V2025

செய்திகள்

இந்திய வெளியுறவுத்துறை அமைச்சர் இலங்கைக்கு திடீர் விஜயம்!

இந்திய வெளிவிவகார அமைச்சர் எஸ்.ஜெய்சங்கர் அவசர விஜயமாக இலங்கைக்கு வருகை தந்துள்ளதாக வெளிவிவகார அமைச்சு தெரிவித்துள்ளது.

இலங்கையில் ஜனாதிபதித் தேர்தல் இடம்பெற்று நிறைவடைந்துள்ள நிலையில், புதிய ஜனாதிபதியாக கோத்தாபய ராஜபக்ஷ பதவியேற்று இன்றைய தினம் உத்தியோகபூர்வமாக தனது கடமைகளைப் பொறுப்பேற்றுள்ள நிலையில், இந்திய வெளிவிகார அமைச்சரின் வருகை பெரும் முக்கியத்துவமாக நோக்கப்படுகின்றது.

இந்திய பிரதமரின் விசேட பணிப்பின் பேரிலேயே இலங்கை வந்துள்ள அவர், இன்றிரவு ஜனாதிபதி கோத்தாபயவை சந்திக்கவுள்ளார்.

அத்துடன், பிரதமர் ரணில் விக்கிரமசிங்க மற்றும் எதிர்க்கட்சித் தலைவரையும் ஜெய்ஷங்கர் சந்திப்பாரென தகவல்கள் தெரிவிக்கின்றன.

Comment (0) Hits: 99

ஜனாதிபதிக்கு கஃபே அமைப்பு விடுத்துள்ள முக்கிய வேண்டுகோள்!

ஆட்சிக்காலம் முடிவடைந்துள்ள மாகாண சபைகளுக்கான தேர்தலை நடத்துமாறு வலியுறுத்தி, புதிதாக பதவியேற்றுள்ள ஜனாதிபதி கோட்டாபய ராஜபக்ஷவிற்கு கஃபே அமைப்பின் நிறைவேற்றுப் பணிப்பாளர் அஹமட் மனாஸ் மக்கீன் இன்று (19) கடிதமொன்றை அனுப்பிவைத்துள்ளார்.

அக்கடித்தத்தில் தெரிவிக்கப்பட்டுள்ளதாவது;

ஜனாதிபதித் தேர்தல் நடைபெற்று முடிந்துள்ள நிலையில், தற்போது பலர் பொதுத் தேர்தலை நடத்துவது தொடர்பாக கரிசனை கொண்டுள்ளதை அவதானிக்கக்கூடியதாக உள்ளது. அரசியல் ரீதியான சாதகமான பெறுபேற்றை அடைந்துகொள்ளும் வகையில், அதற்கேற்றவாறான தேர்தல்களை முதலில் நடத்திப் பார்ப்பது அரசியல் கலாசாரமாக காணப்படுகின்றது. கடந்த அரசாங்கமும் இந்த நடைமுறையை பின்பற்றியிருந்தமை வெளிப்படையான உண்மை.

ஆனாலும், தற்போது மாகாண சபைகளின் ஆட்சி அதிகாரம் ஆளுநர்களுக்கு வழங்கப்பட்டு, அவர்களின் கட்டுப்பாட்டின் கீழேயே மாகாண சபைகள் காணப்படுகின்றன. மேலும், மாகாண சபை அரசியல் மயப்படுத்தப்பட்டுள்ளது. இந்த சூழ்நிலையை ஒரு ஜனநாயக செயன்முறையாக கருத முடியாது. எனவே, மாகாண சபை தேர்தல்களை உடனடியாக நடத்தி, ஜனநாயகத்தை நிலைநாட்ட நடவடிக்கை எடுப்பது மிகவும் அவசியமான செயற்பாடாகும்.

இம்முறை ஜனாதிபதித் தேர்தல் முடிவுகள் அதிகாரப்பூர்வமாக அறிவிக்கப்பட்ட சந்தர்ப்பத்தில், தேர்தல்கள் ஆணைக்குழுவின் தலைவர் மஹிந்த தேசப்பிரிய, "காணாமல் போன மாகாண சபை தேர்தல்களை" நடத்த வேண்டிய அவசியம் உள்ளது என்பதை வலியுறுத்தினார். இதற்கு முன்னரான அரசாங்கங்கள், தங்களுக்கு ஏற்ற வகையில் மாகாண சபை தேர்தல்களை நடத்தியதோடு, காலத்தையும் பணத்தையும் வீணடித்ததை நாம் அவதானித்தோம்.

எனவே, இது தொடர்பாக துரிதமாக ஆராய்ந்து மாகாண சபை தேர்தலை விரைந்து நடத்துவதற்கான நடவடிக்கையை மேற்கொள்ளுமாறு தயவுடன் கேட்டுக்கொள்கின்றோம்.

Comment (0) Hits: 75

ஞானசார தேரரின் புதிய அறிவிப்பு! (VIDEO)

நாடாளுமன்றத்திற்கான பொதுத் தேர்தலின் பின்னர், பொதுபல சேனா அமைப்பை கலைக்க போவதாக அவ் அமைப்பின் பொதுச் செயலாளர் கலகொட அத்தே ஞானசார தேரர் தெரிவித்துள்ளார்.

இராஜகிரியவில் அமைந்துள்ள பொதுபலசேனாவின் காரியாலயத்தில் இன்று (19) இடம்பெற்ற ஊடகவியலாளர்  சந்திப்பிலேயே அவர் இதனை கூறியுள்ளார்.

அவர் மேலும் தெரிவிக்கையில்,

"சிறுபான்மை மக்களின் வாக்குகள் இன்றி எமது நாட்டில் அரசாங்கம் ஒன்றை அமைக்க முடியாது என்ற மாயையான நிலைப்பாடு இருந்தது. ஜனாதிபதித் தேர்தலுடன் அது கட்டுக்கதையாக மாறியுள்ளது. தற்போது நாட்டிற்கு சிறந்த தலைமைத்துவம் கிடைத்துள்ளது.

எமது புதிய ஜனாதிபதி அவரது பதவியை பொறுப்பேற்றதை அடுத்து கருத்து தெரிவித்தபோது, பௌத்த சாசனத்தை பாதுகாப்பதாகவும், மாகாநாயக்க தேரர்களின் ஆசிர்வாத்தினாலேயே தாம் வெற்றி பெற்றதாகவும் தெரிவித்திருந்தார். இதுவே எமக்கு கிடைத்த பெரும் வெற்றி. இவ்வாறான தலைவர் ஒருவர் எமக்கு கிடைத்துள்ள நிலையில், நாங்கள் இனியும் சங்கங்களை அமைத்துக்கொண்டு செயற்பட வேண்டிய அவசியமில்லை. எமது புதிய தலைவர் நாட்டை பாதுகாப்பார் என்பதில் எமக்கு நம்பிக்கை உண்டு. அதனால், எதிர்வரும் பொதுத் தேர்தலின் பின்னர், நாங்கள் பொதுபலசேனா அமைப்பை கலைப்பதற்கு தீர்மானித்துள்ளோம்.

பொதுத் தேர்தலின் பின்னர், சிறந்த அமைச்சரவையுடன் சிறந்த பயணத்தை தொடர முடியும். 

ஆகவே, இனிமேல் எமது அமைப்பு அவசியமில்லை என நாங்கள் நம்புகிறோம். பொதுத் தேர்தலின் பின்னர், எமது அமைப்பை கலைத்து விடுவோம்" என ஞானசார தேரர் கூறினார்.

இதேவேளை, புதிய ஜனாதிபதி கோட்டாபய ராஜபக்ஷ தனது பதவிப்பிரமாணத்தின் பின்னரும், ஜனாதிபதி தேர்தலுக்கு முன்னராக ஞானசர தேரோவும் கூறிய ஒரே கதை குறித்த காணொளி பினவருமாறு...

Comment (0) Hits: 132

அமைச்சர் எரான் விக்ரமரத்ன இராஜினாமா!

தனது அமைச்சுப் பதவியிலிருந்து இராஜினாமா செய்துள்ளதாக, இராஜாங்க அமைச்சர் எரான் விக்ரமரத்ன தெரிவித்துள்ளார்.

இன்று (19) தனது உத்தியோகபூர்வமாக ட்விற்றர் கணக்கில் அவர் இதனை அறிவித்துள்ளார்.

ஜனாதிபதித் தேர்தலில் சஜித் பிரேமதாஸவுக்கு வாக்களித்த அனைவருக்கும் நன்றி தெரிவிப்பதாக அவர் தெரிவித்துள்ளார்.

அத்துடன், ஜனாதிபதியாக தேர்ந்தெடுக்கப்பட்ட கோட்டாபய ராஜபக்ஷ, எமது மக்களை ஒன்றிணைத்து, முன்னோக்கி செல்ல ஞானத்துடனும், பகுத்துணர்வுடனும் செயற்பட வாழ்த்துவதாகவும் அவர் அதில் சுட்டிக்காட்டியுள்ளார்.

ஜனாதிபதித் தேர்தலில் புதிய ஜனநாயக முன்னணியின் வேட்பாளர் சஜித் பிரேமதாஸ, தோல்வி அடைந்ததையடுத்து, தேர்தலுக்கு அடுத்த தினம் (17) ஏழு பேரும், நேற்றைய தினம் (18) இருவரும் என, அக்கட்சியில் அங்கம் வகிக்கும் 9 பேர் தங்களது அமைச்சுப் பொறுப்புகளிலிருந்து இராஜினாமா செய்துள்ள நிலையில், தற்போது எரான் விக்ரமரத்ன தனது அமைச்சுப் பொறுப்பிலிருந்து இராஜினாமா செய்துள்ளார். 10 பேர் இதுவரையில் இராஜினாமா செய்துள்ளமை குறிப்பிடத்தக்கது.

Comment (0) Hits: 105

ரணில் 'இராஜினாமா செய்தால்' பிரதமர் தினேஷ்! - வேண்டாம் என்கிறார் மஹிந்த!!

காபந்து அசராங்கத்தின் பிரதமர் பதவியை ஏற்றுக் கொள்ளப்போவதில்லை என எதிர்க்கட்சித் தலைவர் மஹிந்த ராஜபக்ஷ தீர்மானித்துள்ளதாக theleader.lk இணையத்தளம் செய்தி வெளியிட்டுள்ளது.

எதிர்வரும் சில மாதங்களில் பொதுத்தேர்தல் நடைபெறவுள்ள நிலையில், தற்பொழுது நிறுவப்படவுள்ள காபந்து அரசாங்கத்தின் பிரதமர் பதவியை தாம் ஏற்றுக்கொள்ளப் போவதில்லை என மஹிந்த தீர்மானித்துள்ளார் என குறிப்பிடப்படுகிறது.

இந்த காபந்து அரசாங்கத்தின் பிரதமர் பதவி தினேஷ் குணவர்தனவிற்கு வழங்கப்படும் என எதிர்பார்க்கப்படுகின்றது.

ஐக்கிய தேசியக் கட்சியில் ரணில் விக்ரமசிங்கவிற்கு எதிர்ப்பு வலுத்து, அவர் பிரதமர் பதவியை இராஜினாமா செய்தால் தற்காலிக அடிப்படையில், தினேஷ் குணவர்தன பிரதமராக நியமிக்கப்படலாம் என எதிர்பார்க்கப்படுகின்றது.

அமைச்சர்கள் நியமிப்பதில் காணப்படும் சில சிக்கல் நிலைமைகளின் காரணமாகவே, இவ்வாறு தினேஷ் குணவர்தனவிற்கு பிரதமர் பதவியை வழங்குவதற்கு மஹிந்த திட்டமிட்டுள்ளதாக அந்த இணையத்தளம் மேலும் தெரிவித்துள்ளது.

எவ்வாறெனினும், ரணில் பிரதமர் பதவியில் நீடிப்பாரா? அல்லது வேறு ஒருவர் நியமிக்கப்படுவாரா? என்பது குறித்து இன்னும் இறுதித் தீர்மானங்கள் எதுவும் எடுக்கப்படவில்லை என தெரிவிக்கப்படுகிறது.

 
 
Comment (0) Hits: 314

ஜனாதிபதி கோத்தாபயவினால் உடனடியாக வழங்கப்பட்ட நியமனங்கள்!

இலங்கை சோசலிச ஜனநாயக குடியரசின் 7 ஆவது நிறைவேற்றதிகார ஜனாதிபதியாக நேற்றைய தினம் சத்தியப் பிரமாணம் செய்துகொண்ட கோத்தாபய ராஜபக்ஷ, இன்றைய தினம் (19) காலி முகத்திடலில் உள்ள ஜனாதிபதி செயலகத்தில் தனது கடமைகளை உத்தியோகபூர்வமாக பொறுப்பேற்றுக்கொண்டார். 

இதையடுத்து உடனடியாக சில நியமனங்கள் ஜனாதிபதியினால் வழங்கி வைக்கப்பட்டுள்ளது.

அந்தவகையில், ஜனாதிபதியின் செயலாளராக பி.பீ ஜயசுந்தர நியமிக்கப்பட்டுள்ளார். 2015 ஆம் ஆண்டிற்கு முன்னர் இருந்த அரசாங்கத்தில் மத்திய வங்கியின், நிதி அமைச்சின் செயலாளராக இவர் கடமையாற்றி இருந்தார்.

நிதி அமைச்சின் செயலாளராகவும் திறைசேரியின் செயலாளராகவும் முன்னாள் மத்திய வங்கியின் பிரதி ஆளுனர் எஸ்.ஆர்.ஆட்டிகல நியமிக்கப்பட்டுள்ளார். இவர், மத்திய வங்கியில் 27 ஆண்டுகளுக்கு மேல் சேவையாற்றியுள்ளதுடன் பிரதி ஆளுநராக நியமிக்கப்படுவதற்கு முன்னர், இலங்கை மத்திய வங்கியின் உதவி ஆளுநர் பதவியினை வகித்து, திறைசேரிக்கான துணைச் செயலாளராக பணியாற்றுவதற்கு நிதி அமைச்சுக்கு விடுவிக்கப்பட்டிருந்தார்.

இதேவேளை, தொலைத்தொடர்பு ஒழுங்குமுறை ஆணையகத்தின் (TRC) பணிப்பாளர் நாயகமாக ஓசத சேனாநாயக்க நியமிக்கப்பட்டுள்ளார்.
 
அத்துடன், பாதுகாப்பு அமைச்சின் செயலாளராக மேஜர் ஜெனரல் கமல் குணரத்ன நியமிக்கப்பட்டுள்ளார். இவர் இறுதிப்போரின் போது இராணுவத்தின் 53 ஆவது படையணிக்கு தலைமை தாங்கி வழிநடத்தியமை குறிப்பிடத்தக்கது.
 
 
Comment (0) Hits: 139

ஜனாதிபதி கோட்டாபயவின் பதவிப் பிரமாண நிகழ்வில் கலந்துகொள்ளச் சென்ற ஐ.தே.கட்சி அமைச்சர்களுக்கு “ஹூ”(VIDEO)

(VIDEO)

இலங்கையின் ஏழாவது நிறைவேற்று அதிகார ஜனாதிபதியாக கோட்டாபய ராஜபக்ஷ நேற்று காலை அநுராதபுரம் ருவன்வெலி மஹாசேய முன்னால் பதவிப் பிரமாணம் செய்துகொண்டார்.

இந் நிகழ்வில் கலந்து கொண்ட ஐக்கிய தேசிய கட்சியின் முக்கியஸ்தர்கள் குழுவினருக்கு அந்நிகழ்வில் கலந்து கொண்டிருந்த பொது மக்களால் “ஹூ” கோசம் இடப்பட்டு எதிர்ப்பு தெரிவிக்கப்பட்டுள்ளது.

இந்நிகழ்வில் ஐக்கிய தேசிய கட்சியின் தலைவர் பிரதமர் ரணில் விக்ரமசிங்கவும் கலந்து கொண்டிருந்த போதிலும், அவருக்கு எவ்வித எதிர்ப்புக்களும் தெரிவிக்கப்படவில்லை.

இதேவேளை, புதிய ஜனாதிபதி கோட்டாபய ராஜபக்ஷவுக்கு வாழ்த்து தெரிவிப்பதற்காக ஐ.தே.கட்சியின் அமைச்சர்கள் பலர் முயற்சி செய்து கொண்டிருப்பதாக தெரிவிக்கப்படுகின்றது.

தொலைபேசி அழைப்புக்களை மேற்கொண்டு வாழ்த்துக்களைத் தெரிவிப்பவர்களும், நேரில் சென்று வாழ்த்துக்களைத் தெரிவிப்பதற்கு சந்தர்ப்பத்தைக் கேட்டு நிற்பவர்களும் அவர்களிடையே உள்ளதாகவும் தெரிவிக்கப்படுகின்றது. தற்போது ஐக்கிய தேசிய கட்சியின் அமைச்சர்கள் பலர் பகிரங்கமாகவே புதிய ஜனாதிபதிக்கு வாழ்த்துக்களைத் தெரிவித்து வருகின்றனர்.

Comment (0) Hits: 102

ஐ.தே.கட்சியினால் தேசிய அரசாங்கத்திற்கான யோசனை - அவசர பாராளுமன்றத் தேர்தலுக்கு ஸ்ரீ.ல.சு.கட்சி எதிர்ப்பு!

பாராளுமன்றத் தேர்தல் நடாத்தப்படும் வரையில் ஐ.தே.கட்சி - கூட்டணி தேசிய அரசாங்கம் ஒன்றை அமைப்பதற்கு ஐக்கிய தேசிய கட்சியினால் எதிர்கட்சித் தலைவருக்கு யோசனை ஒன்று முன்வைக்கப்பட்டுள்ளதாகத் தெரிவிக்கப்படுகின்றது.

19வது திருத்தத்தன் கீழ் பொதுத் தேர்தலில் தெரிவாகும் அரசாங்கத்தை நான்கரை வருடங்கள் நிறைவடையும் முன்னர் கலைப்பதற்கு ஜனாதிபதிக்கு அதிகாரங்கள் இல்லை. இதனடிப்படையில் குறித்த நான்கரை வருடங்கள் நிறைவடையும் அடுத்த வருடம் மார்ச் மாதத்திற்கு முன்னர் பாராளுமன்றத்தைக் கலைப்பதாயின் பாராளுமன்றத்தில் மூன்றில் இரண்டு பெரும்பான்மை பெறப்படல் வேண்டும்.

எவ்வாறாயினும் துரிதமாக பாராளுமன்றத் தேர்தலை நடாத்துவதற்கு ஸ்ரீலங்கா பொதுஜன பெரமுன கட்சியுடன் தொடர்புடைய தரப்பினரின் கவனம் செலுத்தப்பட்டுள்ளது. இதனடிப்படையில் ஐக்கிய தேசிய கட்சியின் ஒத்துழைப்பு இதற்கு கிடைக்கும் என்று பொதுஜன பெரமுனவுடன் தொடர்புடைய தரப்பினர் நம்பிக்கை தெரிவித்துள்ளனர்.

மக்கள் ஆணைக்கு மதிப்பளித்து பிரதமர் ரணில் விக்ரமசிங்க உள்ளிட்ட அரசாங்கம் பதவி விலகி, புதிய அரசாங்கத்தை அமைப்பதற்கு ஒத்துழைப்பை வழங்கும் என்றும் அவர்கள் நம்பிக்கை தெரிவித்துள்ளனர்.

இதே வேளை,  உரிய காலத்திற்கு முன்னர் அவசரமாக பாராளுமன்றத் தேர்தலை நடாத்துவதற்கு ஸ்ரீ.ல.சு.கட்சி எதிர்ப்பை தெரிவிப்பதற்கு தீர்மானித்துள்ளது. நேற்று அநுராதபுரத்தில் அமைந்துள்ள அக்கட்சியின் தேசிய அமைப்பாளர் துமிந்த சில்வாவின் வீட்டில் இடம்பெற்ற அக்கட்சி பாராளுமன்ற உறுப்பினர்களின் கூட்டத்தின் போதே இத்தீர்மானம் மேற்கொள்ளப்பட்டுள்ளது.

அவசர பாராளுமன்றத் தேர்தலை நடாத்துவதற்காக பாராளுமன்றத்தில் மூன்றில் இரண்டு பெரும்பான்மையினைப் பெறுவதற்கு ஆதரவை வழங்காதிருப்பதற்குத் தீர்மானித்துள்ள ஸ்ரீ.ல.சு.கட்சி பாராளுமன்ற உறுப்பினர்கள், இது தொடர்பில்  நேற்று இரவு கட்சியின் தலைவர் மைத்திரிபால சிரிசேனாவின் தலைமையில் கொழும்பில் இடம்பெறவிருந்த கூட்டத்தின் போது தீர்மானம் மேற்கொள்ள உள்ளதாகத் தெரிவிக்கப்படுகின்றது.

Comment (0) Hits: 155

ஜனாதிபதி கோட்டாவின் உரையின் முக்கிய ஏழு விடயங்கள்!

இலங்கையின் ஏழாவது நிறைவேற்று அதிகார ஜனாதிபதியாக கோட்டாபய ராஜபக்ஸ திங்கட்கிழமை காலை (18) அநுராதபுரம் ருவன்வெலி மஹாசேய முன்னால் பதவிப் பிரமாணம் செய்து கொண்டார்.

இந்நிகழ்வில் பிரதமர் ரணில் விக்ரமசிங்க, எதிர்கட்சி தலைவர் மஹிந்த ராஜபக்ஸ உள்ளிட்ட அரசியல் கட்சித் தலைவர்கள் மற்றும் மஹாநாயக்க தேரர்கள், சமயத் தலைவர்களும் கலந்து கொண்டிருந்தனர்.

தனது பதவிக்கான சத்தியப்பிரமாணத்தின் பின்னர் கோட்டாபய ராஜபக்ஸ ஜனாதிபதியாக முதற்தடவையாக நாட்டு மக்களுக்கு உரையாற்றும் போது கூறிய முக்கிய ஏழு விடயங்கள் வருமாறு,


01. வெற்றியின் பிரதான காரணி : பெரும்பான்மை சிங்கள் மக்கள்

தான் ஜனாதிபதியாக வெற்றி பெறுவதற்கு சிறப்பான பின்புலமாக அமைந்தது இலங்கையின் நாலா புறங்களிலும் உள்ள மகா சங்கத்தினர் தனக்கு வழங்கிய ஆசீர்வாதமே என தனது உரையைத் தொடங்கிய கோட்டாபய ராஜபக்ஸ, தனது வெற்றியின் பிரதான காரணி நாட்டின் பெரும்பான்மை சிங்கள மக்களே என்பதை தான் ஆரம்பத்திலிருந்தே அறிந்து கொண்டிருந்ததாகவும் கூறினார்.
 
02. தமிழ் மற்றும் முஸ்லிம் மக்களிடம் கோரிக்கை
 
தனது வெற்றியின் பங்காளர்களான ஆகிக் கொள்ளுமாறு தமிழ் முஸ்லிம் மக்களிடம் வேண்டிக் கொண்டதாக ஜனாதிபதி கோட்டாபய ராஜபகஸ இங்கு குறிப்பிட்டார். எனினும் தான் எதிர்பார்த்தவாறு அச்சமூகத்திடமிருந்து வரவேற்பு கிடைக்கவில்லை எனத் தெரிவித்த ஜனாதிபதி, இந்நாட்டின் புதிய ஜனாதிபதியாக உண்மையான இலங்கையர்களாக தன்னுடன் இணைந்து கொள்ளுமாறு முஸ்லிம் மற்றும் தமிழ் மக்களிடம் கோரிக்கை விடுத்தார்.
 
03. சமய மற்றும் தேசிய அடையாளங்களை பாதுகாத்து வாழக்கூடிய சூழல்
 
பௌத்த சிந்தனைகளைப் பாதுகாத்து போசிப்பதற்கும், சிங்கள கலாசாரம் மற்றும் மரபுகளைப் பாதுகாப்பதற்கு அரச அனுசரணையினை வழங்குவதாகவும் புதிய ஜனாதிபதி இங்கு குறிப்பிட்டார். அனைத்து இலங்கைப் பிரஜைகளுக்கும் தமது சமயம் மற்றும் தேசிய அடையாளங்களைப் பாதுகாத்து கௌரவமாக வாழக் கூடிய உரிமையினை பாதுகாப்பதாகவும் ஜனாதிபதி இதன் போது கூறினார்.
 
04. தேசிய பாதுகாப்பை உறுதிப்படுத்தல்
 
இலங்கை தீவிரவாதம், பாதாள உலகச் செயற்பாடுகள், கப்பம், போதைப் பொருள் வர்த்தகம், பெண்கள் மற்றும் சிறுவர் துன்புறுத்தல்கள் அற்ற பாதுகாப்பான நாட்டை கட்டியெழுப்புவதற்குத் தேவையான தேசிய பாதுகாப்பு பொறிமுறையினை மீண்டும் பலப்படுத்துவதாக புதிய ஜனாதிபதி இதன் போது கூறினார்.
 
05. கொள்கைப் பிரகடணத்தில் குறிப்பிட்ட அனைத்தையும் நிறைவேற்றுவதற்கான வாக்குறுதி
 
ஜனாதிபதி தேர்தலுக்காக முன்வைத்த தனது கொள்கைப் பிரகடணத்தில் குறிப்பிடப்பட்ட அனைத்து விடயங்களையும் தனது பதவிக் காலத்தினுள் நிறைவேற்றுவதாக மக்களுக்கு இதன் போது வாக்குறுதி வழங்குவதாக ஜனாதிபதி கூறினார். தனக்கு வாக்களித்த, வாக்களிக்காத அனைவரினதும் உரிமைகளைப் பாதுகாப்பதாகவும் புதிய ஜனாதிபதி இதன் போது கூறினார்.
 
06. வெளிநாடுகளிடம் கோரிக்கை
 

உலக அரசியலில் பல்வேறு நாடுகளுக்கிடையான அதிகாரப் போராட்டங்களில் இலங்கை தலையிடாது எனத் தெரிவித்த புதிய ஜனாதிபதி இலங்கையுடன் உறவுகளை ஏற்படுத்தும் போது இலங்கையின் இறைமை மற்றும் ஒருமைப்பாட்டுக்கும் மதிப்பளிக்குமாறு அனைத்து நாடுகளிடமும் கேட்டுக் கொண்டார்.
 

07. புதிய அரசாங்கத்தை அமைப்பேன்
 
தனது கொள்கைக்கு அமைய செயற்படக் கூடிய புதிய அரசாங்கத்தை அமைப்பதாகவும் புதிய ஜனாதிபதி இங்கு குறிப்பிட்டார். நான் இந்நாட்டின் நிறைவேற்று அதிகார ஜனாதிபதியாகும். நாட்டின் நலனுக்காக எனது நிறைவேற்று அதிகாரங்களை பயன்படுத்துவதற்கு நான் ஒரு போதும் பின்நிற்கப் போவதில்லை என்றும் அவர் இங்கு கூறினார்.
Comment (0) Hits: 126

ஜனாதிபதியாக பதவிப் பிரமாணம் செய்து கொண்டார் கோத்தாபய!

இலங்கை ஜனநாயக சேசலிசக் குடியரசின் 7 ஆவது நிறைவேற்றதிகார ஜனாதிபதியாக கோத்தாபய ராஜபக்ஷ சற்று முன்னர் பதவிப் பிரமாணம் செய்து கொண்டுள்ளார்.

இன்று காலை அனுராதபுரம் ருவன்வெலிசாயவுக்கு சென்ற கோத்தாபய ராஜபக்ஷ சற்று முன்னர் ஜனாதிபதியின் செயலாளர் உதய செனவிரத்ன முன்னிலையில் ஜனாதிபதியாக சற்று முன்னர் பதவிப் பிரமாணம் செய்து கொண்டுள்ளார்.

பௌத்தர்களின் புனித பூமியான சரித்திரம் வாய்ந்த அநுராதபுரம் ருவன்வெலி மகாசாய பௌத்த விஹாரை வளாகத்தில் இந்த பதவி பிரமாண நிகழ்வு முற்பகல் 11.30 மணியளவில் நடைபெற்றது.

முன்னாள் ஜனாதிபதியும், எதிர்க்கட்சித் தலைவரும், கோத்தாபய ராஜபக்ஷவின் சகோதரருமான மஹிந்த ராஜபக்ஷவின் 74 ஆவது பிறந்தநாள் நிகழ்வுகளுடன் இந்த பதவி பிரமாணம் இடம்பெற்றது.

பதவி பிரமாண நிகழ்வுக்கு முன்னர் கோத்தாபய ராஜபக்ஷ, பௌத்தர்களின் புனித தலங்களான ருவன்வெலி மகாசாய மற்றும் ஸ்ரீமகா போதி ஆகிய விஹாரைகளுக்கு சென்று வழிபாடுகளில் ஈடுபட்டார்.

இந்த நிகழ்வில் பிரதமர் ரணில் விக்கிரமசிங்க முன்னாள் ஜனாதிபதி மஹிந்த ராஜபக்ஷ, பஷில் ராஜபக்ஷ உள்ளிட்ட குடும்ப உறுப்பினர்கள், அரசியல்வாதிகள், வெளிநாட்டு தூதுவர்கள், சமயத் தலைவர்கள் என பலரும் கலந்துகொண்டனர்.

இலங்கையில் மன்னராட்சிக் காலத்தில் தலைநகரமாக விளங்கிய அநுராதபுரத்தில் இருந்த பௌத்த விஹாரையாக ருவன்வெலி மகாசாய விளங்குகின்றது.

புத்த பெருமான் ஞானம் பெற்றதாக நம்பப்படும் வெள்ளரசு மரம் அநுராதபுரத்திலுள்ள ஸ்ரீமகாபோதி விஹாரையிலேயே உள்ளது.

இந்த ஸ்ரீமகாபோதி மற்றும் ருவன்வெலி மகாசாய ஆகிய விஹாரைகள் இரண்டும் ஒன்றுடன் ஒன்று இணைந்தே காணப்படுகின்ற பின்னணியில், இந்த விஹாரைகள் பௌத்த மதத்தை பின்பற்றுவோர் மத்தியில் மிகவும் நம்பிக்கை வைக்கக்கூடிய புனித ஸ்தலங்களாக விளங்குகின்றன.

இந்த விஹாரையுடன் சீமமாலக்க என்ற கட்டிடமொன்று அமைந்துள்ளது. குறித்த கட்டிடத்தின் ஒரு பக்கம் 400 அடி நீளமானதுடன், அதில் ஒரு பக்கத்தில் மாத்திரம் 40 தூண்கள் வரிசையாக அரசர்கள் காலத்தில் நிர்மாணிக்கப்பட்டுள்ளது.

இதன்படி, குறித்த கட்டடமானது 1600 தூண்களுடன் அமைக்கப்பட்ட மிகவும் பழமை வாய்ந்த கட்டிடமாகத் திகழ்கிறது.

ருவன்வெலி மகாசாய பௌத்தர்களின் சின்னமாக விளங்குவது மற்றும் சிங்கள மன்னர்களால் அநுராதபுர யுகம் வெற்றிகரமாக முன்னெடுக்கப்பட்ட ஆட்சியாக வரலாற்றில் குறிக்கப்படுவது ஆகிய காரணங்களே தமது பதவிப் பிரமாண நிகழ்வுக்கு இந்த இடத்தை கோத்தாபய தேர்ந்தெடுத்ததற்கு காரணமாக இருக்கும் என்று கருதப்படுகிறது.

அநுராதபுரத்தை ஆட்சி செய்த மன்னர்கள் மிகப் பழைமை வாய்ந்த தொழில்நுட்பங்களை பயன்படுத்தியுள்ளதால், ருவன்வெலி மகாசாயவிலிருந்து பதவிப் பிரமாணம் செய்வது மிக சிறந்த ஆட்சி முறையை ஏற்படுத்தும் என்ற நம்பிக்கையிலேயே  அங்கு பதவி பிரமாண நிகழ்வு ஏற்பாடு செய்யப்பட்டுள்ளதாக ஸ்ரீலங்கா பொதுஜன பெரமுனவின் ஊடகப் பேச்சாளர் டலஸ் அழகப்பெரும தெரிவித்தார்.

 
Comment (0) Hits: 70

இராஜினாமா செய்த சம்பிக்க, அசோக் அபேசிங்க!

மெகா பொலிஸ், மாநகரங்கள் மற்றும் மேற்கு அபிவிருத்தி அமைச்சர் சம்பிக்க ரணவக்க தனது அமைச்சுப் பதவியை இராஜினாமா செய்துள்ளார்.

அத்துடன் போக்குவரத்து மற்றும் சிவில் விமானச் சேவைகள் இராஜாங்க அமைச்சர் அசோக் அபேசிங்க தனது அமைச்சுப் பதவியை இராஜினாமா செய்துள்ளார்.

தனது இராஜினாமா கடிதத்தினை இன்று மாலை ஜனாதிபதி செயலகத்துக்கு அனுப்பி வைக்கவுள்ளதாகவும் தகவல்கள் வெளியாகியுள்ளது.

இதேவேளை அமைச்சர்களான மங்கள சமரவீர, கபீர் ஹாசிம், ஹரீன் பெர்னாண்டோ, மலிக் சமரவிக்ரம ஆகியோரும் இராஜாங்க அமைச்சரான ருவான் விஜேவர்தனவும் அமைச்சரவை அந்தஸ்தற்ற அமைச்சரான அஜித் பி பெரேரா ஆகியோரும் தமது அமைச்சுப் பதவிகளை இராஜினாமா செய்துள்ளமை குறிப்பிடத்தக்கது.

Comment (0) Hits: 138

அவசர பாராளுமன்றத் தேர்தலுக்கு ஆரூடம்!

ஜனநாயகத்தை மதிக்கும் நாம் அடுத்து நடைபெறவுள்ள பாராளுமன்றத் தேர்தல் தொடர்பில் சபாநாயகர் மற்றும் கட்சித் தலைவர்களுடனும், ஆளும் கட்சி பாராளுமன்ற உறுப்பினர்களுடன் பேசி தீர்மானம் ஒன்றை மேற்கொள்வதாக பிரதமர் ரணில் விக்ரமசிங்க விசேட அறிக்கை ஒன்றை வெளியிட்டுத் தெரிவித்துள்ளார்.

அத்துடன் இலங்கையின் ஏழாவது நிறைவேற்று அதிகார ஜனாதிபதியாகத் தெரிவாகியுள்ள கோட்டாபய ராஜபக்சவுக்கு பிரதமர் இதன் போது வாழ்த்துக்களையும் தெரிவித்துள்ளார்.

Comment (0) Hits: 104

சஜித் ஐ.தே.க பிரதித் தலைவர் பதவியிலிருந்து விலக முடிவு!

இதுவரை கிடைத்த ஜானாதிபதி தேர்தல் முடிவுகளின் அடிப்படையில் ஐக்கிய தேசிய கட்சியின் பிரதித் தலைவர் பதவியை இராஜினாமா செய்ய சஜித் பிரேமதாச முடிவு செய்துள்ளார்.

இது தொடர்பில் அறிக்கை ஒன்றை வெளியிட்டுள்ள அவர் மேலும் தெரிவித்துள்ளதாவது,

கடுமையாக போராடிய மற்றும் உற்சாகமான தேர்தல் பிரச்சாரத்தின் முடிவில், மக்களின் முடிவை மதித்து, இலங்கையின் ஏழாவது ஜனாதிபதியாக திரு. கோட்டபய ராஜபக்ஷ தேர்ந்தெடுக்கப்பட்டதற்கு எனது வாழ்த்துக்கள்.

எனக்கு வாக்களித்த எங்கள் குடிமக்கள் அனைவருக்கும், தீவின் எல்லா மூலைகளிலும் எனது மனமார்ந்த நன்றியைத் தெரிவித்துக் கொள்கிறேன். நீங்கள் என் மீது நம்பிக்கை வைத்ததற்கு நான் தாழ்மையுடன் இருக்கிறேன்.

எனது ஆதரவு எனது இருபத்தி ஆறு ஆண்டுகால அரசியல் வாழ்க்கை முழுவதும் பலத்தின் நீரூற்று. எனது பிரச்சாரத்தில் அயராது உழைத்த அனைவருக்கும் எனது நன்றியை பதிவு செய்ய விரும்புகிறேன். உங்கள் தியாகத்தையும் அர்ப்பணிப்பையும் எனது குடும்பமும் நானும் ஒருபோதும் மறக்க மாட்டேன்.

எங்கள் சுதந்திர குடியரசின் வரலாற்றில் மிகவும் அமைதியான ஜனாதிபதித் தேர்தலை நாங்கள் கண்டிருக்கிறோம். இது கடந்த ஐந்து ஆண்டுகளில் நிகழ்ந்த ஜனநாயக ஆதாயங்கள் மற்றும் நிறுவன சீர்திருத்தங்களின் விளைவாகும், இது ஒரு சுயாதீன தேர்தல் ஆணையத்திற்கு அதிகாரம் அளித்தது மற்றும் சட்டத்தின் ஆட்சியை மீட்டெடுத்தது.

உள்வரும் ஜனாதிபதியிடம் எனது வேண்டுகோள் என்னவென்றால், அவர் இந்த செயல்முறையை முன்னோக்கி எடுத்து, இலங்கையின் 7 வது ஜனாதிபதியாக தனது அமைதியான தேர்தலுக்கு உதவிய ஜனநாயக நிறுவனங்கள் மற்றும் மதிப்புகளை வலுப்படுத்தி பாதுகாக்க வேண்டும்.

தேர்தலுக்கு பிந்தைய சூழல் அமைதியானது என்பதை உறுதிப்படுத்தவும், எனது வேட்புமனுவை ஆதரிப்பதில் அவர்களின் பங்களிப்புக்காக எந்தவொரு குடிமகனும் அல்லது என்.டி.எஃப் கட்சி ஆதரவாளரும் துன்புறுத்தப்படுவதில்லை அல்லது பாதிக்கப்படுவதில்லை என்றும் திரு ராஜபக்சேவை நான் கேட்டுக்கொள்கிறேன்.

26 ஆண்டுகளாக, நான் இந்த நாட்டில் ஒரு தீவிர அரசியல்வாதியாக இருக்கிறேன்.

அந்த நேரத்தில், எனது சொந்த மாவட்டமான ஹம்பன்டோட்டாவிலும், எங்கிருந்தாலும், எப்போது வேண்டுமானாலும் அவர்களுக்கு எனது உதவி தேவைப்படும் போதெல்லாம் மக்களுக்கு சேவை செய்ய நான் எல்லா முயற்சிகளையும் செய்துள்ளேன்.

2025 ஆம் ஆண்டளவில் வீட்டுக்கு சொந்தமான சமுதாயத்தை உருவாக்குவதற்கு முன்னுரிமை அளித்து, ஐந்து ஆண்டுகளாக இந்த அரசாங்கத்தில் வீட்டுவசதி அமைச்சராக பணியாற்றுவது எனது பாக்கியம். இவை எனது சக குடிமக்களின் வாழ்க்கையை மேம்படுத்துவதற்கான நேர்மையான, இதயப்பூர்வமான முயற்சிகள் என்பதை மக்கள் புரிந்துகொள்வார்கள் என்று நம்புகிறேன்.

வாக்காளர்களின் இன்றைய முடிவின் வெளிச்சத்தில், உடனடியாக நடைமுறைக்கு வரும் வகையில் ஐக்கிய தேசிய கட்சியின் துணைத் தலைவர் பதவியில் இருந்து விலக முடிவு செய்துள்ளேன். வரவிருக்கும் வாரங்களில், எனது ஜனாதிபதி முயற்சியை ஆதரித்த அனைவருடனும், எனது அரசியல் பயணத்தின் மூலம் எனக்கு ஆதரவாக நின்ற மக்களுடனும், எனது அன்புக்குரியவர்களுடனும் கலந்தாலோசித்து, எனது அரசியல் வாழ்க்கையின் எதிர்காலம் மற்றும் எனது வாழ்க்கை இனி என்னை எங்கு அழைத்துச் செல்லும் என்பதைப் பற்றி சிந்திப்பேன் .

இலங்கை மக்களுக்கு கட்டுப்பட்ட நான், இன்றும் எப்பொழுதும் அவர்களின் உண்மையுள்ள ஊழியராக இருக்கிறேன்.

Comment (0) Hits: 88

"இந்த நாட்டுக்காக நான் கண்ணீர் மல்குகின்றேன்" - மங்கள சமரவீர!

இந்த நாட்டுக்காக தாம் கண்ணீர் மல்குவதாக நிதி அமைச்சர் மங்கள சமரவீர தெரிவித்துள்ளார்.

டுவிட்டர் பதிவு ஒன்றின் மூலம் அவர் இதனைக் குறிப்பிட்டுள்ளார்.

ஜனாதிபதி தேர்தல் முடிவுகளின் அடிப்படையில், கோத்தபாய ராஜபக்ஷ வெற்றியீட்டியுள்ளதாக தகவல்கள் வெளியாகி வரும் நிலையில் அவர் இந்த கருத்தை வெளியிட்டுள்ளார்.

அந்தப் பதிவில் குறிப்பிடப்பட்டிருப்பதாவது,

"நான் அன்பார்ந்த தாய்நாட்டுக்காக கண்ணீர் மல்குகின்றேன். இலங்கையையும் இலங்கை மக்களையும் புத்த பெருமான் பாதுகாக்க வேண்டும், புத்தரின் அருள் தொடர்ந்தும் நாட்டின் மீது பாலிக்கப்பட வேண்டும்"எனவும் தெரிவித்துள்ளார்.

76269254 755357311632444 249845308534554624 n

 

 

 

Comment (0) Hits: 133

மங்கள சமரவீர; பதவி விலகத் தீர்மானம்!

நிதி அமைச்சர் மங்கள சமரவீர தனது அமைச்சர் பதவியை ராஜினாமா செய்யத் தீர்மானித்துள்ளதாக தகவல்கள் வெளியாகியுள்ளன.

அதன்படி அமைச்சர் மங்கள இன்று (17) தனது இராஜினாமா கடிதத்தை ஜானாதிபதி மைத்திரியிடம் ஒப்படைத்துள்ளதாகவும், அதன் பிரதியை பிரதமர் ரணில் விக்கிரமசிங்வுக்கு அனுப்பு வைத்துள்ளதாகவும் தெரிவிக்கப்படுகிறது.

ஜனாதிபதி தேர்தல் முடிவுகளின் அடிப்படையில் இந்த தீர்மானத்தை நிதி அமைச்சர் எடுத்துள்ளதாகக் குறிப்பிடப்படுகிறது.

Comment (0) Hits: 79

முடிவுகள் தாமதமாகும் அறிகுறி; சமூக வலைத்தளங்களில் வெளியிடப்பட்ட தேர்தல் பெறுபேறுகள் உண்மையானவை அல்ல - தேர்தல் ஆணையாளர்!

சமூக வலைத்தளங்களில் தற்பொழுது வெளியிடப்பட்டு வரும் தபால்மூல வாக்களிப்பின் முடிவுகள் எவையும் அதிகாரபூர்வமற்றவை என தேர்தல் ஆணையாளர் அறிவித்துள்ளார்.

சமூக இணையத்தளங்களில் பரிமாறப்பட்டு வரும் தேர்தல் பெறுபேறு முற்றிலும் உண்மைக்கு புறம்பானது என தேர்தல்கள் ஆணைக்குழுவின் தலைவர் மஹிந்த தேசப்பிரிய அறிக்கை ஒன்றில் தெரிவித்துள்ளார்.

இது தொடர்பாக அந்த அறிக்கையில் தெரிவிக்கப்பட்டுள்ளதாவது,

"இன்று (16) இரவு 9.40 மணியளவில் அனைத்து தபால் வாக்குகளும் வாக்குகள் எண்ணப்படும் மத்திய நிலையங்களில் அவை இருந்த கடித உறைகள் அகற்றப்பட்டு கணக்கிடும் பணி ஆரம்பிக்கப்பட்டுள்ளது.

சில வாக்குகளை எண்ணும் மத்திய நிலையங்களில் தபால் மூல வாக்குகள் கணக்கிடும் பணி இறுதிக் கட்டத்தை அடைந்துள்ளது. இதுவரையில் சமூக இணையத்தளங்கள் ஊடாக உத்தியோகபூர்வ மற்றும் தபால் மூல வாக்குகள் என தெரிவிக்கப்பட்டு, வெளியிடப்பட்டுள்ள அனைத்து ஆவணங்களிலும் உள்ள பெறுபேறுகள் உண்மையானவை அல்ல.

இரத்தினபுரி, கேகாலை, பதுளை ஆகிய மாவட்டங்களில் இன்று மாலை பெய்த மழையின் காரணமாக சிறிய அளவில் வெள்ளம் ஏற்பட்டுள்ளது. இதனால் இந்த பகுதியில் உள்ள வாக்குகளை எண்ணும் மத்திய நிலையங்களுக்கு வாக்குப் பெட்டிகளை எடுத்து செல்வதில் தடை ஏற்பட்டது.

சில வாக்கு எண்ணப்படும் மத்திய நிலையங்களில் வாக்குகள் எண்ணும் பணி இரவு 10 மணிக்கு பின்னரே ஆரம்பிக்கப்பட்டது. இதன் காரணமாக இந்த மாவட்டங்களின் பெறுபேறுகளை வெளியிடுவதில் தாமதம் ஏற்படும்.

இதேபோன்று, வாக்கு பெட்டிகள் எடுத்துச் செல்லப்பட்ட வாகனம் ஒன்று திடீர் விபத்துக்குள்ளானது. இதனால் வாக்கு பெட்டிக்கோ, அதிகாரிகளுக்கோ பாதிப்பு ஏற்படவில்லை. இந்த அதிகாரிகளும் பாதுகாப்பான முறையில் பதுளை வாக்குகள் எண்ணும் மத்திய நிலையத்திற்கு சென்றுள்ளனர். இதேபோன்று வாக்கு பெட்டிகளும் பாதுகாப்பான முறையில் எடுத்து செல்லப்பட்டுள்ளன."

தேர்தல் ஆணையாளரின் இந்த அறிவிப்பினால், கோட்டாபய ராஜபக்ஷவுக்கு ஆதரவான சில சமூக வலைத்தளங்களில் பகிரப்பட்ட போலிச் செய்திகள் அகற்றப்பட்டுள்ளமை குறிப்பிடத்தக்கது. 

 

Comment (0) Hits: 287

கோட்டா 11 மாவட்டங்களில் முன்னிலையில்: வடக்கு, கிழக்கு, மலையகத்தில் சஜித் முன்னிலையில்!

இன்று நடைபெற்ற ஜனாதிபதித் தேர்தலின் வாக்கெடுப்பில் இதுவரை அறிக்ககையிடப்பட்டுள்ள உத்தியோகபூர்வமற்ற முடிவுகளின் பிரகாரம் வடக்கு, கிழக்கு மற்றும் நுவரெலியா மாவட்டங்களில் சுமார் 11  இலட்சம் வாக்குகளை சஜித் பிரமேதாச பெற்றுள்ளதாகத் தெரிவிக்கப்பட்டுள்ளது.

இன்று நடைபெற்ற ஜனாதிபதித் தேர்தலின் வாக்கெடுப்பில் இதுவரை அறிக்கையிடப்பட்டுள்ள உத்தியோகபூர்வமற்ற முடிவுகளின் பிரகாரம்,  வடக்கு - கிழக்கு மற்றும் நுவரெலியா மாவட்டங்களில் சுமார் 11  இலட்சம் வாக்குகளை சஜித் பிரமேதாச பெற்றுள்ளதாகத் தெரிவிக்கப்பட்டுள்ளது. கோத்தாபய ராஜபக்ஷ தெற்கில் 11 மாவட்டங்களில் முன்னிலையில் உள்ளதாகத் தெரிவிக்கப்படுகிறது.

இருப்பினும், கிழக்கு மற்றும் நுவரெலியா மாவட்டங்களில் சஜித் பிரேமதாச பெற்ற வாக்குககளின் எண்ணிக்கையை  விட, கோத்தபாய பெற்ற வாக்குகளின் எண்ணிக்கை குறைவானதாகவே காணப்படுவதாகத் தெரிய வந்துள்ளது.

இதன்படி கோத்தாபய வெற்றி பெறுவதற்கு தெற்கில் 62% சத வீதமான வாக்குகளைப் பெற வேண்டிய நிலை ஏற்பட்டுள்ளது. மேலும்,  கோத்தாபய ராஜபக்ஷ தபால் வாக்குகளின் அடிப்படையில் முன்னிலை  வகித்தாலும் அவர் வெற்றிபெற 62% சத வீத வாக்குகளைப் பெற வேண்டியுள்ளது.

Comment (0) Hits: 182

தபால் மூல வாக்களிப்பில் கோட்டாபய முன்னிலையில் - நாடளாவிய ரீதியிலான முடிவுகளில் சஜித் முன்னிலையில்!

2019ஆம் ஆண்டு ஜனாதிபதித் தேர்தலுக்கான வாக்கெடுப்பில் தபால்மூல வாக்களிப்பில் கோட்டாபய ராஜபக்ஷ முன்னிலை வகிப்பதாக தெரியவருகிறது.

எனினும், நாடளாவிய ரீதியலான வாக்கு எண்ணும் பணிகள் தற்போது ஆரம்பிக்கப்பட்டுள்ள நிலையில், இவற்றில் சஜித் பிரேமதாச முன்னிலை வகிப்பதாக தெரயவருகிறது.

அத்துடன்,  2015ஆம் ஆண்டு  ஜனாதிபதி தேர்தலுடன் ஒப்பிடும் போது, வடக்கு - கிழக்குப் பிரதேசத்தில் வாக்களிப்பு விகிதம் அதிகரித்துள்ளது. எனினும், தெற்குப் பிரதேசத்தில் வாக்களிப்பு வீதம் குறைந்துள்ளது.

அத்துடன், 2015ஆம் ஆண்டிலும் மஹிந்த ராஜபக்ஷ தபால்மூல வாக்களிப்பில் வெற்றிபெற்றிருந்தாலும். தேர்தலில் தோல்வியடைந்திருந்தமை குறிப்பிடத்தக்கது.
 
வடக்கு, கிழக்கில் சஜித் பிரேமதாசவிற்கு அதிகமான வாக்குகள் கிடைக்கும் என்று கணிப்புக்கள் வெளியாகியுள்ளன. அத்துடன், கோட்டாபய ராஜபக்ஷவிற்கு ஆதரவான தென் இலங்கைப் பிரதேசத்தில் வாக்களிப்பு வீதத்தில் சரிவு காணப்படுவதானால்,  கோட்டாபய ராஜபக்ஷவிற்கான வெற்றிவாய்ப்புக்கள் குறைந்துள்ளதாக தெரிய வருகிறது.
 
 
 
 
 
 
 
Comment (0) Hits: 414

Page 1 of 103