செய்திகள்

தேசிய அரசாங்கம் தொடர்ந்தும் நீடிக்கும்

ஸ்ரீலங்கா சுதந்திரக் கட்சியும் ஐக்கிய தேசியக் கட்சியும் இணைந்து அமைத்த தேசிய அரசாங்கம் தொடர்ந்தும் நீடிக்கும் என்று இரண்டு பிரதான கட்சிகளும் நேற்றைய தினம் ஸ்ரீலங்கா நாடாளுமன்றில் அறிவித்துள்ளன.

உள்ளுராட்சி சபைத் தேர்தலில் முன்னாள் ஜனாதிபதி மஹிந்த ராஜபக்ச தலைமையிலான ஸ்ரீலங்கா பொதுஜன முன்னணி வெற்றிபெற்றதை அடுத்து ஏற்படுத்தப்பட்டிருந்த அரசியல் நெருக்கடியை அடுத்து மைத்திரி – ரணில் தலைமையிலான தேசிய அரசாங்கத்தின் பங்காளிக் கட்சிகளிடையே கடும் முரண்பாடுகள் ஏற்பட்டிருந்த நிலையிலேயே இன்று இந்த அறிவிப்பு வெளியிடப்பட்டிருக்கின்றது.

ஸ்ரீலங்கா நாடாளுமன்றம் இன்றைய தினம் சபாநாயகர் கரு ஜயசூரிய தலைமையில் கூடியபோது பிரதமர் ரணில் விக்கிரமசிங்க விசேட அறிவித்தலொன்றை விடுத்தார்.

2015 ஆம் ஆண்டு ஜனவரி எட்டாம் திகதி நடைபெற்ற ஜனாதிபதித் தேர்தலை அடுத்து ஸ்ரீலங்கா சுதந்திரக் கட்சியும் ஐக்கிய தேசியக் கட்சியும் இணைந்து அமைத்த தேசிய அரசாங்கம் தொடர்ந்தும் அமுலில் இருப்பதாக பிரதமர் ரணில் அறிவித்தார்.

அரசியல் யாப்பிற்கு அமைய நிறைவேற்றப்பட்ட தீர்மானத்திற்கு ஏற்பவே தேசிய அரசாங்கத்தை அமைத்ததாகவும் இதற்கமைய தேசிய அரசாங்கத்தின் நடவடிக்கைகள் தொடர்ந்தும் முன்னெடுக்கப்படும் என்றும் ரணில் விக்கிரமசிங்க தெரிவித்துள்ளார்.

தேசிய அரசாங்கத்தை முடிவுக்கு கொண்டுவர வேண்டிய தேவை இன்னமும் எழவில்லை என்றும் பிரதமர் ரணில் விக்கிரமசிங்க குறிப்பிட்டுள்ளார்.

இதன்போது ஸ்ரீலங்கா சுதந்திரக் கட்சி தலைமையிலான ஐக்கிய மக்கள் சுதந்திர முன்னணியின் பொதுச் செயலாளரான அமைச்சர் மஹிந்த அமரவீர கருத்துத் தெரிவிக்கையில் தேசிய அரசாங்கத்தை அமைப்பதற்காக ஏற்படுத்தப்பட்ட உடன்படிக்கை தொடர்ந்தும் அமுலில் இருப்பதாக தெரிவித்துள்ளார்.

இந்த உடன்படிக்கைக்கு அமைய அதிலுள்ள விடையதானங்களை நடைமுறைப்படுத்துவதற்கு ஸ்ரீலங்கா சுதந்திரக் கட்சியும் - ஐக்கிய தேசியக் கட்சியும் கட்டுப்பட்டுள்ளதாகவும் அமைச்சர் மஹிந்த அமரவீர தெரிவித்துள்ளார்.

Comment (0) Hits: 130

பிரியங்க பெர்ணான்டோ மீண்டும் இலங்கைக்கு

பிரித்தானியாவில் வசிக்கும் தமிழர்களை அச்சுறுத்துகின்ற வகையில் செயற்பட்ட பிரிகேடியர் பிரியங்க பெர்னாண்டோவை இலங்கைக்கு திருப்பி அழைக்கவுள்ளதாக, இராணுவ பேச்சாளர் சுமித் அத்தபத்து குறிப்பிட்டுள்ளார்.

அரசாங்க தகவல் திணைக்களத்தில் இன்று இடம்பெற்ற அமைச்சரவை தீர்மானங்களை அறிவிக்கும் வாராந்த ஊடகவியலாளர் சந்திப்பின்போது ஊடகவியலாளர்கள் எழுப்பிய கேள்விக்கு பதிலளிக்கும்போதே அவர் இதனைக் குறிப்பிட்டார்.

இதன்போது விசாரணைக்காகவா குறித்த பிரிகேடியர் திருப்பி அழைக்கப்படுகின்றார் என்று ஊடகவியலாளர்கள் கேள்வி எழுப்பினர். இதற்கு பதிலளித்த இராணுவ பேச்சாளர் சம்பவம் தொடர்பாக கேட்டறிவதற்கே அவர் திருப்பி அழைக்கப்படுவதாக தெரிவித்தார்.

கடந்த 4 ஆம் திகதி கொண்டாடப்பட்ட இலங்கையின் சுதந்திர தினத்தன்று இதற்கு எதிராக பிரித்தானியாவில் எதிர்ப்பு ஆர்ப்பாட்டமொன்று முன்னெடுக்கப்பட்டது.

லண்டனில் அமைந்துள்ள இலங்கை தூதரகத்திற்கு முன்னால் இடம்பெற்ற ஆர்ப்பாட்டத்தின்போது, ஆர்ப்பாட்டத்தில் ஈடுபட்டிருந்தவர்களை நோக்கி குறித்த பிரிகேடியர் கழுத்தில் கையை வைத்து அச்சுறுத்துவது போன்று சைகை காண்பித்தார்.

இதனைத் தொடர்ந்து அவரை பதவி நீக்கி விசாரணை மேற்கொள்ள வேண்டும் என்று பல தரப்பினரும் வலியுறுத்தி வந்த போதிலும் இது குறித்து எவ்வித நடவடிக்கையும் எடுக்கப்படாததுடன் அவரது பதவியிலும் எவ்வித மாற்றமும் மேற்கொள்ளப்படவில்லை.

இந்நிலையில் அவர் மீண்டும் நாட்டுக்கு திருப்பி அழைக்கப்பட்டுள்ளமை குறிப்பிடத்தக்கது.

Comment (0) Hits: 126

கிளிநொச்சி, முல்லைத்தீவு மாவட்டங்களில் அபாயமான வெடிபொருட்கள்

கிளிநொச்சி மற்றும் முல்லைத்தீவு மாவட்டங்களில் மாத்திரம் கடந்த 15 மதங்களில் 2 ஆயிரத்து 864 அபாயகரமான வெடிபொருட்கள் அகற்றப்பட்டுள்ளதாக SHARP நிறுவனம் தெரிவித்துள்ளது.

ஜப்பான் நாட்டின் நிதியுதவில் கிளிநொச்சியில் இயங்கிவரும் SHARP மனிதாபிமான கண்ணிவெடி அகற்றும் நிறுவனத்தால், 15 மாதங்களில் மேற்குறித்த அளவிலான வெடிபொருட்கள் அகற்றப்பட்டுள்ளதாக நிறுவன முகாமையாளாரான ஓய்வுபெற்ற கப்டன் பிரபாத் நாரம்பனவ தெரிவித்துள்ளார்.

கண்னிவெடி அகற்றும் இந்த நடவடிக்கைக்கு நிதியுதவி வழங்கும் நிறுவனத்தின் இலங்கைப் பிரதிநிதி நிறோசா வெல்கம, அண்மையில் பளைப் பகுதிக்கு விஜயம் செய்து கண்னிவெடி அகற்றும் நடவடிக்கைகளையும் பார்வையிட்டிருந்தார்.

இதன்போது இங்கு மேற்கொள்ளப்படும் செயற்பாடுகள் குறித்து கருத்து வெளியிட்டபோதே நிறுவனத்தின் தலைவர் மேற்குறித்த தகவலை தெரிவித்தார்.

அத்துடன் கடந்த 15 மாதங்களில் முல்லைத்தீவு மாவட்டத்தின் ஒட்டுசுட்டான் பிரதேச செயலகத்தின் கீழ் உள்ள அம்பகாமம் மற்றும் தச்சடம்பன் பகுதிகளிலும், கிளிநொச்சி மாவட்டத்தின் பச்சிலைப்பள்ளி பிரதேச செயலகத்தின் கீழ் உள்ள முகமாலை பிரதேசத்திலும் 3 இலட்சத்து 9 ஆயிரத்து 260 சதுரமீற்றர் பரப்பளவில் காணப்பட்ட 2 ஆயிரத்து 864 அபாயகரமான வெடிபொருட்கள் அகற்றப்பட்டுள்ளதுடன், தொடர்ந்தும் முகாமாலை, கிளாலிப்பகுதிகளில் கண்ணிவெடி அகற்றும் பணி தற்போது முன்னெடுக்கப்படுவதாகவும் அவர் குறிப்பிட்டார்.

ஜப்பான் அரசாங்கம் மற்றும் ஜப்பான் நாட்டு மக்களிடமிருந்து பெறப்பட்ட 9.8 பில்லியன் நிதியுதவியின் மூலம் குறித்த பகுதிகளில் கண்ணிவெடி அகற்றும் பணிகள் மேற்கொள்ளப்பட்டுவருகின்றமை குறிப்பிடத்தக்கது

Comment (0) Hits: 174

இலங்கையில் பியர் பாவனை 12 வீதத்தால் அதிகரிப்பு

இலங்கையில் பியர் பாவனை 12 வீதத்தால் அதிகரித்துள்ளது.

கடந்த வரவு செலவுத்திட்டத்தில் அரசாங்கம் பியருக்கான வரியைக் குறைத்ததன் பின்னரே இந்த நிலைமை ஏற்பட்டுள்ளது.

மதுவரித்திணைக்களம் கடந்த மாதங்களில் வௌியிட்ட தரவுகளின் மூலம் இந்த விடயம் தொடர்பில் அறியக்கிடைத்துள்ளதாக புகையிலை மற்றும் மதுபானம் மீதான தேசிய அதிகார சபை தெரிவித்துள்ளது.

நாட்டில் மொத்த மதுபாவனையில் 18 வீதம் பியர் நுகர்வு காணப்படுவதாகவும் அந்த தரவில் சுட்டிக்காட்டப்பட்டுள்ளது.

மேலும் நுகர்வு வீதத்தில் அதிகரிப்பு ஏற்படும் வாய்ப்புள்ளதாக புகையிலை மற்றும் மதுபானம் மீதான தேசிய அதிகார சபை தெரிவித்துள்ளது.

இந்த விடயம் தொடர்பில் எதிர்வரும் திங்கட்கிழமை இடம்பெறவுள்ள புகையிலை மற்றும் மதுபானம் மீதான தேசிய அதிகார சபையின் கூட்டத்தில் கலந்துரையாடப்படவுள்ளதாக தெரிவிக்கப்படுகின்றது.

இதேவேளை, பியர் நுகர்வு அதிகரித்தமை தொடர்பான அறிக்கை ஜனாதிபதிக்கும் சுகாதார அமைச்சருக்கும் அனுப்பிவைக்கப்படவுள்ளது. 

Comment (0) Hits: 122

ரூபவாஹினிக் கூட்டுத்தாபனத்தின் நல்லிணக்க அலைவரிசை ஆரம்பம்

இலங்கை ரூபவாஹினிக் கூட்டுத்தாபனத்தின் நல்லிணக்க அலைவரிசை ஆரம்பிக்கப்பட்டுள்ளது.

நேற்று செவ்வாய்க்கிழமை பிற்பகல் இடம்பெற்ற இந்த நிகழ்வில் ஜனாதிபதி மைத்ரிபால சிறிசேன பிரதம அதிதியாக கலந்துகொண்டார்.

தேசிய நல்லிணக்கத்தைக் கட்டியெழுப்பும் பொருட்டு அரசாங்கத்தினால் மேற்கொள்ளப்பட்டுவரும் நடவடிக்கைகளுக்கு பங்களிப்பு வழங்கும் வகையில், இந்த புதிய நல்லிணக்க அலைவரிசை ஆரம்பிக்கப்பட்டுள்ளதுடன், தமிழ் பேசும் மக்களின் தேசிய சமய மற்றும் கலாசார அடையாளங்களை உறுதிப்படுத்தும் வகையிலான முழுநேர ஒளிபரப்புக்கள் இந்த அலைவரிசையில் இடம்பெறவுள்ளன.

இந்த நிகழ்வில் அமைச்சர்களான மங்கள சமரவீர, மனோகணேசன், இராஜாங்க அமைச்சர் ஏ.எச்.எம்.பௌசி, பிரதி அமைச்சர் கருணாரத்ன பரனவித்தான, நாடாளுமன்ற உறுப்பினர்களான எம்.ஏ.சுமந்திரன், அங்கஜன் இராமநாதன், காதர் மஸ்தான் ஆகியோரும் வெளிநாட்டு தூதுவர்கள், சர்வதேச அமைப்புக்களின் பிரதிநிதிகள், அரச அதிகாரிகள் உள்ளிட்ட அதிதிகளும் இலங்கை ரூபவாஹினி கூட்டுத்தாபனத்தின் தலைவரான சட்டத்தரணி ரவி ஜயவர்தன, பணிப்பாளர் நாயகம் துஷிர மெலெவ்வேதந்திரி, செயற்பாட்டு பணிப்பாளர் அமல் கஜமன்கே உள்ளிட்ட பணிக்குழுவினரும் கலந்துகொண்டனர்.

Comment (0) Hits: 157

நாடாளுமன்றத்தில் தமிழ் இல்லை; சபையை ஒத்திவைத்தார் சபாநாயகர்

இலங்கை மத்திய வங்கியில் இடம்பெற்ற பிணைமுறி மோசடி தொடர்பான ஜனாதிபதி ஆணைக்குழுவின் அறிக்கை தமிழ் மற்றும் ஆங்கில மொழிமூலப் பிரதிகள் இல்லாததனால் ஸ்ரீலங்கா நாடாளுமன்றத்தில் இன்று நடைபெறவிருந்த விவாதம் ஒத்திவைக்கப்பட்டுள்ளது.

வெறும் சிங்கள மொழியில் மட்டும் குறித்த அறிக்கை இருப்பதை சுட்டிக்காட்டிய தமிழ் தேசியக் கூட்டமைப்பின் பேச்சாளரும், நாடாளுமன்ற உறுப்பினருமான எம்.ஏ.சுமந்திரன், தமிழ்மொழியில் பிரதிகள் வரும்வரை விவாதத்திற்கு ஒத்துழைக்க முடியாது என்பதை சுட்டிக்காட்டியதைத் தொடர்ந்து விவாதம் நாளை வரை ஒத்திவைக்கப்பட்டது.

நாடாளுமன்றம் சபாநாயகர் கரு ஜயசூரிய தலைமையில் இன்று செவ்வாய்க்கிழமை பகல் 1 மணியளவில் கூடியது.

வாய்மூல விடைக்கான கேள்வி நேரத்தின் பின்னர், சபை ஒத்திவைப்பு வேளை பிரேரணையான மத்திய வங்கி மோசடி தொடர்பான ஜனாதிபதி ஆணைக்குழுவின் அறிக்கை சமர்ப்பிக்கப்பட்டது.

எனினும் குறித்த அறிக்கை வெறும் சிங்கள மொழியில் மட்டுமே காணப்படுவதால் தாய் மொழியிலும், ஆங்கில மொழியிலும் காணப்படாததினால் விவாதத்திற்கு ஒத்துழைக்க முடியாது என்பதை நாடாளுமன்ற உறுப்பினர் சுமந்திரன், சபாநாயகரின் கவனத்திற்கு கொண்டுவந்தார்.

இதனைக் கவனத்திற்கொண்ட சபாநாயகர் கரு ஜயசூரிய, குறித்த விசாரணை அறிக்கை 8000 பக்கங்களைக் கொண்டதனால் தமிழ் மற்றும் ஆங்கில மொழிகளில் அவற்றை மொழிபெயர்ப்பு செய்வதற்கு தாமதமாகியதாக சுட்டிக்காட்டியதோடு அதற்காக வருந்துவதாகவும் கூறினார்.

இதனையடுத்து சபையின் அனுமதியை சபாநாயகர் கோரிய நிலையில் விவாதத்தை நாளை புதன்கிழமை வரை ஒத்திவைப்பதற்கு இணக்கம் தெரிவிக்கப்பட்டது.

ஐ.பி.சி தமிழ்

Comment (0) Hits: 130

ஒற்றையாட்சியை சுமந்திரன் ஏற்றுக்கொண்டார்; லால் விஜேநாயக்க

புதிய அரசியல் யாப்பில் ஒற்றையாட்சியை தக்கவைத்துக்கொள்வதற்கும், பௌத்த மதத்திற்கான முன்னுரிமையை வழங்குவதற்கும் தமிழ்த் தேசியக் கூட்டமைப்பு முழுமையான இணக்கத்தை தெரிவித்திருப்பதாக இலங்கையின் அரசியல் யாப்பு மறுசீரமைப்புக் குழுவின் தலைவரான சட்டத்தரணி லால் விஜேநாயக்க தெரிவித்துள்ளார்.

அதனால் சிங்கள பெரும்பான்மை இனத்தை பிரதிநிதித்துவப்படுத்தும் தரப்பினருக்கு இதனைவிட வேறு என்ன தேவைப்படுகின்றது என்றும் சட்டத்தரணி லால் விஜேநாயக்க கேள்வி எழுப்பியுள்ளார்.

நடைபெற்றுமுடிந்த உள்ளுராட்சி சபைத் தேர்தலை அடுத்து நாட்டில் ஏற்படுத்தப்பட்டுள்ள அரசியல் குழப்பங்களை உடனடியாக முடிவுக்கு கொண்டுவருமாறு ஊடகங்கள் ஊடாக அழைப்பு விடுத்த சட்டத்தரணி லால் விஜேநாயக்க, தாமதமின்றி புதிய அரசியல் யாப்புப் பணிகளை மீள ஆரம்பிக்க வேண்டும் என்றும் கோரிக்கை விடுத்துள்ளார்.

'அரசியல் யாப்பில் பௌத்த மதத்திற்கு வழங்கப்பட வேண்டிய முக்கியத்துவம் மற்றும் ஒற்றையாட்சி தொடர்பிலும் முழுமையான இணக்கப்பாடு எட்டப்பட்டுள்ளது.

பெரும்பான்மை இனத்தவர்களுக்கும் சிறுபான்மை இனத்தவர்களுக்கும் இடையில் இவ்வாறான இணக்கப்பாடு எட்டப்பட்டுள்ளமை ஸ்ரீலங்காவின் அண்மைக்கால வரலாற்றில் இதுவே முதன்முறையாகும். அரசியல்யாப்புச் சபையில் நிகழ்த்தப்பட்ட மிகச் சிறந்த உரையை தமிழ்த் தேசியக் கூட்டமைப்பின் நாடாளுமன்ற உறுப்பினர் சுமந்திரனே நிகழ்த்தியிருந்தார்.

இந்தப் பிரச்சனையைத் தொடர்ந்தும் இழுத்தடித்துக்கொண்டிருக்க முடியாது, நாம் அனைவரும் ஒற்றையாட்சி முறைமையை அடிப்படையாகக் கொண்ட அரசியல் யாப்பைத் தயாரிக்க முழுமையான இணக்கத்தை தெரிவிக்கின்றோம் என்று சுமந்திரன் தலைமையிலான தரப்பினர் மிகத் தெளிவாக குறிப்பிட்டுள்ளனர்.

இதனைவிட வேறு என்ன தேவை. அதனால் இந்தளவு தூரத்திற்கு வந்துள்ள புதிய அரசியல் யாப்பை தயாரிக்கும் பணிகளை முடக்க முயல்வது குறித்தே நாம் கவலைப்படுகின்றோம்.

அரசியல் ரீதியான குழப்பங்களை நாட்டில் ஏற்படுத்துவதன் ஊடாக புதிய அரசியல் யாப்புத் தயாரிப்புப் பணிகளை முடக்க சிலர் சதிசெய்கின்றனர். இவற்றுக்கு இடம்கொடுக்காது அரசியல் யாப்புத் தயாரிப்புப் பணிகளை உடனடியாக முன்னெடுக்க நடவடிக்கை எடுக்க வேண்டும். அதுதான் நாட்டிற்கு இன்று அவசரமாக தேவைப்படுகின்றது.

இன்னும் சில நடவடிக்கைகள் மாத்திரமே எஞ்சியிருக்கின்றன. தற்போதும் பிரேரணையொன்று தயாரிக்கப்பட்டு வருகின்றது. அந்த பிரேரணை தயாரிக்கப்பட்டதும் நாடாளுமன்றத்தில் சமர்ப்பிக்கப்படும்.

அதன்போது தேவையான மாற்றங்களைக் கலந்துரையாடி மாற்றியமைத்துக்கொள்ள முடியும். இவை இரகசியமாகவோ திருட்டுத்தனமாகவோ மேற்கொள்ளப்படும் நடவடிக்கைகள் அல்ல. அனைத்தும் வெளிப்படையாகவே மேற்கொள்ளப்படுகின்றன"

ஆனால் தாங்கள் ஒருபோதும் ஒற்றையாட்சியை ஏற்றுக்கொள்ளவில்லை என்று தெரிவித்துவரும் தமிழ்த் தேசியக் கூட்டமைப்பின் நாடாளுமன்ற உறுப்பினர் எம்.ஏ.சுமந்திரனும் மற்றும் அந்தக் கட்சியின் தலைவரான எதிர்கட்சித் தலைவர் இரா.சம்பந்தன் ஆகியோர் தாங்கள் ஏக்கிய ராஜ்ய என்ற சிங்கள சொல்லையே பயன்படுத்த இணங்கியதாகக் குறிப்பிடுகின்றனர்.

ஏக்கிய ராஜ்ய என்ற சிங்கள வார்த்தைக்கான அர்த்தம் தமிழில் ஒற்றையாட்சி அல்ல என்று கடந்த உள்ளுராட்சி மன்றத் தேர்தல் பிரசார மேடைகளில் இவர்கள் அடித்துக் கூறியிருந்தமையும் இங்கு குறிப்பிடத்தக்கது.

IBC Tamil

Comment (0) Hits: 119

அமைச்சரவையில் நாளை மாற்றம்

ஜனாதிபதி மைத்திரிபால சிறிசேன, பிரதமர் ரணில் விக்கிரமசிங்க தலைமையிலான தேசிய அரசாங்கத்தின் கீழ் உள்ள அமைச்சரவையில் நாளை புதன்கிழமை மாற்றங்கள் ஏற்படுத்துவது தொடர்பாக அமைச்சரவையில் ஆராயப்பட்டுள்ளது.

ஜனாதிபதி மைத்திரிபால சிறிசேன தலைமையில் ஸ்ரீலங்கா அமைச்சரவைக் கூட்டம் ஜனாதிபதி செயலகத்தில் இன்று செவ்வாய்க்கிழமை காலை நடைபெற்றது.

பெரும்பாலும் நாளை அமைச்சரவையில் மாற்றங்கள் ஏற்படுத்தப்படும் என்ற தகவல் வெளியிடப்பட்டுவந்த நிலையில், அதுகுறித்து இன்றைய அமைச்சரவையில் ஆராயப்பட்டிருப்பதாகவும், அமைச்சரவையில் நாளை மாற்றங்கள் ஏற்படுத்தப்படும் சாத்தியம் காணப்படுவதாகவும் தேசிய கலந்துரையாடல், சகவாழ்வு, நல்லிணக்க அமைச்சர் மனோ கணேசன் ஊடகமொன்றுக்குத் தெரிவித்துள்ளார்.

எனினும் நாட்டில் நிலவுகின்ற அரசியல் நெருக்கடி தொடர்பில் இன்றைய அமைச்சரவைக் கூட்டத்தில் பேசப்படவில்லை என்றும் அமைச்சர் கூறினார்.

இதேவேளை இன்றைய அமைச்சரவைக் கூட்டத்தில் உயர்கல்வி அமைச்சர் லக்ஷ்மன் கிரியெல்லவுக்கும், ஸ்ரீலங்கா சுதந்திரக் கட்சியிலுள்ள ஒருசில அமைச்சர்களுக்கும் இடையே வாய்த்தர்க்கம் ஏற்பட்டதாக தெரியவருகின்றது.

எவ்வாறாயினும் ஏனைய அமைச்சரவைக் கூட்டங்களை விடவும் இன்றைய தினம் நடைபெற்ற அமைச்சரவைக் கூட்டம் சுமுகமாக முடிவுற்றதாக கூறப்படுகின்றது.

அமைச்சரவையில் மாற்றம் ஏற்படுத்தப்படும் என்று தெரிவிக்கப்பட்டு வந்த நிலையில் இறுதி அமைச்சரவைக் கூட்டம் இதுவென்பது குறிப்பிடத்தக்கதாகும்.

Comment (0) Hits: 133

உறவுகளைத் தேடி வீதியில் இறங்கி இன்றுடன் 1 வருடம் நிறைவு

வலிந்து காணாமல் போகச் செய்யப்பட்டுள்ள தமது உறவுகள் மீண்டும் வருவார்கள் என்ற நம்பிக்கையில் காணாமல் ஆக்கப்பட்டோரின் உறவினர்கள் வீதியோரங்களில் காத்திருந்து இன்றுடன் 1 வருடம் நிறைவடைந்துள்ளது.

பல்வேறுபட்ட சந்தர்ப்பங்களின்போதும் வலிந்து காணாமல் போகச் செய்யப்பட்டுள்ள உறவுகளை மீட்டுத்தர வேண்டும் அல்லது அவர்கள் உயிருடன் இல்லை என்றால் அவர்களுக்கு என்ன நடந்தது என்பதனை பகிரங்கமாக அறிவிக்க வேண்டும் என்று வலியுறுத்தி, தமிழர் தாயகப் பகுதிகளான வடக்கு, கிழக்கில் தொடர் போராட்டங்கள் முன்னெடுக்கப்பட்டுவருகின்றன.

இந்நிலையில் முதலில் கிளிநொச்சி கந்தசுவாமி ஆலய முன்றலில் ஆரம்பிக்கப்பட்டு எவ்வித தீர்வுமின்றி தொடரும் போராட்டம் இன்றுடன் 1 வருடத்தை எட்டியுள்ளது.

கடந்த காலங்களில் நாட்டில் இடம்பெற்ற யுத்தத்தின் போதும் அதன் பின்னரும் ஆயிரக்கணக்கான இளைஞர்கள், யுவதிகள் உட்பட பலர் காணாமல் ஆக்கப்பட்டுள்ளனர்.

பல்வேறு காரணங்களைக் கூறி வெள்ளைவானில் கடத்தப்பட்டு காணாமல் ஆக்கப்பட்டவர்கள் ஒருபுறம் இருக்க, இறுதிக்கட்ட யுத்தத்தின்போது ஒரு நாளேனும் விடுதலைப் புலிகள் அமைப்பில் இருந்திருந்தாலோ அல்லது அவர்களுக்கு உதவியிருந்தாலோ இராணுவத்திடம் சரணடைய வேண்டும் என்றும், அவ்வாறு சரணடையாவிட்டால் வலுக்கட்டாயமாக கைதுசெய்வோம் என்ற எச்சரிக்கைக்கு அமைய ஓமந்தை சோதனைச் சாவடி உட்பட பல இடங்களிலும் வைத்து கைதுசெய்யப்பட்டு காணாமல் ஆக்ப்பட்வர்களைத் தேடி அவர்களது உறவினர்கள் வடக்கு கிழக்கு பகுதிகளில் தொடர் போராட்டங்களில் ஈடுபட்டுவருகின்றனர்.

இந்த நிலையில் இன்றைய தினம் கிளிநொச்சியில் ஆரம்பிக்கப்பட்ட போராட்டம் பலத்த ஏமாற்றங்களுடன் 1 வருடத்தை எட்டியுள்ள நிலையில், தமது கொள்கையில் தளராத காணாமல் ஆக்கப்பட்டோரின் உறவுகள் இன்றைய தினமும் பாரிய கண்டன ஆர்ப்பாட்டத்தில் ஈடுபட்டுள்ளனர்.

கடந்த 1 வருடமாக தொடர் போராட்டம் இடம்பெற்றுவரும் கிளிநொச்சி கந்தசுவாமி ஆலய முன்றலில் ஒன்றுகூடியுள்ள காணாமல் ஆக்கப்பட்டோரின் உறவுகள், தமது கோரிக்கைகள் அடங்கிய பதாதைகளைத் தாங்கியவாறு கொளுத்தும் வெயிலில் போராட்டத்தில் ஈடுபட்டுள்ளனர்.

காணாமல் ஆக்கப்பட்டுள்ளோர் எங்கும் இல்லை என்று ஜனாதிபதி மைத்திரிபால சிறிசேன யாழ்ப்பாணத்தில் வைத்து தெரிவித்தபோதிலும், அதனை ஏற்க மறுத்துள்ள காணாமல் ஆக்கப்பட்டோரின் உறவினர்கள் வடமாகாணத்தின் கிளிநொச்சி, வவுனியா, முல்லைத்தீவு மற்றும் யாழ்ப்பாணம் ஆகிய மாவட்டங்களிலும் கிழக்கு மாகாணத்தின் திருகோணமலை மாவட்டத்திலும் தொடர் போராட்டத்தில் ஈடுபட்டுவருகின்றனர்.

இந்நிலையில் கிளிநொச்சியில் இன்றைய தினம் இடம்பெறும் கண்டனப் போராட்டத்தில் வலிந்து காணாமல் ஆக்கப்பட்டோரின் உறவினர்கள், அரசியல்வாதிகள், மதகுருமார்கள் உட்பட பலர் பங்கேற்றுள்ளதாக அங்கிருக்கும் எமது செய்தியாளர் தெரிவித்தார்.

Comment (0) Hits: 170

மஹிந்தவால் தமிழீழம் மலரும்; சம்பந்தன் எச்சரிக்கை

ஜனநாயக ரீதியில் நாடாளுமன்றம் அரசமைப்பு சபையாக மாற்றியமைக்கப்பட்டு தேசிய பிரச்சினைக்கு தீர்வுகாணும் வகையில் செயற்பாடுகள் முன்னெடுக்கப்படிருந்த நிலையில், முன்னாள் ஜனாதிபதி மஹிந்த ராஜபக்ச தலைமையிலான ஸ்ரீலங்கா பொதுஜன பெரமுன தேர்தலின்போது புதிய அரசமைப்பு கொண்டுவரப்பட்டால் தமிழீழக் கனவு நனவாகும் என்று அப்பாவி சிங்கள மக்களுக்கு தவறான கருத்துகளை விதைத்திருந்தனர் என எதிர்க்கட்சித் தலைவரான தமிழ்த் தேசியக் கூட்டமைப்பின் தலைவர் இரா.சம்பந்தன் தெரிவித்தார்.

அத்துடன், முன்னாள் ஜனாதிபதி மஹிந்த ராஜபக்சவின் வாக்கு வீதம் ஒவ்வொரு தேர்தலிலும் குறைந்துகொண்டே வந்துள்ளது. 2015ஆம் ஆண்டு ஜனாதிபதித் தேர்தலிலும் நாடாளுமன்றத் தேர்தலிலும் மக்கள் கொடுத்த ஆணையின் பிரகாரம் நல்லாட்சி அரசு தொடர்ந்து பயணிக்க வேண்டும் எனவும் அவர் குறிப்பிட்டார்.

நாட்டில் ஏற்பட்டுள்ள அரசியல் நெருக்கடிகள் மற்றும் சமகால பிரச்சினைகள் தொடர்பில் நேற்று மாலை நாடாளுமன்றில் நடைபெற்ற விசேட விவாதத்தில் கலந்துகொண்டு உரையாற்றிய போதே அவர் இவ்வாறு கூறினார்.

உள்ளூராட்சிமன்றத் தேர்தலில் மக்கள் தமது ஆணையை வழங்கியுள்ளதாக குறிப்பிட்ட அவர், மொத்தமாக 56 வாக்கு வீதம் மஹிந்த ராஜபக்சவுக்கு எதிராகவே காணப்படுவதுடன், கடந்த மூன்று தேர்தல்களிலும் 50 வீதத்திற்கும் குறைவான வாக்குகளையே மஹிந்த ராஜபக்ச பெற்றுக்கொண்டுள்ளதாக சுட்டிக்காட்டினார்.

இதன் அடிப்படையில் நாடாளுமன்றத்தில் பிரச்சினையை எழுப்ப முடியாது. ஜனாதிபதி தேர்தல் மற்றும் நாடாளுமன்ற தேர்தலில் பெற்றுக்கொண்ட மக்கள் ஆணையின் பிரகாரம்தான் ஆட்சி நடைபெறுகிறது. இதனால் நாட்டின் சட்டம் வேறு திசைக்கு திரும்ப முடியாது.

உள்ளூராட்சி தேர்தல் பிரசாரம் ஆரம்பித்த போதே, சிலவேளையில் இந்த தேர்தலில் அரசு வெற்றிபெற்றால் தமிழ் ஈழக் கனவு நனவாகும் என்று முன்னாள் ஜனாதிபதி கூறியிருந்தார். அரசமைப்பு உருவாக்கப்படுமாக இருந்தாலும் தமிழ் ஈழம் மலரும் என்று கூறியிருந்தார்.

13ஆவது திருத்தச்சட்டத்திற்கு அப்பால் சென்று தீர்வை வழங்கப்போவதாகவும் அவர் கூறியிருந்தார். தற்போது நாடாளுமன்றத்தை அரசமைப்பு சபையாக மாற்றப்போவதனை அனைவரும் ஏற்றுக்கொண்டிருந்தனர். எதிரணியும் ஏற்றுக்கொண்டிருந்தனர். எவரும் எதிர்ப்புத் தெரிவிக்கவில்லை.

வழிநடத்தில் குழுபற்றியும் பேவில்லை. தற்போது திடீரென மஹிந்த ராஜபக்ஷ தமிழ் ஈழம் உருவாகின்றது என கூறுகிறார். அப்பாவி சிங்கள் மக்கள் மத்தியில் பிழையான தகவல்களை விதைக்கின்றனர். இதனைச் சொல்லி சொல்லிதான் தாமரை மொட்டுக்கு வாக்களிக்குமாறு மக்கள் மத்தியில் பிரசாரம் செய்தனர்.

தெற்கு அப்பாவி மக்கள் உண்மைகளை அறிய வேண்டும். பிழையான தேர்தல் பிரசாரத்தின் மூலமே பொதுஜன பெரமுன வெற்றிபெற்றது. தமிழ் ஈழத்தை தாமரை மொட்டுதான் கொடுக்கப்போகிறது.' என்றார்.

Comment (0) Hits: 146

இராணுவத்தின் பண்ணையில் தமிழர்களுக்கு வேலைவாய்ப்பு

யாழ்ப்பாணம் - பலாலிப் பிரதேசத்தில் மக்களின் காணிகளில் படையினரால் உருவாக்கப்பட்டுள்ள புதிய பண்ணைகளில் அந்த பிரதேச இளைஞர், யுவதிகளுக்கு வேலைவாய்ப்பை வழங்குவதாக இராணுவம் அறிவித்துள்ளது.

வலிகாமம் வடக்கில் 1990ஆம் ஆண்டு தொடக்கம் இராணுவத்தின் ஆக்கிரமிப்பில் உள்ள பலாலி பெருந்தளப் பிரதேசத்தில் படையினர் ஏற்கனவே விவசாய முயற்சிகள் மற்றும் கால்நடைப் பண்ணைகளை நடத்தி வருகின்றனர்.

வளம்மிக்க விவசாய நிலங்களை படையினர் விவசாய, மற்றும் பண்ணைத் தேவைகளுக்குப் பயன்படுத்தி வருவதற்கு கடும் எதிர்ப்புத் தெரிவிக்கப்பட்டு வரும் நிலையில், அங்கு பாரிய தென்னந்தோட்டம் ஒன்றை உருவாக்கும் புதிய நடவடிக்கையில் இராணுவம் ஈடுபட்டுள்ளது.

கடந்தவாரம் பலாலி பெருந்தளப் பகுதியில் பொதுமக்களின் காணிகளில், 8000 தென்னங்கன்றுகள் இராணுவத்தினரால் நடப்பட்டுள்ளன.

இந்த தென்னந்தோட்டத்தைக் கொண்ட இராணுவப் பண்ணையில் பணியாற்றுவதற்காக, முன்னாள் போராளிகள் உள்ளிட்ட 50 தமிழ் இளைஞர், யுவதிகள் படையில் சேர்த்துக் கொள்ளப்பட்டுள்ளனர்.

இராணுவ கடமையல்லாத, பண்ணைக் கூலிகள் போன்ற பணிகளில் ஈடுபடுவதற்காக சேர்த்துக் கொள்ளப்பட்டுள்ள 50 தமிழ், இளைஞர் யுவதிகளுக்கும், 40 ஆயிரம் ரூபா ஊதியம் மற்றும் ஏனைய சலுகைகள் வழங்கப்படும் என்றும் அறிவிக்கப்பட்டுள்ளது.

Comment (0) Hits: 131

நெருக்கடிகளுக்கு மத்தியில் கூடிய நாடாளுமன்றம் ஒத்திவைப்பு

அரசின் நெருக்கடிகளுக்கு மத்தியில் இன்று திங்கட்கிழமை காலை 10 மணிக்கு கூடிய நாடாளுமன்றம் பல்வேறு கருத்து முரண்பாடுகளுக்கு மத்தியில் தற்காலிகமாக இடைநிறுத்தப்பட்டுள்ளது.

புதிய பிரதமர் நியமனம் மற்றும் அரசாங்கத்தின் பொரும்பான்மையை நிரூபித்தல் போன்ற விடயங்களில் அரச தரப்பிற்கும் எதிர்த்தரப்பிற்கும் இடையில் வாதப் பிரதிவாதங்கள் இடம்பெற்ற நிலையில், சபாநாயகர் கரு ஜயசூரிய 15 நிமிடங்களுக்கு சபையை ஒத்திவைத்தார்.

குறிப்பாக தற்போதைய அரசியல் நெருக்கடி தொடர்பாக விவாதம் ஒன்றை நடத்துமாறு கூட்டு எதிர்க்கட்சி நாடாளுமன்ற உறுப்பினர் தினேஸ் குணவர்த்தன வேண்டுகோள் விடுத்தார். அதனையடுத்து ஏற்பட்ட குழப்பத்தினால் கட்சித் தலைவர்கள் கூட்டத்தை கூட்டுவதற்கு சபாநாயகர் அறிவித்தார்

சபையில் குழப்பம் ஏற்பட்டதால், கட்சித் தலைவர்கள் கூட்டத்தில் பேசி முடிவெடுப்பதாக கூறிய சபாநாயகர், கூட்டத்திற்கு வருமாறு அனைத்துக் கட்சித் தலைவர்களுக்கும் அழைப்பு விடுத்தார்.

அரசியல் பரபரப்பிற்கு மத்தியில் இன்று முற்பகல் கூடிய நாடாளுமன்றம் முதல் 10 நிமிடம் வரை தினப்பணிகளுக்காக அமைதியாக இடம்பெற்றது.

ஜனாதிபதி மைத்திரிபால சிறிசேன தலைமையில் நேற்று இரவு இடம்பெற்ற கூட்டத்தில் பிரதமர் ரணில் விக்கிரமசிங்க, சபாநாயகர் கரு ஜயசூரிய ஆகியோர் கலந்து கொண்ட போதும் இறுதி முடிவுகள் எதுவும் எடுக்கப்படவில்லை.

அதேவேளை ரணில் விக்ரமசிங்க பிரதமராக தொடர வேண்டும் என ஸ்ரீலங்கா சுதந்திரக் கட்சியின் மூத்த அமைச்சர்கள் சிலர் விருப்பம் வெளியிட்டுள்ளமை குறிப்பிடத்தக்கது.

Comment (0) Hits: 138

கிளிநொச்சியில் உயிருடன் நகரும் அரசமரம் காலூன்றப் போவது எங்கே?

கிளிநொச்சி - இரணைமடு குளத்திற்கு அண்மையில் அமைக்கப்பட்டிருந்த புத்தர் சிலை அண்மையில் அங்கிருந்து அகற்றப்பட்ட நிலையில், அப்பகுதியில் வளர்க்கப்பட்ட அரச மரமும் தற்போது உயிரோடு அகற்றப்படவுள்ளது.

அப்பகுதியில் இராணுவத்தினரால் வளர்க்கப்பட்டுவந்த அரசமரத்தை உயிருடன் நகர்த்துவதற்கான முயற்சிகள் மேற்கொள்ளப்பட்டுள்ளன.

பௌத்த மக்களே இல்லாத தமிழ் மக்களது பூர்வீக நிலமான இரணைமடு குளத்திற்கு அருகில், கடந்த 2009 ஆம் ஆண்டுக்கு பின்னர் புத்தர் சிலை அமைக்கப்பட்டுள்ளதுடன், அங்கு புதிதாக அரச மரங்களும் நாட்டப்பட்டு இலங்கை இராணுவத்தினரால் வழிபாடுகள் மேற்கொள்ளப்பட்டுவந்தன.

இரணைமடுப்பகுதியில் புத்தர் சிலை உட்பட அரச மரங்கள் நாட்டப்பட்டமைக்கு கடும் எதிர்ப்பு வெளியிட்டப்பட்டு வந்த போதிலும் அது குறித்து எவரும் எவ்வித கவனமும் செலுத்தவில்லை.

இந்நிலையில் இரணைமடு குளத்தின் அபிவிருத்தி வேலைகள் ஆரம்பமானதைத் தொடர்ந்து அங்கு வைக்கப்பட்டிருந்த புத்தர் சிலை அங்கிருந்து அகற்றப்பட்டதைத் தொடர்ந்து தற்போது அங்கிருந்த அரச மரத்தையும் உயிருடன் நகர்த்துவதற்கு திட்டமிடப்பட்டுள்ளது.

புத்தர் சிலை ஏற்கனவே அகற்றப்பட்டுள்ள நிலையில், அரசமரமும் அகற்றப்படவுள்ளமையானது அங்குள்ள மக்கள் மத்தில் சந்தேகத்தை ஏற்படுத்தியுள்ளது. அதாவது இவ்வாறு அகற்றப்படும் புத்தர் சிலை வேறு எங்காவது ஒரு இடத்தில் புதிதாக உருவாக்கப்படலாம் என்று சந்தேகம் எழுந்துள்ளது.

வடக்கு, கிழக்கு மாகாணங்களில் 1000 பௌத்த விகாரைகளை அமைப்பதற்கு 500 மில்லியன் ரூபா நிதி ஒதுக்கப்பட்டுள்ளதாக இலங்கைப் பிரதமரும் அரசாங்கத்தின் பங்காளிக் கட்சிகளில் ஒன்றான ஐக்கிய தேசியக் கட்சியின் தலைவருமான ரணில் விக்கிரமசிங்க தெரிவித்திருந்த நிலையில், இந்த சம்பவமானது மக்கள் மத்தியில் பெரும் சந்தேகத்தை ஏற்படுத்தியுள்ளமை குறிப்பிடத்தக்கது.

 

Comment (0) Hits: 189

குற்றச் செயலுக்காக பொறுப்பு வகிக்கும் குறைந்தபட்ச வயதெல்லை அதிகரிப்பு

குற்றச்செயல் ஒன்றிற்கான பொறுப்பினை வகிக்கும் குறைந்த வயதெல்லையை அதிகரிப்பதற்குரிய 1979 ஆம் ஆண்டின் 15ம் இலக்க குற்றவியல் நடைமுறைச்சட்டத்தினை திருத்தம் செய்ய அரசாங்கம் தீர்மானித்துள்ளது.

இலங்கை சட்டத்தின் அடிப்படையில் 08 வயதுக்கு குறைந்த குழந்தைகளுக்கு குற்றத்துக்கான பொறுப்புக்கள் சுமத்தப்படாது. எனினும் இது மிகக் குறைந்த வயதாக உளவியல் வைத்தியர்கள் மற்றும் அதனுடன் தொடர்பான நிபுணர்களின் எண்ணமாகும்.

அதனடிப்படையில், ஆகக்குறைந்த வயதெல்லையை 12 வயதாக அதிகரிப்பதற்கும், 12 வயதுக்கு அதிகமான மற்றும் 14 வயதுக்கும் குறைந்த பிள்ளைகளுக்கு குறித்த குற்றம் தொடர்பிலான புத்திக் கூர்மை காணப்பட்டதா என்பதை கணிப்பிடும் அதிகாரத்தினை மாவட்ட நீதவான்களுக்கு வழங்கும் வகையில், 1979 ஆம் ஆண்டின் 15ஆம் இலக்க குற்றவியல் நடைமுறைச்சட்டத்தினை திருத்தம் செய்வது தொடர்பில் தயாரிக்கப்பட்டுள்ள சட்டமூலத்தினை அரசாங்க வர்த்தமானியில் பிரசுரிப்பதற்கும், பின்னர் அங்கீகாரத்தினை பெற்றுக் கொள்வதற்காக நாடாளுமன்றத்தில் சமர்ப்பிப்பதற்காக நீதியமைச்சர் தலதா அதுகோரல வழங்கிய ஆவணங்களுக்கு அமைச்சரவை அங்கீகாரம் வழங்கியுள்ளது.

Comment (0) Hits: 125

ஆட்சியமைப்பதை இலக்காக கொண்டவர்கள் எதைப்பற்றியும் சிந்திக்க மாட்டார்கள்

உள்ளூராட்சி சபைகளில் ஆட்சியமைப்பதை மட்டுமே இலக்காகக் கொண்டவர்கள் எவருடைய காலைப் பிடித்தென்றாலும் ஆட்சியமைப்பார்கள். கட்சியைப் பற்றியோ கொள்கை பற்றியோ அவர்கள் சிந்திக்க மாட்டார்கள் என வடமாகாண முதலமைச்சர் சி.வி.விக்னேஸ்வரன் தெரிவித்தார்.

அவ்வாறான நிலைப்பாடு காலப்போக்கில் அவர்களுக்கே பாதிப்பை உண்டாக்கும் எனவும் இதற்கு நல்லாட்சி அரசாங்கம் சிறந்த உதாரணம் எனவும் சுட்டிக்காட்டினார்.

நடைபெற்று முடிந்த உள்ளூராட்சி சபைத் தேர்தலில் வடக்கில் பெரும்பாலான சபைகளில் எந்தக் கட்சியும் அறுதிப் பெரும்பான்மையுடன் ஆட்சியமைக்க முடியாத நிலை ஏற்பட்டுள்ளது. இந்நிலையில் தமிழ்த் தேசிய நிலைப்பாட்டில் இயங்கும் கட்சிகள் ஒன்றிணைந்து செயற்படவேண்டும் என பல்வேறு தரப்பினரும் வலியுறுத்தி வருகின்றனர்.

இந்நிலையில் இதுகுறித்து வினவியபோதே அவர் மேற்கண்டவாறு தெரிவித்தார்.

தமிழ்த் தேசிய நிலைப்பாட்டில் உள்ள சகல கட்சிகளும் ஒன்றிணையவேண்டும்என முன்னரும் பல தடவைகள் தான் கூறியதாக குறிப்பிட்ட அவர், அந்தக் கருத்து இப்போது பலராலும் வலியுறுத்தப்படுவதாக சுட்டிக்காட்டினார்.

தேசியத்துடன் சம்மந்தப்பட்ட சகல கட்சிகளும் எழுத்துமூலமாக வெளியிடும் ஆவணங்கள் அல்லது தேர்தல் விஞ்ஞாபனங்களில், கொள்கை ரீதியான ஒன்றுமை உள்ளதாகவும் ஆனால் தனிப்பட்ட முறையில் அவர்களுடைய அரசியல் செயற்பாடுகளில் கொள்கை ரீதியான வேறுபாடுகள் காணப்படுகின்றன எனவும் விக்னேஸ்வரன் சுட்டிக்காட்டினார்.

உள்ளுராட்சி சபைகளில் கட்சிகள் இணைவது அல்லது பிரிவது குறித்து இப்போது ஒன்றும் கூற இயலாது என குறிப்பிட்ட முதலமைச்சர், இறுதியாக அவர்கள் என்ன அடிப்படையில் தீர்மானம் எடுக்கப்போகிறார்கள் என்பது எமக்குத் தெரியாது என கூறியுள்ளார்.

ஆனால் எப்பாடுபட்டேனும் ஆட்சியைப் பிடிக்க வேண்டும் என்பதை மட்டும் இலக்காக கொண்டவர்கள் எவருடைய காலைப் பிடித்தாவது ஆட்சியமைத்து விடுவார்கள் எனவும், அவர்கள் கட்சியைப் பற்றியோ கொள்கையை பற்றியோ சிந்திக்க மாட்டார்கள் என்றும் சுட்டிக்காட்டினார்.

Comment (0) Hits: 165

பதவியா அல்லது சிறையா? விரட்டப்பட்டுள்ள ரணில்

நாட்டில் தற்போது நிலவிவரும் அசாதாரண சூழ்நிலையை அடுத்து பிரதமர் ரணில் விக்கிரமசிங்கவுக்கு இரண்டு வழிகளே உள்ளதாக, ஜனாதிபதி செயலகத்தில் பணியாற்றிவரும் அதிகாரி ஒருவரால் செயற்படுத்தப்படும் இணையத்தளமொன்று செய்தி வெளியிட்டுள்ளது.

ஜனாதிபதியின் கோரிக்கையை அடுத்து பிரதமர் ரணில் விக்கிரமசிங்க பதவி விலகாததை அடுத்து, அவர் தன்னுடைய பிரதமர் பதவியை இழப்பது மாத்திரமன்றி ஐக்கிய தேசியக் கட்சியின் தலைமைப் பதவியையும் மரியாதையையும் இழக்க நேரிடும் என்று அந்த இணையத்தள செய்தியில் எச்சரிக்கை விடுக்கப்பட்டுள்ளது.

அத்துடன், பிணைமுறி மோசடி தொடர்பான குற்றச்சாட்டிலிருந்து அவரை விடுவிக்க வேண்டுமாயின் அவர் கௌரவமாக தற்போது விடுக்கப்பட்டுள்ள வேண்டுகோளை ஏற்று செயற்பட வேண்டுமென வலியுறுத்தப்பட்டுள்ளது.

அதுமாத்திரமன்றி பிரதமர் மரியாதையாக வீடு செல்வாரா அல்லது ஐக்கிய தேசியக் கட்சி அரசாங்கத்தையும் அழித்து சிறைக்குச் செல்வாரா என்று கேள்வி எழுப்பியுள்ள அந்த இணையத்தளம், அந்த முக்கிய முடிவு பிரதமரின் கையிலேயே தங்கியுள்ளது என்றும் தெரிவித்துள்ளது.

Comment (0) Hits: 131

காபந்து அரசாங்கத்துக்கு ஐக்கிய மக்கள் சுதந்திர முன்னணி தயார்

தேர்தல் நடைபெறும் என உறுதியளிக்கப்படுமிடத்து, முன்னாள் ஜனாதிபதி மகிந்த ராஜபக்ச தற்காலிக காபந்து அரசாங்கத்தை அமைப்பதற்கு ஜனாதிபதி மைத்திரிபால சிறிசேனவுடன் உடன்பட்டுள்ளதாக தெரிவிக்கப்பட்டுள்ளது.

இதேவேளை இந்த அரசாங்கமானது ஐக்கிய மக்கள் சுதந்திர முன்னணியினால் நடத்தப்படும் என தீர்மானம் எட்டப்பட்டுள்ளது.

ஐக்கிய மக்கள் சுதந்திரக் கூட்டமைப்பு அமைச்சர்கள் மற்றும் நாடாளுமன்ற உறுப்பினர்களுக்கிடையே நேற்று முன்தினம் மாலை சந்திப்பொன்று நடைபெற்றது.

இதன்போது காபந்து அரசாங்கமொன்றுக்கான திட்டமொன்று சமர்ப்பிக்கப்பட்டதையடுத்து, பல்வேறு நிபந்தனைகளின் பின்னர் இந்த முடிவு ஏற்றுக்கொள்ளப்பட்டு, ஸ்ரீலங்கா சுதந்திரக் கட்சி உறுப்பினர்களால் மகிந்த ராஜபக்சவுக்கு இறுதி தீர்மானம் குறித்து தெரிவிக்கப்பட்டது.

அதன் பிரகாரம் பல்வேறு நிபந்தனைகள் ஏற்றுக்கொள்ளப்பட்டதுடன் அவற்றில் பொதுத்தேர்தலை திட்டமிட்ட காலத்திற்கு முன்னதாக நடத்துதல் என்பது ஏற்றுக்கொள்ளப்பட்டதாக தெரிவிக்கப்படுகின்றது. அத்துடன் கூட்டாட்சி ஒன்றும் அமையவுள்ளதாக தெரிவிக்கப்படுகின்றமை குறிப்பிடத்தக்கது.

Comment (0) Hits: 144

ஆரம்ப கைத்தொழில் பிரதியமைச்சராக முத்து சிவலிங்கம் நியமனம்

இலங்கை தொழிலாளர் காங்கிரஸின் தலைவர் முத்து சிவலிங்கம் ஆரம்ப கைத்தொழில் பிரதியமைச்சராக பதவியேற்றுள்ளார். 

இவருக்கான நியமனக் கடிதத்தை ஜனாதிபதி மைத்திரிபால சிறிசேன இன்றைய தினம் வழங்கிவைத்தார். 

Comment (0) Hits: 117

Page 93 of 101