந்தெடுக்கப்பட்ட பிரதிநிதிகள் மக்களுக்காகவே ஆட்சி செய்ய வேண்டும்.மக்களின் தேவை அறிந்து மக்களுக்கு சேவையாற்ற வேண்டும். ஆகவே இங்கு மக்கள் பிரதிநிதி என்பவர் மக்கள் சேவகர்.

கோட்பாட்டு ரீதியாக இந்த விளக்கம் அழகாகக் காணப்பட்டாலும் கூட, ஆட்சிக்கு வரும் வரை மக்கள் சேவகர்களாக காட்டிக் கொள்ளும் இவர்கள், ஆட்சிக்கு வந்தவுடன் மாறி விடுவது பொதுவாக ஜனநாயக நாடுகளில் காணக் கூடிய நடைமுறை நிலைமையாகும்.

உலகத்தில் பல பகுதிகளிலும் உள்ள அரசியல் கோட்பாடுகளில் மக்களாட்சி என்பது ஒரு சிறந்த ஆட்சிமுறை என்று பலராலும் ஏற்றுக்கொள்ளப்பட்டு நடைமுறைப்படுத்தப்பட்டுள்ளது. ஜனநாயகம் எனும் மக்களாட்சி முறை சுமார் 2500 ஆண்டுகளுக்கு முன்னர் உலகில் தோன்றி மறைந்து, அதன் பின் 2000 ஆண்டுகள் கழித்து மறுபடியும் உருவாகி, 20 ஆம் நூற்றாண்டில் பலமான ஓர் ஆட்சிமுறையாக உலகெங்கிலும் உருவானது.

இதனை மேலும் தெளிவுபடுத்துவதாயின் பழங்கால கிரேக்க,ரோமானிய அரசுகளில் மக்களாட்சி கொள்கை பின்பற்றப்பட்டது. இடைக்காலத்தில் மக்களாட்சி முறையில் சில இடர்பாடுகள் ஏற்பட்டன. ஆனால் அமெரிக்க சுதந்திரப் போர், பிரான்சியப் புரட்சி, ரஷ்யப் புரட்சி போன்றவற்றால் மன்னராட்சிக்கு மாற்றாக மக்களாட்சி என்ற புரட்சிக் கருத்திற்கு செயல்வடிவம் கொடுக்கப்பட்டது. அதனடிப்படையில் மக்களாட்சி முறை பல நாடுகளில் ஏற்பட்டது.

ஜனநாயக ஆட்சியில் முக்கிய இரண்டு அம்சங்கள் காணப்படுகின்றன. அவை சமத்துவம், சுதந்திரம் என்பனவாகும்.இங்கு சமத்துவம் எனும் போது இது விரிவான விளக்கப்பரப்பைக் கொண்ட போதிலும் கூட சுருக்கமாக 'உரிமைகளைப் பொறுத்தமட்டில் எல்லோரும் சமம்' என்பதையே எடுத்துக் காட்டுகின்றது.

அமெரிக்க சுதந்திரப் பிரகடனத்தில் பின்வருமாறு குறிப்பிடப்பட்டுள்ளது. 'சகலரும் சம உரிமைகளுடன் படைக்கப்பட்டுள்ளனர் என்பதை ஒப்புக் கொள்கிறோம்'.

1789இல் பிரான்சின் உரிமைப் பிரகடனம் பின்வருமாறு கூறுகின்றது. 'மனிதன் பிறந்தது முதல் இறக்கும் வரை சம உரிமைகளை உடையவன்.

மக்களாட்சியில் குறிப்பிட்ட வர்க்கமோ அல்லது வர்க்கங்களோ முதன்மையானதாக கருதப்படுவதில்லை. அதேநேரத்தில், மக்களாட்சி நிர்வாகத்தில் பெரும்பாலானோரின் கருத்துகள் ஏற்றுக் கொள்ளப்படுவதோடு சிறுபான்மையினரின் உரிமைகளுக்கு மதிப்பளித்தாக வேண்டும். ஜனநாயகத்தில் இறுதியான அதிகாரம் மக்களிடமே உள்ளது.

ஒரு மனிதன், சட்டத்துக்கு உட்பட்டு, அவனது வளர்ச்சிக்கு அவசியமானது எனக் கருதுபவற்றை மற்றவர்களுக்கு எவ்வித பாதிப்புமின்றி செய்வதற்கான உரிமை சுதந்திரமாகும். இதில் அரசியல், பொருளாதார, சமய சுதந்திரம் ஆகியவை அடங்கும். மக்களாட்சியில் கருத்துச்

சுதந்திரம் ஒவ்வொருவக்கும் உண்டு என்பதால் சகிப்புத் தன்மையும் அவசியம். சகிப்புத் தன்மையில்லாவிட்டால் ஜனநாயகம் தோற்றுவிடும். இங்கு சட்டத்தின் முன் அனைவரும் சமம்.

Comment (0) Hits: 15

தமிழ் மக்களின் அரசியல் தீர்வில் இந்தியாவின் தலையீடே முக்கியம் - சுமந்திரன்!

தமிழ் மக்களின் தீர்வு விடயத்தில் சர்வதேச நாடுகளின் ஒத்துழைப்புகள் கிடைத்தாலும் இந்தியாவின் பங்களிப்பு இதில் மாறுபட்ட ஒன்றாகும் எனத் தெரிவித்த தமிழ் தேசிய கூட்டமைப்பின் ஊடகப்பேச்சாளரும் பாராளுமன்ற உறுப்பினருமான எம்.எ.சுமந்திரன், தமிழ் மக்களுக்கு எவ்வாறான தீர்வு கிடைக்கவேண்டும் என்பதில் இந்தியாவே ஆரோக்கியமான சிந்திக்கின்றது என்றும் கூறினார்.

அமெரிக்கா உள்ளிட்ட சர்வதேச நாடுகளும் தமிழ் மக்களுக்கான தீர்வுகளை பெற்றுக்கொடுப்பதில் கவனம் செலுத்துவதாகவும் அவர் சுட்டிக்காட்டினார்.

தமிழ் மக்களின் அரசியல் தீர்வுகள், அதில் சர்வதேசத்தின் பங்களிப்பு குறித்து கருத்து தெரிவிக்கும் போதே அவர் இதனைக் குறிப்பிட்டார்

Comment (0) Hits: 28

Page 3 of 82