V2025

செய்திகள்

போலியான தேர்தல் முடிவுகள்; மொட்டுக் கட்சியினரின் போலிப் பிரசாரம் ஆரம்பம்!

தேர்தல் ஆணையகத்தினால் உத்தியோகபூர்வமான தேர்தல் முடிவுகள் இதுவரையில் அறிவிக்கப்படாத நிலையில்,  உத்தியோகபூர்வமற்ற தேர்தல் முடிவுகள் தற்பொழுது சமூகவலைத்தளங்களில் பரப்பப்பட்டு வருகின்றன.
 
மொட்டுக் கட்சியின் ஆதரவாளர்களினால் பரப்பப்படும் இவ்வாறான போலி தேர்தல் முடிவுகளில்  எவ்வித உண்மைத் தன்மையும் இல்லை. அத்துடன், மக்களை திசை திருப்பும் நோக்கிலும், தேர்தல் பணிகளிலும் வாக்கு என்னும் கடமைகளிலும்  ஈடுபட்டிருப்போரை அச்சுறுத்தும் வகையில் கோட்டாவின் ஆதரவாளர்களினால் இவ்வாறன முறைகேடான நடவடிக்கைகள் மேற்கொள்ளப்பட்டுள்ளதாக தெரிய வருகினறது.
 
எவ்வாறாயினும் இரண்டு இலட்சம் வாக்கு வித்தியாசத்தினால் சஜித் பிரேமதாச வெற்றி பெறுவார் என நம்பத் தகுந்த வட்டாரங்களில் இருந்து தெரிய வருகின்றது. 
 
இலங்கையின் 07ஆவது நிறைவேற்றதிகாரம் கொண்ட ஜனாதிபதியை தெரிவு செய்வதற்காக தேர்தலுக்கான வாக்களிப்பு நடவடிக்கைகள் இன்று (16) காலை 7 மணிக்கு ஆரம்பமான நிலையில் 5 மணிக்கு நிறைவடைந்தன.
 
இம்முறை ஜானதிபதி தேர்தலில் நாடு முழுவதும் அண்ணளவாக 80 % வாக்கு பதிவு செய்யப்பட்டுள்ளமை குறிப்பிடத்தக்கது.
 
Comment (0) Hits: 715

'தேர்தல் கருத்துக்கணிப்பு: அரச புலனாய்வு சேவை தகவல் பொய்' - பொலிஸ் தலைமையகம்!

அரச புலனாய்வு சேவை பிரிவினால் வெளியிடப்பட்டுள்ளதாக சமூக வலைத்தளங்களில் பரவும் அறிக்கையை நிராகரிப்பதாக பொலிஸ் தலைமையகம் அறிவித்துள்ளது.

கடந்த 05 ஆம் திகதி அரச புலனாய்வு திணைக்களத்தினால், ஜனாதிபதிக்கு வழங்கப்பட்ட அரச புலனாய்வு அறிக்கை என்ற பேரிலேயே, இந்த அறிக்கை சமூக வலைத்தளங்கள் வாயிலாக பரப்பப்பட்டுள்ளது.    

இந்த அறிக்கை உண்மைக்கு புறம்பானது என பொலிஸ் ஊடகப் பேச்சாளர் ருவன் குணசேகர தெரிவித்துள்ளார்.

இது குறித்து தொடர்ந்து கருத்து தெரிவித்த அவர்,

"ஜனாதிபதி தேர்தலின் வெற்றியாளர் யார்? என்பது தொடர்பில் புலனாய்வு பிரிவு கருத்துக் கணிப்பு மேற்கொண்டதாக போலியான தகவல்கள் வெளியாகி உள்ளன.

அரசாங்க புலனாய்வு திணைக்களம், இலங்கை பொலிஸ் திணைக்களம் இவ்வாறான கருத்துக் கணிப்புக்களை மேற்கொள்வதில்லை" எனவும் சுட்டிக்காட்டியுள்ளார்.

ஜனாதிபதி தேர்தல் சுதந்திரமாகவும் சுமுகமான முறையிலும் நடைபெற வேண்டும் என்பதனால் பாதுகாப்பான சூழல் ஒன்றை உருவாக்குவதற்கு பொலிஸார் முழுமையான அவதானத்தை செலுத்தியுள்ளனர்.

இவ்வாறான போலி கடிதம் தயாரித்து, சமூக வலைத்தளத்தில் வெளியிடும் நபர்கள் தொடர்பில் ஆராய்ந்து, சட்ட ரீதியான நடவடிக்கை மேற்கொள்ள நடவடிக்கை எடுத்துள்ளதாக பொலிஸ் ஊடக பேச்சாளர் ருவண் குணசேகர மேலும் தெரிவித்துள்ளார்.

Comment (0) Hits: 323

உங்கள் வாக்கை சரியாக பயன்படுத்துவது எவ்வாறு?

இலங்கையின் எட்டாவது ஜனாதிபதியைத் தெரிவு செய்வதற்கான தேர்தல் நாளை நடைபெறப் போகின்றது. இத்தேர்தலை எதிர்கொள்ள நாடு தயாராகி விட்டது. தேர்தலுக்கான அனைத்து ஏற்பாடுகளும் தயார் நிலையில் உள்ளன.

நிறைவேற்று அதிகாரம் கொண்ட ஜனாதிபதி முறைமை 19வது அரசியல் சட்டத் திருத்தத்தின்படி நெகிழ்வு கண்டிருந்தாலும் அது இன்னும் வாதப்பிரதிவாதங்களை ஏற்படுத்திக் கொண்டே இருக்கின்றது. சில வேளைகளில் உயர்நீதிமன்றம் தலையிட வேண்டியும் இருப்பதை கடந்த காலங்களில் காண முடிந்தது.

எனவே, இன்னும் எமது நாட்டில் ஜனாதிபதிப் பதவி என்பது அதிகாரம் மிகுந்ததாகவே நோக்கப்படுகின்றது.

நிறைவேற்று அதிகாரம் கொண்ட ஜனாதிபதி முறைமை 1978ஆம் ஆண்டில் செயல் வடிவம் பெற்றது.

ஆனாலும், ஜனாதிபதித் தேர்தல் முதன் முறையாக 1982இலேயே இடம்பெற்றது. இதில் ஜே.ஆர் ஜயவர்தனா வெற்றியீட்டி மீண்டும் ஜனாதிபதியானார். இரண்டாவது ஜனாதிபதித் தேர்தல் 1988ஆம் ஆண்டு நடந்தது. இத்தேர்தலில் போட்டியிட்ட ரணசிங்க பிரேமதாச  வெற்றி ஈட்டினார்.  மலையக சமூகமும் இத்தேர்தலில் அவருக்கு ஆதரவாக வாக்களித்தமை குறிப்பிடத்தக்கது.

இவரை எதிர்த்துப் போட்டியிட்ட ஸ்ரீமாவோ பண்டாரநாயக்க தோல்வியடைந்தார். மூன்றாவது ஜனாதிபதித் தோதலில் (1994) 62.28வீத வாக்குகளைப் பெற்று சந்திரிகா குமாரதுங்க அமோக வெற்றியீட்டினார். இதுவே இற்றைவரை இடம் பெற்ற ஜனாதிபதித் தேர்தல்களில் ஒரு வேட்பாளர் பெற்ற ஆகக் கூடிய சதவீதமாகும்.

2005இல் இடம்பெற்ற ஜனாதிபதித் தேர்தலில் அனைத்து மலையக மக்களும் வாக்களிக்கும் உரிமை பெற்றிருந்தார்கள். இத்தேர்தலில் மஹிந்த ராஜபக்ஷவும் ரணில் விக்கிரமசிங்கவும் மோதிக் கொண்டார்கள். வென்றவர் மஹிந்த ராஜபக்ஷ. ஆனால் நுவரெலியா மாவட்டத்தைப் பொறுத்தவரை அவர் பெற்ற வாக்குகள் 1,47210. ஆகும்.  ரணில் விக்கிரமசிங்க 1,52836வாக்குகளைப் பெற்றிருந்தார். எனினும் வடக்குத் தமிழர்கள் தேர்தலில் வாக்களிக்காமல் புலிகளால் தடுக்கப்பட்டதால் ரணில் வெற்றி வாய்ப்பை இழந்தார்.

2010இல் மீண்டும் ஜனாதிபதித் தேர்தலில் களம் இறங்கிய மஹிந்தவுக்கு எதிராக  சரத் பொன்சேகா போட்டியிட்டு தோல்வியடைந்தார்.

அதன் பின்னர் 2015தேர்தலில் மஹிந்த தோல்வியடைந்து மைத்திரிபால ஜனாதிபதியானார்.

நாளை மீண்டும் ஜனாதிபதித் தேர்தல் நடைபெறவிருக்கிறது. இம்முறை ஜனாதிபதித் தேர்தலில்  ஒரு கோடி 59இலட்சம் பேர் வரை வாக்களிக்கும் தகுதி பெறுகின்றனர். 2017ம் ஆண்டு பெறப்பட்ட விண்ணப்பங்களின் அடிப்படையிலேயே வாக்காளர் இடாப்பு திருத்தப்பட்டு இத்தேர்தல் நடைபெறுகின்றது.

இத்தேர்தலில் முதன் முறையாக வாக்களிக்கும் வாய்ப்புப் பெற்றுள்ளேர் தொகை 9இலட்சம் ஆகும். இனரீதியாக கிடைக்கப் பெறும் வாக்குகளும் மிதக்கும் வாக்குகளும் இத்தேர்தலில் தீர்க்கமானவையாக அமையப் போகின்றன என்பதே அரசியல் அவதானிகளின் கருத்தாக இருக்கின்றது.

மொத்த வாக்குகளில் 15இலட்சம் வாக்குகள் மலையக மக்களின் வாக்குகளாகக் காணப்படுகின்றன.  இரு வேட்பாளர்கள்தான் இங்கு கவனத்துக்கு உரியவர்களாக இருக்கின்றார்கள். இவர்கள் இருவரில் யாரோ ஒருவர்தான் தெரிவு செய்யப்பட இருக்கிறார்.

இத்தேர்தலுக்காக பயன்படும் வாக்குச் சீட்டின் நீளம் 26அங்குலமாகும். தேர்தல் வரலாற்றில் முதன் முறையாகவே இவ்வளவு நீளமான வாக்குச் சீட்டு பயன்படுத்தப்படுவது குறிப்பிடத்தக்கது.

இதில் 35வேட்பாளர்களது பெயர் மற்றும் சின்னங்கள் பொறிக்கப்பட்டிருக்கும். இதனால் உடனடியாக தமது விருப்புக்குரியவரைத் தெரிந்து புள்ளடி இடுவது சற்று தாமதமான காரியமாகவே இருக்கும். குறிப்பாக மலையக மக்கள் குழப்பமடைய நேரிடலாம்.

எனினும் சிறுபான்மைச் சமூகங்களுக்கு இத்தேர்தல் முக்கியத்துவம் வாய்ந்ததாக இருப்பதால் வாக்களிப்பது சம்பந்தமான சில விபரங்களைக் கருத்திலும் கவனத்திலும் கொள்ள வேணடியது அவசியமாகின்றது.

வாக்காளர் அட்டைகள் அநேகமாக இந்நேரம் வாக்காளர்களின் கரங்களுக்கு வந்து சேர்ந்திருக்கும். பெருந்தோட்டப் பகுதிகளுக்கு வாக்காளர் அட்டைகள் உரிய காலத்தில் விநியோகிக்கப்படுவது இல்லை என்பது நெடுநாளைய குற்றச்சாட்டு ஆகும். இம்முறையும் அக்குற்றச்சாட்டு கடந்த வாரம் தெரிவிக்கப்பட்டது. இதற்காக தொழிலாளர்களை அலைகழிக்கச் செய்த சம்பவங்களும் இடம்பெற்றுள்ளன.

 வாக்காளர் அட்டைகள் கிடைக்கப் பெறாதவர்கள் கவலைப்படத் தேவையில்லை. உங்கள் ஆள் அடையாளத்தை உறுதிப்படுத்தும் ஏதாவது ஒரு ஆவணத்தை எடுத்துக் கொண்டு வாக்களிப்பு நிலையங்களுக்குப் போகத் தவறாதீர்கள். வாக்காளர் இடாப்பில் உங்கள் பெயர் இருக்குமாயின் வாக்காளர் அட்டை இல்லாவிட்டாலும் நீங்கள் வாக்களிக்க அனுமதிக்கப்படுவீர்கள் என்று தேர்தல்கள் திணைக்களம் கூறியிருக்கின்றது.

 உங்களிடம் தேசிய அடையாள அட்டைஇல்லை என்றால் கடவுச் சீட்டு (பாஸ்போட்), சாரதி அனுமதிப் பத்திரம் (லைசன்ஸ்),ஓய்வூதிய அட்டை (பென்சன் கார்ட்), முதியோர் அடையாள அட்டை, தேர்தல் திணைக்களத்தால் விநியோகிக்கப்பட்ட தற்காலிக அடையாள அட்டை போன்றவற்றில் ஏதாவது ஒன்றை எடுத்துச் சென்று வாக்கினைப் பதிவு செய்ய முடியும்.

இவை தவிர எந்தப் பத்திரங்களும் ஏற்றுக் கொள்ளப்பட மாட்டது என்பதை மறந்து விடாதீர்கள்.

அத்துடன் ஜனாதிபதித் தேர்தலில் எப்படி வாக்களிக்க வேண்டும் என்பதை நன்கு விளங்கிக் கொள்வது அவசியமாகின்றது. இது ஒன்றும் சிரமமான காரியம் அல்ல. ஆனால் இம்முறை 35வேட்பாளர்கள் போட்டியிடும் நிலையில், அவர்களின் பெயர்களையோ சின்னங்களையோ கண்டுபிடிப்பதில் தடுமாற்றம் எழுவது இயல்பே ஆகும். இதற்கு வழமையை விட நேரம் எடுக்க வேண்டி நேரிடலாம்.

இதற்காகவே இதுவரை காலமும் காலை 7மணி முதல் மாலை 4மணிவரை இடம்பெற்ற வாக்களிப்பு நடைமுறை இத்தடவை மாலை 5மணிவரை நீடிக்கப்படுள்ளது. அதாவது 1மணிநேர அதிகரிப்பு வழங்கப்பட்டிருக்கின்றது. இதைப் பயன்படுத்தி நிதானத்தைக் கடைப்பிடித்து உங்கள் விருப்பத்துக்குரிய வேட்பாளரின் சின்னத்தைக் கண்டறிந்து புள்ளடி இடுவதே புத்திசாலித்தனம்.

ஒவ்வொரு வேட்பாளரின் பெயர் மற்றும் சின்னம் பொறிக்கப்பட்டுள்ள கோட்டிற்கு எதிரே இருக்கும் கூட்டில் புள்ளடி இட  ​வேண்டும். இதற்காக உங்களது விருப்புக்குரிய வேட்பாளரது சின்னத்தை நன்றாக மனதில் பதிய வைத்துக் கொள்வது முக்கியம்.இப்படி ஒரு வேட்பாளரை மட்டும் அடையாளப்படுத்தி வாக்குச் சீட்டைப் பெட்டியில் போட்டால் அவருக்கு உங்கள் வாக்கு உறுதியாகி விடும்.ஆனால் ஜனாதிபதித் தேர்தலில் 2ஆம், 3ஆம் வேட்பாளர் தெரிவுகளுக்கும் இடமிருக்கின்றது.

2015ஆம் ஆண்டு இடம்பெற்ற ஜனாதிபதித் தேர்தலில் நிராகரிக்கப்பட்ட வாக்குகளின் எண்ணிக்கை 140,925ஆகும். இவற்றில் அதிகமான வாக்குகள் மலையகத்திலிருந்து நிராகரிக்கப்பட்டவை என்பதை ஞாபகத்தில் வைத்துக் கொள்ள  வேண்டும். வாக்குச் சீட்டில் குறிப்பிட்ட வேட்பாளருக்கு புள்ளடி அல்லது ஒன்று(1) என்னும் அடையாளம் இடலாம். விருப்பு வாக்கு பயன்படுத்த வேண்டுமாயின் வேட்பாளர்களின் பெயர், சின்னத்துக்கு எதிரே உள்ள கூட்டில்  இலக்கங்கள் மட்டுமே எழுதப்பட்டிருக்க வேண்டும். இதனை விடுத்து வேறு ஏதும் எழுதப்பட்டிருக்குமானல் அது நிச்சயம் செல்லுபடியாகாத வாக்காகவே கொள்ளப்படும்.

வேட்பாளர் ஒருவர் தெரிவு செய்யப்பட 50வீதத்துக்கு அதிகமான வாக்குகளைப் பெற வேண்டியுள்ளது. வாக்குகள் கணக்கெடுப்பின் போது 50உம் மேலதிக வாக்கும் பெறும் வேட்பாளரே வெற்றி பெறுவராக இருப்பார். எந்தவொரு வேட்பாளரும் 50வீதத்துக்கு அதிகமான வாக்குகளைப் பெற முடியாது போகுமானால் மட்டுமே 2ஆம், 3ஆம் தெரிவுகள் கணக்கில் எடுக்கப்படும்.

வாக்குச் சீட்டில் வேட்பாளரின் பெயரைத் தேடிக் கொண்டிருப்பதை விட அந்த வேட்பாளர் போட்டியிடும் சின்னத்தை மட்டும் ஞாபகம் வைத்துக் கொண்டு வாக்களிப்பது இலகுவாக இருக்கும். 

வரலாற்றிலேயே மிக முக்கியமானதொரு தேர்தலாக இந்த ஜனாதிபதித் தேர்தல் அமைந்துள்ளது. எனவே மக்கள் தெளிவுடன் தமது பங்களிப்பை வழங்க வேண்டியுள்ளது.  தமக்கான ஜனநாயக கடமையைப் புறக்கணிப்பது தவறு. அதை ஏனோதானோவென்று பயன்படுத்துவது புத்சாலித்தனம் ஆகாது. வேட்பாளர்களது கடுமையான போட்டிகளுக்கு இடையில் நடைபெறும் இத்தேர்தல் சிறுபான்மை இனங்களுக்கு சவால் மிக்கதாகவே காணப்படுகின்றது.

இதை மனதில் வைத்துக் கொண்டு நாளை நேரகாலத்தோடு வாக்களிப்பு நிலையங்களுக்குச் செல்லுங்கள். உங்கள் ஆளடையாளத்தை உறுதி செய்யும் ஆவணத்தை மட்டும் மறந்து விடாதீர்கள். வாக்குச் சீட்டு கைக்கு வந்ததும் உங்களை அறியாமலே பதற்றம் ஏற்படலாம். சமாளித்துக் கொள்ளுங்கள். ஞாபத்தில் வைத்துக் கொண்டுள்ள வேட்பாளரது சின்னத்துக்கு எதிரே உள்ள கூட்டில் புள்ளடி இடுங்கள். வாக்குச் சீட்டை மடித்து வாக்குப் பெட்டியில் இடுங்கள். உங்களது ஜனநாயக கடமையை உரிய முறையில் நிறைவேற்றிய திருப்தியோடு வீடு திரும்புங்கள்.

தேவையற்ற வாக்குவாதங்கள், கருத்து மோதல்கள் அவசியமற்றவையாகும். தேர்தலில் உங்களுக்கு ஜனநாயக உரிமை உள்ளது. நீங்கள் விரும்பும் எவருக்கும் ஆதரவளிக்கும் உரிமை உங்களுக்கு உண்டு.அந்த உரிமை அந்தரங்கமானது. ஏனையோரிடம் பகிர்ந்து கொள்ள வேண்டிய அவசியமில்லை.

சாரங்கன்...

Comment (0) Hits: 241

'வாக்களிப்பதற்காக இலட்சக்கணக்கான இலங்கையர்கள் வெளிநாடுகளிலிருந்து வருகை' - உண்மை இதோ! (VIDEO)

(VIDEO)

ஜனாதிபதி தேர்தலில் போட்டியிடும் வேட்பாளர் ஒருவருக்கு வாக்களிப்பதற்காக வெளிநாடுகளில் தொழில் புரியும் நான்கு இலட்சத்திற்கும் மேற்பட்ட இலங்கையர்களும், இரட்டை குடியுரிமை பெற்ற ஆயிரக்கணக்கானவர்களும் இலங்கை வந்துள்ளதாக கூறி, சம்பந்தப்பட்ட வேட்பாளரின் ஆதரவாளர்கள் சமூக வலைத்தளங்களில் பெரிய பிரச்சாரத்தை முன்னெடுத்துள்ளனர்.

தேர்தல் சட்டங்களை மீறி இந்த பிரச்சாரங்கள் முன்னெடுக்கப்படுவதாக குற்றம் சுமத்தப்பட்டுள்ளது.

இதுகுறித்து தேசிய ரூபவாஹினி தொலைக்காட்சி எழுப்பிய கேள்விக்கு பதிலளித்த குடிவரவு மற்றும் குடியகல்வு திணைக்களத்தின் சிரேஷ்ட அதிகாரி ஒருவர் பின்வருமாறு பதிலளித்துள்ளார்.

"2010 நவம்பர் முதலாம் திகதி முதல் 11ஆம் திகதி இலங்கையின் இரட்டை குடியுரிமை பெற்றவர்களில் 809 பேரே இலங்கைக்கு வந்துள்ளதாக குடிவரவு மற்றும் குடியகல்வு திணைக்களத்தின் புள்ளிவிபரங்கள் தெரிவிகின்றன.

2018ஆம் ஆண்டு இதே காலப்பகுதியில் இலங்கையின் இரட்டை குடியுரிமை பெற்ற 723 பேரே இலங்கை வந்திருந்தனர்.

அதேவேளை, 2019ஆம் ஆண்டு நவம்பர் முதலாம் திகதி முதல் 11ஆம் திகதி வரை வெளிநாடுகளில் தொழில் புரிவோரில் 39,553 இலங்கையர்களே நாடு திரும்பியுள்ளனர். கடந்த ஆண்டு இதே காலப்பகுதியில் 38,325 பேர் நாடு திரும்பியிருந்தனர்" எனவும் அந்த அதிகாரி கூறியுள்ளார்.

Comment (0) Hits: 217

லசந்த படுகொலை; மகள் அமெரிக்க நீதிமன்றில் மேன்முறையீடு!

படுகொலை செய்யப்பட்ட  சண்டே டைம்ஸ் பத்திரிகை ஆசிரியர் லசந்த விக்ரமதுங்கவின் மகள் அஹிம்சா விக்ரமதுங்கவும் அவருடைய சட்டத்தரணிகள் குழுவும் நேற்று அமெரிக்க நீதிமன்றத்தில் மேன்முறையீட்டை செய்துள்ளனர்.

தமது தந்தை கொலை செய்யப்பட்டமை தொடர்பில் ஏற்கனவே வழக்கு தாக்கல் செய்யப்பட்டபோதும், சந்தேகநபர் வெளிநாட்டு அதிகாரி என்ற ராஜதந்திர வரப்பிரசாதத்தை முன்வைத்து, வழக்கை நீதிமன்றம் தள்ளுபடி செய்தது.

எனினும், இந்த தள்ளுபடி தீர்ப்பை ஏற்றுக்கொள்ளமுடியாது என்றும் மனித உரிமை மீறல் குற்றச்சாட்டுக்கள் தொடர்பில், சந்தேகநபருக்கு எதிரான வழக்கை விசாரணைக்கு எடுக்க வேண்டும் என்று கோரியே, அஹிம்சா மீண்டும் மேன்முறையீடு செய்துள்ளார்.

 
Comment (0) Hits: 316

புதிய ஜனாதிபதியால் நாடாளுமன்றத்தை கலைக்க முடியாது!

நாடாளுமன்றத்தின் பதவிக்காலம் 2020ஆம் ஆண்டு ஆகஸ்ட் மாதம் வரை இருப்பதாகவும் சட்டரீதியாக 2020ஆம் ஆண்டு பெப்ரவரி மாதமே நாடாளுமன்றத்தை கலைக்க முடியும் எனவும் கலாநிதி குமுது குசும்குமார தெரிவித்துள்ளார்.

இது குறித்து அவர் மேலும் கருத்து தெரிவிக்கையில்,

எந்த ஜனாதிபதியாக இருந்தாலும் தனக்கு சார்பான அரசாங்கத்தை அமைக்க முயற்சிப்பது சாதாரணமானது. 19ஆவது அரசியலமைப்புத் திருத்தச் சட்டத்தின் கீழ், ஜனாதிபதியின் அதிகாரங்கள் வரையறுக்கப்பட்டிருந்தாலும் அரசாங்கத்தின் பிரதானியாக ஜனாதிபதி செயற்படுவார்.

முப்படைகளுக்கு கட்டளையிடுவது, அமைச்சுக்களின் செயலாளர்களை நியமிப்பது போன்ற அதிகாரங்கள் ஜனாதிபதிக்கு உள்ளன. நாட்டின் நிர்வாக கட்டமைப்பில் அமைச்சுக்களின் செயலாளர்களுக்கு அதிகமான அதிகாரங்கள் இருப்பதால், அடுத்த ஜனாதிபதி பெயரளவிலான ஜனாதிபதியாக இருக்க மாட்டார்.

சுயாதீனமாக சிந்தித்து நாளைய தினம் வாக்களிக்க வேண்டியது அனைத்து பிரஜைகளின் கடமை. அத்துடன் மிகவும் அமைதியான முறையில் வாக்களிக்க வேண்டும் எனவும் அதிகாலையிலேயே வாக்குச் சாவடிகளுக்கு சென்று வாக்களிக்குமாறும் அவர் குறிப்பிட்டுள்ளார்.

 
Comment (0) Hits: 250

'கோதுமை மாவின் விலை அதிகரிக்கப்படவில்லை' - ரிஷாட்!

கோதுமை மாவின் விலை அதிகரிக்கப்படவோ அல்லது ஏதேனும் மாற்றங்களுக்கு உட்படுத்தப்படவோ இல்லை என கைத்தொழில், வர்த்தக அமைச்சர் ரிஷாட் பதியுதீன் தெரிவித்துள்ளார்.

எமது நாடு மிகவும் முக்கியமானதும், நெருக்கடியானதுமான தேர்தலொன்றுக்குத் தயாராகிக்கொண்டிருக்கும் தருணத்தில், கோதுமை மாவின் விலையை அதிகரிப்பதென்பது திட்டமிடப்பட்ட சதி என்பதுடன், அது அரசாங்கத்திற்குப் பாதிப்பை ஏற்படுத்தும் நோக்கத்தில் செய்யப்படுவதுமாகும் என அவர் மேலும் சுட்டிக்காட்டியுள்ளார்.

நுகர்வோர் விவகார  அதிகார சபையின் அனுமதியின்றி கோதுமை மாவின் விலை அதிகரிக்கப்பட்டிருப்பதாக செய்திகள் வெளியானதைத் தொடர்ந்தே, அமைச்சர் மேற்கண்டவாறு தெரிவித்துள்ளார். 

தொடர்ந்து கருத்து தெரிவித்த அவர்,

"உரிய அமைச்சு மற்றும் அதிகாரசபைகளின் அனுமதியின்றி, சட்டவிரோதமான முறையில் இவ்வாறான விலை அதிகரிப்பில் கோதுமை மா வழங்குனர்கள் எவரேனும் தொடர்புபட்டிருப்பின், அவர்களுக்கு எதிராக சட்ட நடவடிக்கை எடுக்கப்படும்" என்றார். 

சட்டவிரோதமாக விலையதிகரிப்பைச் செய்வதனூடாக நுகர்வோருக்கு அசௌகரியத்தை ஏற்படுத்துவோர் தொடர்பில் கண்காணிக்குமாறு, அவர் கடந்த 11 ஆம் திகதி நுகர்வோர் அலுவல்கள் அதிகாரசபைக்கு அறிவுறுத்தியிருக்கிறார்.

இதேவேளை, இத்தகைய சட்டவிரோத செயற்பாடுகளின் ஈடுபடுவோருக்கு 2003 ஆம் ஆண்டு 60 ஆம் பிரிவின் 9 ஆம் இலக்கச் சட்டத்தின் கீழ், ஒருவருட  சிறைத்தண்டனை விதிக்கப்பட முடியும் என்பதுடன், 5000 - 50,000 ரூபா தண்டப்பணம் அறவிடப்பட முடியும் என்பது குறிப்பிடத்தக்கது.

 
Comment (0) Hits: 206

'கோதுமை மாவின் விலை அதிகரிக்கப்படமாட்டாது; போலி செய்திகளை நம்பி ஏமாற வேண்டாம்' - மங்கள! (video)

கோதுமை மாவின் விலையை அதிகரிக்க எந்த நிறுவனத்திற்கும் அனுமதி வழங்கப்படவில்லை என  நுகர்வோர் விவகார அதிகார சபை தெரிவித்துள்ளது.

அத்தோடு, அனுமதியின்றி கோதுமை மாவின் விலையைஅதிகரித்தால் சட்ட நடவடிக்கை எடுக்கப்படும் எனவும் அச்சபை வலியுறுத்தியுள்ளது.

இதேவேளை, அமைச்சரவையினால் நியமிக்கப்பட்ட வாழ்க்கை செலவுக் குழு மற்றும் நுகர்வோர் விவகார அதிகார சபையின் அனுமதி இல்லாமல் கோதுமை மாவின் விலையை அதிகரிக்க முடியாது என நிதியமைச்சர் மங்கள சமரவீர தெரிவித்த்துள்ளார்.

அவ்வாறு ஒருசில ஊடக நிறுவனங்கள் வழமை போன்று, மேற்கொண்டுள்ள பொய்  பிரசாரங்களில் எவ்வித உண்மையும் இல்லையெனவும் அமைச்சர் சுட்டிக்காட்டியுள்ளார்.

தனது டுவிட்டர் பக்கத்தில் இட்டுள்ள பதிவிலேயே அவர் இதனை கூறியுள்ளார்.

Man

இது சட்டவிரோத நடவடிக்கை. கோதுமை மாவின் விலை 8.50 ரூபாவால் அதிகரிக்கப்பட்டுள்ளதாக சமூக வலைத்தளங்களில் பொய்ப் பிரச்சாரம் மேற்கொள்ளப்பட்டுள்ளதாக தெரிவித்த அவர், இந்த விடயம் தொடர்பில், தேர்தல்கள் ஆணைக்குழுவில் முறைப்பாடு செய்துள்ளதாகவும் கூறினார். 

Comment (0) Hits: 226

ஊடக நிறுவனம் ஒன்றின் மீது தாக்குதல் - விமலை விசாரிக்க வேண்டும்!

ஸ்ரீலங்கா பொதுஜன பெரமுன வேட்பாளர் கோட்டாபய ராஜபக்ஷவுக்கு எதிரான ஊடக நிறுவனம் ஒன்றின் மீது தாக்குதலை மேற்கொண்டு அதன் பொறுப்பை தமது அணிமீது  சுமத்துவதற்கான முயற்சியில் எதிர்தரப்பு ஈடுபட்டுள்ளதாக பாராளுமன்ற உறுப்பினர் விமல் விரவங்ச கூறியுள்ளார்.  

பொதுஜன பெரமுன ஏற்பாடு செய்திருந்த ஊடகவியலாளர் சந்திப்பின் போது அவர் இதனைத் தெரிவித்துள்ளார்.

ஸ்ரீலங்கா பொதுஜன பெரமுன இந்நாட்களில், சில நேரங்களில் ஒரு நாளைக்கு பல தடவைகள் ஊடகவியலாளர் சந்திப்புக்களை நடாத்தி நாட்டிற்கு கூறுவது அந்த கட்சியின் ஜனாதிபதி வேட்பாளர் கோட்டாபய ராஜபக்ஸவுக்கு எதிராக பல்வேறு பிரசார மற்றும் ஏனைய சதிகளையும் எதிர்தரப்பினர் செயற்படுத்தி வருகின்றார்கள் என்றேயாகும்.

உயிர்த்த ஞாயிறு தாக்குதலுக்கு கோட்டாபய பொறுப்புக் கூற வேண்டும் எனத் தெரிவிக்கும் வீடியோ ஒன்று தயாரிக்கப்படுவதாகவும், அது வெளியிடுவதற்கு தயாராக உள்ளதாகவும் பொதுஜன பெரமுனவின் பிரதிநிதிகள் இதற்கு முன்னர் எதிர்த்தரப்பினரின் செயற்பாடுகள் தொடர்பில் எதிர்வுகூறல்களைத் தெரிவித்து கூறியிருந்தனர்.

இந்த எதிர்வு கூறல்கள் தொடர்பில் சரியான உறுதியான தகவல்கள் இருக்குமாயின் ஊடகவியலாளர் சந்திப்பினை நடாத்துவதை விட மொட்டு கட்சியினர் பொலிஸ் நிலையத்திலும், தேர்தல் ஆணைக்குழுவிடத்திலும் அல்லது தேர்தல் கண்காணிப்பு குழுவிடத்தில் முறைப்பாடு செய்திருக்கலாம்.

விமல் வீரவங்சவின் இந்தக் குற்றச்சாட்டு எனில் சேறுபூசும் வீடியோவை விட கடுமையான குற்றச்சாட்டாகும். தாக்குதல் மேற்கொள்ளப்படப் போகின்றது எனக் கூறுவது ஊடக நிறுவனம் ஒன்றின் மீதாகும். ஊடக நிறுவனத்திற்கோ அல்லது வேறு எந்த இடத்திற்கும் தாக்குதலை மேற்கொள்வது படு மோசமான செயற்பாடாகும்.

இந்தக் குற்றத்தைப் பற்றி விமல் வீரவங்சவுக்குத் தெரிந்த தகவல்களை உடனடியாக பொலிஸாருக்கு வழங்க வேண்டும். பொலிஸாரும் உடனடியாக இது தொடர்பில் அவரிடம் விசாரிக்க வேண்டும். அவ்வாறானதொரு குற்றம் இடம்பெற உள்ளதாயின் அதனைத் தடுப்பதற்கு நடவடிக்கை மேற்கொள்ள வேண்டும்.

விமல் வீரவங்க தெரிவித்திருப்பது தாக்குதல் எனக் கூறி நாட்டில் தீயை மூட்டுவதாயின் அது தொடர்பிலும் பொலிஸார் அவருக்கு எதிராக நடவடிக்கை மேற்கொள்ள வேண்டும்.

Comment (0) Hits: 332

ஜனாதிபதி தேர்தல் : “தேர்தல் சட்டங்களை மீறியது ஊடகங்களும், சமயத் தலைவர்களுமாகும்”

இலங்கை தேர்தல் வரலாற்றில் இம்முறை நடைபெறும் ஜனாதிபதி தேர்தல் சிறப்புமிக்கதாக அமைவது தேர்தல் கால வன்முறைகள் மிகக் குறைந்த மட்டத்தில்  இடம்பெற்றிருப்பதன் காரணத்தினாலாகும்.

பெப்ரல் அமைப்பு 2019ம் ஆண்டு செப்டெம்பர் 27ம் திகதியிலிருந்து நவம்பர் 13ம் திகதி மாலை 4.30 மணி வரையிலான தேர்தல் பிரசார காலம் தொடர்பில் வெளியிட்டுள்ள அறிக்கைக்கு அமைய எவ்வித கொலைச் சம்பவங்களும் இடம்பெறவில்லை.

இதற்கு மேலாக கடுமையான வன்முறைச் சம்பவங்களுடன் தொடர்புடைய சட்டங்களை மீறியமை தொடர்பான 68 சம்பவங்கள் மாத்திரமே இடம்பெற்றுள்ளது. அவற்றுள் கடுமையான தாக்குதல் சம்பவங்கள் இடம்பெற்றிருப்பது 15 மாத்திரமேயாகும்.

அந்த அறிக்கை கீழே தரப்பட்டுள்ளது.

Paffral1

இதற்கு முன்னர் இடம்பெற்ற ஜனாதிபதி தேர்தல்களோடு ஒப்பிடும் போது இம்முறை தேர்தல் கால வன்முறைச் சம்பவங்கள் குறிப்பிடக் கூடிய வகையில் குறைந்துள்ளதை அவதானிக்க முடிவதாக பெப்ரல் அமைப்பின் நிறைவேற்றுப் பணிப்பாளர் ரோஹன ஹெட்டியாராச்சி பீபீசி சிங்கள சேவையிடம் கூறியுள்ளார்.

Comment (0) Hits: 255

'பேப்பர் ஒன்றைக் காட்டினார்கள். நாம் ஏற்றுக் கொள்ளவில்லை” - தேர்தல்கள் ஆணைக்குழுவின தலைவர்!

தனது பிரஜா உரிமை தொடர்பான சான்றிதழ் எனக் கூறி கோத்தாபய ராஜபக்ஷ தேர்தல்கள் திணைக்களத்தில் பேப்பர் ஒன்றைக் காட்டியது உண்மையே என்றாலும், அதில் அடங்கியிருந்த விடயங்களின் உண்மைத்தன்மை தொடர்பில் ஆணைக்குழு அக்கரை காட்டவில்லை என தோ்தல்கள் திணைக்களத்தின் தலைவர் மஹிந்த தேசப்பிரிய கூறினார்.

கோத்தாபய ராஜபக்ஷவின் அமெரிக்க குடியுரிமை விலக்கிக் கொள்ளப்பட்ட சான்றிதழ் தேர்தல்கள் திணைக்களத்திற்கு காட்டப்பட்டுள்ளது என்றும், அதனை தேர்தல்கள் திணைக்களம் ஏற்றுக் கொண்டுள்ளது என்றும் ஜனாதிபதி சட்டத்தரணி அலி சப்ரி சில தினங்களுக்கு முன்னர் ஊடக சந்திப்பொன்றில் கூறிய கருத்து தொடர்பில் கேட்ட போதே தேர்தல்கள் ஆணைக்குழுவின் தலைவர் இதனைத் தெரிவித்தார்.

கடந்த ஆகஸ்ட் மாதத்தில் கோத்தாபய ராஜபக்ஷ, சட்டத்தரணி அலி சப்ரி மற்றும் மற்றொரு சட்டத்தரணியும் தேர்தல்கள் ஆணைக்குழுவிற்கு வருகை தந்திருந்ததாகவும், அதன் போது குடியுரிமை தொடர்பில் கோத்தாபய ராஜபக்ஷ கூறியதாகவும், அவர் ஒரு பேப்பரைக் காட்டிய போதிலும் அதனை ஏற்றுக் கொள்வது அல்லது பெற்றுக் கொள்வதை ஆணைக்குழுவினால் மேற்கொள்ளப்படவில்லை என்றும், அந்தப் பேப்பர் தொடர்பில் ஆர்வத்தைக் காட்டவில்லை என்றும் தேர்தல்கள் ஆணைக்குழுவின் தலைவர் இதன் போது கூறினார்.

Comment (0) Hits: 332

MCC ஒப்பந்தம்; போலியான செய்திகளால் அமெரிக்கா கவலை!

அமெரிக்காவின் மில்லேனியம் சவால் ஒத்துழைப்பு (MCC) ஒப்பந்தம் தொடர்பில் உண்மைக்கு முரணான போலி செய்திகள் இலங்கையில் காணப்படுவதையிட்டு அமெரிக்கா கவலை தெரிவித்துள்ளது.

குறிப்பாக ஹெய்டி நாட்டில் மில்லேனியம் சவால் திட்டங்கள் நடைமுறைப்படுத்தப்பட்டுள்ளதாகவும் தவறான செய்திகள் பரப்பப்படுகின்றது. அவ்வாறனதொரு அமெரிக்க திட்டம் ஹெய்டியில் கிடையாது எனவும் குறிப்பிட்டுள்ளது.

இதேவேளை, மில்லேனியம் சவால்கள் ஒப்பந்தத்தில் காணப்படுகின்ற சில முக்கிய திட்டங்கள் குறித்தும் அமெரிக்க தூதரகம் விளக்கியுள்ளது.

Comment (0) Hits: 228

Dr.ஷாபியினால் கருத்தடை சிகிச்சை செய்ததாக கூறப்பட்ட பெண் கர்ப்பம்!

குருநாகல் போதனா வைத்தியசாலையின் மருத்துவர் மொஹமட் சிஹாப்தீன் ஷாபி நான்காயிரம் சிங்கள பெண்களுக்கு கருத்தடை சத்திர சிகிச்சைகளை செய்துள்ளதாக கூறி, கடந்த காலங்களில் இனவாத நாடகத்தை அரங்கேற்றிய பேராசிரியர் சன்ன ஜயசுமண, அத்துரலியே ரதன தேரர் ஆகியோர் தற்போது அமைதியாக இருந்து வருகின்றனர்.

ஜனாதிபதித் தேர்தல் அறிவிக்கப்பட்ட பின்னர், ராஜபக்ஷவினரின் அச்சுறுத்தல் மற்றும் கண்டிப்புகள் காரணமாக சஹ்ரான் மற்றும் ஷாபி போன்றோர் பற்றி பேசாமல் அமைதியாக இருப்பதாக சன்ன ஜயசுமண தெரிவித்திருந்தார்.

சிங்கள மக்களின் வாக்குகளை பெற்றுக்கொள்ள, முஸ்லிம்களுக்கு எதிராக இனவாதத்தை பரப்பிய ராஜபக்ஷவினர் மற்றும் அவர்களின் முகாமைச் சேர்ந்த ஜயசுமண மற்றும் ரதன தேரர் போன்றவர்கள், சுயவிருப்பில் அல்லது ராஜபக்ஷவினரின் அச்சுறுத்தல் காரணமாகவோ அமைதியாக இருந்து வருகின்றனர்.

சன்ன ஜயசுமண, பொதுஜன பெரமுன மற்றும் வியத் மக மேடைகளில் முன்வரிசையை பெற்றுக்கொள்ளவும், எப்படியாவது நாடாளுமன்றத்திற்கு செல்ல வேண்டும் என்பதற்காகவும் கடும் போராட்டத்தில் ஈடுபட்டுள்ளார். இதனால், அவர்களால் ஷாபி மற்றும் சஹ்ரான்கள் பற்றி பேச நேரமில்லை.

மருத்துவர் ஷாபி நான்காயிரம் சிங்கள பெண்களுக்கு கருத்தடை சத்திர சிகிச்சை செய்துள்ளதாக பொலிஸாருக்கு முறைப்பாடுகள் கிடைத்ததுடன், அது குறித்து குற்றப்புலனாய்வு திணைக்களம் விசாரணைகளை நடத்தியது.

மருத்துவர் ஷாபி, கருத்தடை சத்திர சிகிச்சையை செய்துள்ளாரா? என்பதை மருத்துவ ரீதியில் உறுதிப்படுத்த அந்த பெண்களை மருத்துவப் பரிசோதனைக்கு வருமாறு கோரிக்கை விடுக்கப்பட்டதுடன், அந்த பெண்கள் எவரும் பரிசோதனைக்கு முன்வரவில்லை.

இந்த நிலையில், கருத்தடை சத்திர சிகிச்சைக்கு உள்ளடக்கப்பட்டதாக முறைப்பாடு செய்த பெண்களில் ஒருவர் கர்ப்பமடைந்துள்ளார். இந்த பெண் மருத்துவப் பரிசோதனை மூலம் இதனை உறுதிப்படுத்தியுள்ளார்.

இது சம்பந்தமான பரிசோதனை அறிக்கைகளின் பிரதிகள், குற்றப் புலனாய்வு திணைக்களத்திற்கு அனுப்பி வைக்கப்பட்டுள்ளது.

பேராசிரியர் சன்ன ஜயசுமண மற்றும் ரதன தேரர் ஆகியோர் இந்த பெண்கள் கருத்தடை சத்திர சிகிச்சைக்கு உள்ளாக்கப்பட்டுள்ளனர் என அடித்து கூறி வந்ததுடன், அதனை உறுதிப்படுத்த மருத்துவப் பரிசோதனை அவசியமில்லை எனவும் வாதிட்டனர்.

எனினும், கருத்தடை சத்திர சிகிச்சைக்கு உள்ளடக்கப்பட்டதாக கூறப்பட்ட பெண் கர்ப்பமடைந்துள்ளதால், உண்மைகள் வெளியாக ஆரம்பித்துள்ளன.

இதனால், ஜயசுமண மற்றும் ரதன தேரர் ஆகியோர் கூறியது போல், அந்த பெண்களுக்கு மருத்துவப் பரிசோதனைகள் அவசியமில்லை. இந்த பெண்கள் மூலமே கருத்தடை சத்திர சிகிச்சை என்ற கதை பச்சை பொய் என்பது உறுதிப்படுத்தப்பட்டுள்ளது.

இந்த நிலையில், ஜயசுமண மற்றும் ரதன தேரர் உள்ளிட்டோர் இந்த இனவாத நாடகத்தை எதற்காக அரங்கேற்றினர்? என்பது தொடர்பான விசாரணைகளை நடத்த வேண்டும் எனவும், இதன் பின்னணியில் இருப்பவர்கள் யார்? என்பதை கண்டறிய வேண்டும் எனவும் கோரிக்கைகள் விடுக்கப்பட்டுள்ளன.

625.0.560.320.160.600.053.800.700.160.90

625.0.560.320.160.600.053.800.700.160.90 1

625.0.560.320.160.600.053.800.700.160.90 2

Comment (0) Hits: 160

சஜித்தின் வேண்டுகோளின் பேரில் உண்ணாவிரதத்தை கைவிட்டார் சுமங்கல தேரர்! (VIDEO)

(VIDEO)

ஸ்ரீலங்கா பொதுஜன முன்னணியின் ஜனாதிபதி வேட்பாளர் கோட்டாபய ராஜபக்ஷ, தனது அமெரிக்கப் பிரஜாவுரிமையை நீக்கிக்கொண்டிருந்தால் அது தொடர்பில் மூன்று நாட்களுக்களுக்குள் உறுதி செய்யுமாறு கோரி, கலாநிதி இங்குருவத்தே சுமங்கல தேரரினால் கொழும்பு சுதந்திர சதுக்கத்தில் முன்னெடுக்கப்பட்டு வந்த உண்ணாவிரதப் போராட்டம் இன்று (14) நள்ளிரவுடன் நிறைவுக்கு வந்துள்ளது.

கடந்த 10ஆம் திகதி முதல் சுமங்கல தேரர் இந்த உணவு தவிர்ப்புப் போராட்டத்தை முன்னெடுத்து வந்த நிலையில், நேற்று நள்ளரவில் புதிய ஜனநாயக முன்னணி வேட்பாளர் சஜித் பிரேமதாஸவின் வேண்டுகோளின் பின்னர் போராட்டத்தைக் கைவிட்டார்.

ஜனாதிபதி வேட்பாளர் கோட்டாபய ராஜபக்ஷவின் அமெரிக்கக் குடியுரிமை நீக்கம் மற்றும் ஸ்ரீலங்கா குடியுரிமை பெற்றுக்கொள்ளப்பட்டமை தொடர்பிலான உண்மையான ஆவணங்களை 03 தினங்களிற்குள் வெளியிடும்படி வலியுறுத்தி, கலாநிதி இங்குருவத்தே சுமங்கல தேரர் உண்ணாவிரதப் போராட்டத்தை ஆரம்பித்திருந்தார்.

இடைக்கிடையே பொதுஜன முன்னணிக்கு ஆதரவளிக்கின்ற பௌத்த பிக்குமார்களும் இந்த உணவு தவிர்ப்பு போராட்டத்தை கைவிடுமாறு கோரிக்கை முன்வைத்திருந்த போதிலும், தனது போராட்டத்தை இங்குருவத்தே சுமங்கல தேரர் கைவிடவில்லை.

இந்த நிலையில், மத்திய கொழும்பில் நேற்று இரவு நடைபெற்ற இறுதி தேர்தல் பிரசாரக் கூட்டத்தின் பின்னர், புதிய ஜனநாயக முன்னணியின் வேட்பாளர் சஜித் பிரேமதாஸ உள்ளிட்ட அமைச்சர்கள் குழுவினர் நள்ளிரவில் சுதந்திர சதுக்கத்திற்கு விஜயம் செய்தனர். குறித்த பிக்குவுடன் சந்திப்பை நடத்திய சஜித் பிரேமதாச, போராட்டத்தைக் கைவிடும்படி கோரிக்கை முன்வைத்தார்.

இந்தக் கோரிக்கையை ஏற்றுக்கொண்ட இங்குருவத்தே சுமங்கல தேரர், தனது உணவுதவிர்ப்புப் போராட்டத்தை 04 நாட்களின் பின்னர் கைவிட்டார்.

அத்துடன், கொழும்பு தேசிய வைத்தியசாலையச்  சேர்ந்த மருத்துவரினால் சுமங்கல தேரரின் உடல்நிலை பரிசோதிக்கப்பட்டு பின்னர் "சுவசெரிய" ஆம்புலன்சில் மருத்துவமனைக்கு கொண்டு செல்லப்பட்டார்.

 

Comment (0) Hits: 519

எவன்கார்ட் வழக்கு; பெப்ரவரியில் மீண்டும் விசாரணை!

355 இலட்சம் ரூபாய் இலஞ்சம் பெற்றதாக குற்றம் சுமத்தப்பட்டுள்ள ரக்னா லங்கா பாதுகாப்பு நிறுவனத்தின் முன்னாள் தலைவர் ஓய்வு பெற்ற மேஜர் ஜனரால் பாலித பெர்ணான்டோ மற்றும் எவன்கார்ட் நிறுவனத்தின் தலைவர் நிஸ்ஸங்க யாபா சேனாதிபதிக்கு எதிராக இலஞ்ச ஆணைக்குழுவினால் தாக்கல் செய்யப்பட்டுள்ள வழங்கின் மேலதிக சாட்சி விசாரணைகளை எதிர்வரும் பெப்ரவரி மாதம் 14 ஆம் திகதி மீண்டும் ஆரம்பிக்க கொழும்பு மேல் நீதிமன்றம் உத்தரவிட்டுள்ளது.

இந்த வழக்கு இன்று (14) கொழும்பு மேல் நிதிமன்ற நீதிபதி ஷசி மகேந்திரன் முன்னிலையில் அழைக்கப்பட்டது.

இதன்போது, விளக்கமறியலில் வைக்கப்பட்டுள்ள எவன்கார்ட் நிறுவனத்தின் தலைவர் நிஸ்ஸங்க யாபா சேனாதிபதி சிறைச்சாலை அதிகாரிகளால் நீதிமன்றில் முற்படுத்தப்பட்டுள்ளார்.

முன்வைக்கப்பட்ட விடயங்களை ஆராய்ந்த மேல் நீதிமன்ற நீதிபதி, பெப்ரவரி மாதம் 14 ஆம் திகதி வழக்கினை மீண்டும் விசாரணைக்கு எடுத்துக்கொள்ள உத்தரவிட்டதுடன், அன்றைய தினம் சாட்சியாளர்களுக்கு நீதிமன்றில் முன்னிலையாகுமாறும் நீதிபதி அழைப்பாணை வௌியிட்டார்.

Comment (0) Hits: 131

'தேர்தலுக்கு பின்னர் நிலைமை மோசமடையலாம்' - இலங்கை பத்திரிகையாளர்கள் அச்சம்!

இலங்கையின் ஆட்சியாளர்களின் ஆதரவுடன் செயற்பட்ட கொலைகும்பல்களிடமிருந்து தப்புவற்காக நாட்டை விட்டு வெளியேற நிர்ப்பந்திக்கப்பட்டு நாடு கடந்த நிலையில்வாழும் இலங்கைபத்திரிகையாளர்கள், தங்;கள் மீது தாக்குதல் நடத்தியவர்களை வழிநடத்தியவர் இவ்வாரம் இடம்பெறவுள்ள ஜனாதிபதி தேர்தல் மூலம் மீண்டும் ஆட்சிக்கு வரக்கூடும் என்பதால், தாங்கள் மீண்டும்   இலங்கைக்கு திரும்பமுடியாது எனவும் தங்களிற்கு நீதி கிடைக்காது எனவும் அச்சம் வெளியிட்டுள்ளனர்.

2005 முதல் 2015 வரையான  மகிந்த ராஜபக்ச அரசாங்கத்தின் ஆட்சிக்காலத்தில்  ஊடகஉறுப்பினர்களிற்கு எதிராக  தாக்குதல்களில் ஈடுபட்டவர்களை தற்போதைய அரசாங்கம்  தண்டிக்க தவறியுள்ளமை குறித்து  புலம்பெயர்ந்து வாழும் ஊடகவியலாளர்கள்  ஏமாற்றமும் கவலையும் வெளியிட்டுள்ளனர்.

முன்னாள் ஜனாதிபதி மகிந்தராஜபக்சவின் சகோதரரும், ஊடகவியலாளர்கள்மீதான தாக்குதலிற்கு காரணம் என  சந்தேகிக்கப்படுபவரும்-   முன்னாள் பாதுகாப்பு செயலாளருமான கோத்தாபய ராஜபக்ச சனிக்கிழமை இடம்பெறவுள்ள தேர்தலில் வெற்றிபெறுவார் என கருதப்படும் நிலையில் - நிலைமை தங்களிற்கு சாதகமானதாக தற்போதைக்கு மாறாது என நாடுகடந்து வாழும் பத்திரிகையாளர்கள் கருத்து தெரிவித்துள்ளனர்.

2015 இல் ஆட்சிக்கு வந்த ஜனாதிபதிமைத்திரிபால சிறிசேன தலைமையிலான தற்போதைய அரசாங்கம் பத்திரிகையாளர்கள் மற்றும் ஊடகவியலாளர்கள் மீதான தாக்குதல்களில் ஈடுபடுபவர்களிற்கு சட்டத்தின் பிடியிலிருந்து விலக்களிக்கப்படுவதை முடிவிற்கு கொண்டுவருவதாக உறுதியளித்தது.

ஆனால்  கடந்த நான்கு வருடங்களில் ஊடகவியலாளர்கள் மீதான தாக்குதல்களிற்காக இதுவரை எவரும் நீதியின் முன் நிறுத்தப்படவில்லை.

ஊடகவியலாளர்கள் மீதான தாக்குதல்கள் குறித்து விசாரணைகளை முன்னெடுப்பதில் இந்த அரசாங்கம் செயற்பட்ட விதம் எங்களிற்கு திருப்தியளிக்கவில்லை என்கின்றார், இலங்கை உழைக்கும் பத்திரிகையாளர் சங்கத்தின் தலைவர் துமிந்த சம்பத்.

ஊடகங்கள் ஊடகவியலாளர்கள் மீதான தாக்குதலில் ஈடுபட்ட குற்றவாளிகள் எவரும் இதுவரை பகிரங்கப்படுத்தப்படவில்லை  நீதியின்முன்நிறுத்தப்படவில்லை என்கிறார் அவர்.

மகிந்த ராஜபக்ச ஜனாதிபதியாக பதவி வகித்த காலப்பகுதியில் பல பத்திரிகையாளர்கள் இனந்தெரியாத கொலையாளிகளால் படுகொலை செய்யப்பட்டனர்.ஏனையவர்கள் மர்மவான்களில் கடத்தப்பட்டுசித்திரவதை செய்யப்பட்ட பின்னர் விடுவிக்கப்பட்டனர் அல்லது கொல்லப்பட்டனர்.

இலங்கையின் உள்நாட்டுயுத்தத்தின் இறுதி தருணங்களிலேயே இந்த சம்பவங்;கள் இடம்பெற்றன.

எத்தனை பேர் கடத்தப்பட்டனர் கொல்லப்பட்டனர் என்பது குறித்த உறுதியான புள்ளிவிபரங்கள் இல்லாத அதேவேளை 60ற்கும் மேற்பட்ட பத்திரிகையாளர்கள் உயிர் அச்சம் காரணமாக நாட்டிலிருந்து வெளியேறினர் என்கி;ன்றார் சம்பத்.

பத்திரிகையாளர்களும் அரசாங்கத்தை விமர்சிப்பவர்களும் வெள்ளை வானி;ல் கடத்தப்பட்டமை,மகிந்த ராஜபக்ச அரசாங்கத்தின் காலத்தில் இடம்பெற்ற ஒடுக்குமுறைகளிற்கான குறியீடாக விளங்குகின்றது.

வெள்ளை வானில் கடத்தப்பட்டு உயிர்தப்பிய ஒரு சில பத்திரிகையாளர்களில் போத்தல ஜயந்தவும் ஒருவர்  . 2009 யூன் மாதம் முதலாம் திகதி வெள்ளை வானில் கடத்தப்பட்ட அவர்  ஈவிரக்கமற்ற முறையில் சித்திரவதை செய்யப்பட்டார்.

அவரது கால்கள் நசுக்கப்பட்டன, விரல்கள் சேதமாக்கப்பட்டன அதன் பின்னர் அவர் விடுவிக்கப்பட்டார்.

அவர் அதன் பின்னர் ஒரு மாதகாலத்திற்கு மேல் மருத்துவமனையில்உயிருக்காக போராடினார்.மருத்துவமனையிலிருந்து விடுதலை செய்யப்பட்ட பின்னரும் அவர் பல மாதங்களாக நடமாட முடியாத நிலையில் காணப்பட்டார்.

போத்தல ஜயந்த அக்காலப்பகுதியில் இலங்கை உழைக்கும் பத்திரிகையாளர் சங்கத்தின் தலைவராகயிருந்தார்,ஊடகங்களிற்கு எதிரான ஒடுக்குமுறை குறித்து  பகிரங்கமாக கருத்து வெளியிட்ட அவர்  ஆர்ப்பாட்டங்களில் ஈடுபடுவது ஆபத்தான விடயம் என கருதப்பட்ட காலங்களில் ஆர்ப்பாட்டங்களை ஏற்பாடு செய்தார்.

தான்தாக்கப்பட்டு ஆறு மாதங்களிற்கு பின்னர்- தனது உயிருக்கு ஆபத்து அதிகரித்த நிலையில்  அவர் தனது மனைவிமகளுடன் நியுயோர்க்கிற்கு தப்பிச்சென்றார்.

போத்தல ஜயந்த தன் மீதான தாக்குதலிற்கு காரணமானவர்களை நீதியின் முன் நிறுத்துவதற்கு இந்த அரசாங்கம் நடவடிக்கை எடுக்காதது குறித்து ஏமாற்றம் வெளியிட்டார்.

என் மீதான தாக்குதல் தொடர்பான விசாரணைகளில் இதுவரை எந்தவித குறிப்பிடத்தக்க முன்னேற்றமும் ஏற்படவில்லை என குறிப்பிட்டுள்ள அவர் காவல்துறையினர் சிலரிடமிருந்து வாக்குமூலங்களை மாத்திரம் பெற்றுள்ளனர் என குறிப்பிட்டுள்ளார்.

ராஜபக்ச  ஆட்சிக்கு வந்தால் பத்திரிகையாளர்கள் மீதான தாக்குதல்கள் அவர்கள் கொலை செய்யப்பட்டமை குறித்த விசாரணைகள் முடிவிற்கு வரலாம் என  போத்தல ஜெயந்த தெரிவித்துள்ளார்.

பத்திரிகையாளர்களிற்கு எதிரான வன்முறைகள் குறித்த அனைத்து விசாரணைகளும் முடிவிற்கு வந்துவிடும் என அவர் தெரிவித்துள்ளார்.

எதிர்வரும் யூன் மாதத்தில் மீண்டும் இலங்கை திரும்பி மீண்டும் பத்திரிகை தொழில் ஈடுபட எண்ணியுள்ளதாக அவர் தெரிவித்துள்ளார்.

ஆனால் ராஜபக்ச அதிகாரத்திற்கு வந்தால் என்னால் இலங்கைக்கு மீண்டும் செல்ல முடியும் என நான் கருதவில்லை என அவர் குறிப்பிட்டுள்ளார்.

எனது குடும்பத்தவர்கள் நான் இலங்கை செல்ல அனுமதிக்கமாட்டார்கள்,அப்படி வந்தால் கூட என்னால் பத்திரிகையாளனாக பணியாற்ற முடியும் என நான்கருதவில்லை என தெரிவித்துள்ள அவர் என்னை தாக்கியவர்கள் சுதந்திரமாக நடமாடும் நிலையில் என்னால் பத்திரிகை தொழில் ஈடுபடமுடியாது எனவும் அவர் தெரிவித்துள்ளார்.

இலங்கையின் ஜனாதிபதி தேர்தலில் பிரதான வேட்பாளர் என கருதப்படும் கோத்தபாய ராஜபக்ச  தனது சகோதரரின் ஆட்சிக்காலத்தில்  பாதுகாப்பு செயலாளராக பணியாற்றினார்.இலங்கையின் உள்நாட்டு யுத்தத்தை முடித்து வைத்தமைக்காக  அந்த நாட்டின் பெரும்பான்மை சமூகத்தினரால் கதாநாயகனாக கருதப்படுகின்றார்.

இலங்கையில் கிறிஸ்தவ தேவாலயங்களிலும் ஹோட்டல்களிலும் இடம்பெற்ற உயிர்த்தஞாயிறுகுண்டுதாக்குதல்கள் அவரது செல்வாக்கை அதிகரித்துள்ளன.

பலர் நாட்டின் பாதுகாப்பிற்கு முன்னுரிமைவழங்க கூடிய தலைவரை எதிர்பார்க்கின்றனர்.

கோத்தாபய ராஜபக்சவின் அலுவலகத்திடம் நாங்கள் கருத்து கேட்டவேளை அவர்கள் பதில் அளிக்கவில்லை.

ஆனால் அவர் தன்மீதான குற்றச்சாட்டுகளை நிராகரித்துள்ளார்.

எல்லாவிதமான குற்றச்சாட்டுகளையும் மேற்கொள்ளலாம் ஆனால் அதற்கு ஆதாரம் வேண்டுமென கோத்தாபயவின்பேச்சாளர் சரத் அமுனுகம சமீபத்தில் தெரிவித்தார்.

கோத்தபாய ராஜபக்ச தனது முதல் பிரச்சார கூட்டத்தில் தான் அதிகாரத்திற்கு வந்த மறுநாள் சிறையில் உள்ள அனை;த்து படையினரையும் விடுதலைசெய்வேன் எனதெரிவித்திருப்பது குறித்து சம்பத் கவலை வெளியிடுகின்றார்.

விசாரணையின்றி அவர்களை விடுதலை செய்வது சட்டத்தின் ஆட்சியை முடிவிற்கு கொண்டுவரும்  நிலைமை இன்னமும் மோசமடையும் என்கின்றார் அவர்.

ராஜபக்ச ஜனாதிபதியாகலாம் என்பது குறித்து  நாடுகடந்துவாழும் இலங்கை பத்திரிகையாளர்கள் அச்சம் கொண்டுள்ளனர் என்கிறார் பத்திரிகையாளர்களை பாதுகாப்பதற்கான குழுவின் ஆசியாவிற்கான ஒருங்கிணைப்பாளர் ஸ்டீவன் பட்லர்.

2009 முதல் பாரிசில் வாழும் இலங்கைபத்திரிகையாளரான அத்துல விதானகேயும் தற்போதைய அரசாங்கத்தின் தோல்வியை  விமர்சிக்கின்றார்.

2015 ற்கு பின்னர் நான் இலங்கை;கு வர திட்டமிட்டிருந்தேன் ஆனால் பத்திரிகையாளர்களின் பாதுகாப்பை உறுதி செய்வது குறித்தோ அவர்கள் மீதான தாக்குதல்களை விசாரணை செய்வது குறித்தோ குறிப்பிடத்தக்க நடவடிக்கைகள் எதுவும் எடுக்கப்படாததால்  இலங்கை திரும்பும் எண்ணத்தை கைவிட்டுவிட்டேன் எனவும் அவர் குறிப்பிட்டுள்ளார்.

கோத்தாபய ராஜபக்ச ஜனாதிபதியானால்  நாடுகடந்து வாழும் பத்திரிகையாளர்கள் மீண்டும் இலங்கைக்கு திரும்ப முடியாது என்கிறார்.

அவர் பதவிக்கு வந்தால் நாங்கள் இலங்கைக்கு திரும்பும் எங்கள் நம்பிக்கைகள் சிதறடிக்கப்பட்டுவிடும் என்கிறார் அவர்.

வோசிங்டன் போஸ்ட்
 தமிழில் ரஜீபன்
Comment (0) Hits: 864

தேர்தல் முடிவுகள் வெளியானவுடன் மைத்திரி மீண்டும் தலைவர் பதவிக்கு!

ஜனாதிபதித் தேர்தல் முடிவுகள் வெளியான பின்னர், உடனடியாக ஸ்ரீலங்கா சுதந்திரக் கட்சியின் தலைவராக மைத்திரிபால சிறிசேன மீண்டும் தனது கடமைகளில் ஈடுபடுவார் என சுதந்திரக் கட்சியின் பதில் தலைவர் பேராசிரியர் ரோஹன லக்ஷ்மன் பியதாச தெரிவித்தள்ளார்.

ஸ்ரீலங்கா சுதந்திர கட்சியின் அமைப்பாளர்களில் பெரும்பான்மையானோர் ஸ்ரீலங்கா பொதுஜன பெரமுனவுக்கு ஆதரவு வழங்க கூடாதென அழுத்தம் பிரயோகித்தனர். சுதந்திர கட்சியில் பலர் பொதுஜன பெரமுனவுக்கு ஆதரவு வழங்க தீர்மானித்தமையினால், ஜனாதிபதி மைத்திரிபால சிறிசேன சுயாதீனமாக செயற்படுவதற்கு தீர்மானித்தார். அதற்கமைய, தேர்தல் முடியும் வரை சுதந்திர கட்சியின் தலைவர் பதவியில் இருந்து விலகுவதற்கு ஜனாதிபதி தீர்மானித்தார்.

அதன்படி, ஜனாதிபதித் தேர்தலுக்குப் பின்னர், கட்சியின் பணிகளை முன்னெடுத்து செல்வதற்காக ஜனாதிபதி மைத்திரிபால சிறிசேன நடவடிக்கைகளை மேற்கொண்டு வருவதாக  பதில் தலைவர் மேலும் தெரிவித்தார்.

அத்துடன், ஸ்ரீலங்கா சுதந்திரக் கட்சியின் தலைமையகத்திலிருந்து கட்சியின் எதிர்கால பணிகளை அவர் மேற்கொள்வார் என்றும் பதில் தலைவர் ரோஹன லக்ஷ்மன் பியதாச தெரிவித்துள்ளார்.

Comment (0) Hits: 284

கோட்டாவின் பிரஜாவுரிமை; மேன்முறையீட்டு தீர்ப்புக்கு எதிராக உச்ச நீதிமன்றில் மனு!

ஜனாதிபதி வேட்பாளர் கோட்டாபய ராஜபக்‌ஷ, தான் ஒரு இலங்கை பிரஜை என்று கூறிக்கொள்வதை தடுத்து நிறுத்தும் உத்தரவை கோரும் எழுத்துமூல மனு, மேன்முறையீட்டு நீதிமன்றத்தில் நிராகரிக்கப்பட்டதை சவாலுக்குட்படுத்தி, உச்ச நீதிமன்றத்தில் முறையீட்டு விண்ணப்பமொன்று தாக்கல் செய்யப்பட்டுள்ளது.

காமினி வியங்கொட மற்றும் பேராசிரியர் சந்தரகுப்த தேனுவர ஆகியோர் இந்த முறையிட்டு மனுவை தாக்கல் செய்துள்ளனர்.

குடிவரவு மற்றும் குடியகல்வு கட்டுப்பாட்டாளர் நாயகம் ஆர்.எம்.பி.எஸ்.பி. ரத்னாயக்க மற்றும் ஆட்பதிவு ஆணையாளர் நாயகம் பி. வியானி குணதிலக்க  ஆகியோர் மனுவில் பிரதிவாதிகளாக குறிப்பிடப்பட்டுள்னர்.

ஜனாதிபதி வேட்பாளர் கோட்டாபய ராஜபக்ஷ, இலங்கைப் பிரஜை என்று தன்னை கூறிக்கொள்வது மற்றும் இரட்டை குடியுரிமை சான்றிதழ் என்பதை பயன்படுத்தி செயற்படுதல் ஆகியவற்றை தடுத்து நிறுத்துமாறு இடைக்கால உத்தரவை பிறப்பிக்குமாறு தாக்கல் செய்யப்பட்டிருந்த மனுவை மேன்முறையீட்டு நீதிமன்றத்தின் மூன்று நீதியரசர்களைக் கொண்ட குழுமம் கடந்த ஒக்டோபர் 4 ஆம் திகதி ஏகமனதாக நிராகரிக்கப்பட்டிருந்தமை குறிப்பிடத்தக்கது.

Comment (0) Hits: 168

Page 2 of 103